قايرات نۇرتاس 15 تاۋلىككە قامالدى

استانا قالاسىنىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتى انشىگە قاتىستى اكىمشىلىك جازا قولدانىلعاننان كەيىن ءبىر جىل ىشىندە قايتالاپ جاسالعان ۇساق بۇزاقىلىق (اقبتك-ءنىڭ 434-بابىنىڭ 2-بولىگى) جانە دەنساۋلىققا قاساقانا جەڭىل زيان كەلتىرۋ (اكىمشىلىك قۇقىق بۇزۋشىلىق تۋرالى كودەكستىڭ 73-1-بابىنىڭ 1-بولىگى) فاكتىلەرى بويىنشا اكىمشىلىك ءىستى قارادى.

«اقبتك-ءنىڭ 73-1-بابىنىڭ 1-بولىگىنىڭ سانكتسياسى 15 اەك مولشەرىندە ايىپپۇل سالۋ نەمەسە 15 تاۋلىككە دەيىن اكىمشىلىك قاماققا الۋ تۇرىندەگى جاۋاپكەرشىلىكتى قاراستىرادى. 434-باپتىڭ 2-بولىگىنىڭ سانكتسياسى 15-تەن 30 تاۋلىككە دەيىنگى مەرزىمگە اكىمشىلىك قاماققا الۋ تۇرىندەگى جاۋاپكەرشىلىكتى كوزدەيدى», دەلىنگەن جوعارعى سوتتىڭ ءباسپاسوز قىزمەتى تاراتقان حابارلامادا. 

سوت قاۋلىسىمەن ءانشى 15 تاۋلىك مەرزىمگە اكىمشىلىك قاماۋعا الىندى. قاۋلى زاڭدى كۇشىنە ەنگەن جوق.

ايتا كەتەيىك, باق مالىمەتىنشە ءانشى ۇشاق بورتىندا سوزگە كەلىپ قالىپ, جانجال كەزىندە باسقا جولاۋشىنىڭ دەنساۋلىعىنا قاساقانا جەڭىل زيان كەلتىرگەن.