كەزىندە فابريكا تىككەن ەرلەر جەيدەسى وتاندىق نارىقتان ويىپ تۇرىپ ورىن العان ەدى. ءتىپتى سىرت مەملەكەتتەردەن كەلىپ الىپ كەتەتىندەر كوپ بولاتىن. جاقىندا ءوندىرىس ورنى ءورىسىن كەڭەيتىپ, جاڭا عيماراتقا كوشتى. كاسىپكەر ۇزاق جىل تويحانا بولعان عيماراتتى ساتىپ الىپ, تىگىن فابريكاسىنا اينالدىرىپ وتىر.
ء«بىز كاسىپتى باستاعاندا وسى سالادا كوپجىلدىق تاجىريبەسى بار ماماندار سيرەپ, بۇرىنعى ءوندىرىس ورىندارى دا جابىلىپ قالعان كەز ەدى. ودان بولەك, قاجەتتى قۇرىلعىلاردى, ءتىپتى شيكىزاتتى سىرتتان الدىراتىنىمىز تاعى بار. جەڭىل ونەركاسىپتىڭ جۇگى جەڭىل بولمايتىنىن بىلسەك تە, باستاعان ءىسىمىزدى تاستامادىق. تۇركيا ەلىنەن ماماندار الدىرىپ, تالاپتىلاردى دايارلادىق. بىرتە-بىرتە ءونىمىمىز ءوتىمدى تاۋارعا اينالىپ, الىس-جاقىنعا اتىمىز جەتتى. مىنا جايلى عيمارات ءىسىمىزدى دامىتىپ, تاپسىرىستاردى كوبىرەك قابىلداۋعا مۇمكىندىك بەرەدى دەگەن ويدامىز», دەيدى كاسىپكەر.
شەكارا شەگەندەلىپ, قارعا ادىم جەرگە تۇمشالانىپ بارۋعا تۋرا كەلگەن كەشەگى پاندەميانىڭ كەزىندە فابريكا مىڭداعان ماسكا تىگىپ, ونى تەگىن تاراتتى. وسى كۇنى مۇندا جۇمىس ىستەيتىن 80 ادام ارنايى جۇمىس كيىمدەرى مەن كۇشتىك قۇرىلىمدار فورمالارىن تىگىپ جاتىر. الدا جۇمىسشىلار سانى مەن قابىلداناتىن تاپسىرىستى ۇلعايتۋ جوسپاردا بار.
«العاش اشىلعاندا نەبارى 20 اداممەن عانا باستادىق. سودان بەرى ماماندارىمىز ءارى كەتسە 1 اي عانا اقىسىز ەڭبەك دەمالىسىنا شىققان شىعار. جالاقىنى, باسقا دا تولەمدەردى كەشىكتىرمەيمىز. مىسالى, 2022 جىلى سالىققا 51 ملن تەڭگە اۋداردىق. بىلتىرعى تولەمدەرىمىز دە وسىعان جەتەعابىل بولىپ تۇر. سويتە تۇرا كەيدە جەڭىل ونەركاسىپكە جەڭىل قارايتىنداردى كورىپ, كوڭىلىڭ قۇلازيدى. ءبىزدىڭ سالادا ماسەلە كوپ. سونىڭ باستىسى – شيكىزاتتى سىرتتان, اسىرەسە قىتايدان الدىرىپ وتىرعانىمىز. ءتىپتى ماقتا وزىمىزدەن شىقسا دا, ءىشىنارا ونى ماتاعا اينالدىرىپ وتىرعان وتاندىق كاسىپورىنداردىڭ ءونىمى شەتەلدىكىنەن قىمبات بولىپ تۇر. ايتەۋىر وزىمىزدىكى عوي دەپ الايىن دەسەڭ, نارىقتان تاپپايسىڭ. وسىعان قاراپ كوڭىلدى «بىزدەگى كەيبىر كاسىپورىندار تەك مەملەكەتتىك تاپسىرىسقا عانا جۇمىس ىستەي مە؟» دەگەن كۇدىك باسادى. بۇل تاراپتا ءوز شيكىزاتىن ونىمگە اينالدىرعان وزبەكستان بىزدەن الدەقايدا العا كەتتى. «ونەركاسىپتى قولداۋ قورى» اق تاراپىنان قولداۋ كورىپ جاتساق, شيكىزاتتى ءوزىمىز وندىرمەك تالابىمىز دا بار. قازىر وسى ماسەلەمەن اينالىسىپ جاتىرمىز», دەيدى كاسىپ يەسى.
مۇندا جۇمىس ىستەيتىندەردىڭ دەنى – جەرگىلىكتى كوللەدجدەردى بىتىرگەن ماماندار. وسىدان 6 جىل بۇرىن 3-كۋرستا فابريكاعا كەلگەن پەريزات سلامبەكوۆا قازىر ديرەكتوردىڭ ءوندىرىس جونىندەگى ورىنباسارى قىزمەتىن اتقارادى. جاقىندا ءوندىرىستى اۆتوماتتاندىرۋ ماقساتىندا قىتايعا ساپارلاپ, قاجەتتى قۇرىلعىلارعا تاپسىرىس بەرىپ كەلدى.
«تىگىنشى بولام دەگەن ادامدى جىلداپ وقىتۋدىڭ قاجەتى جوق. ارناۋلى ءبىلىمى بولماسا دا, فابريكادا 1 اي ىشىندە ىسكە توسەلىپ, مىقتى مامان اتانىپ وتىرعاندار بار. ءبىز دە تەوريانى كوللەدجدە وقىعانىمىزبەن تاجىريبەنى وسى جەردەن جينادىق», دەيدى پەريزات.
سالاداعى ماسەلەنى ءبىر ادامداي بىلەتىن كاسىپ يەسىنىڭ ينۆەستيتسيالىق كەلىسىمشارت جايىندا دا ۇسىنىسى بار.
«بۇل كەلىسىم 600 ملن تەڭگەدەن باستالىپ, كاسىپكەر 5 جىلعا قوسىمشا قۇن سالىعى مەن ءتۇرلى سالىقتان بوساتىلادى. ونىڭ شارتى شەتەلدىككە دە, وتاندىق كاسىپكەرگە دە بىردەي. وسى ارادا ءبىز ۇتىلاتىن تۇس بار. ءوز ەلىنەن ارزان نەسيە الىپ, بىزگە سالعان شەتەل ىسكەرى پايدانىڭ استىندا قالادى. ولاردا كرەديت 2-3 پايىز بولسا, بىزدەگى جەڭىلدەتىلگەن نەسيە – 8-9 پايىز. مىسالى, قازىر مەن ءىس اياسىن كەڭەيتىپ, جاڭا قوندىرعىلار الۋعا شامامەن 400 ملن تەڭگەدەي جۇمساپ وتىرمىن. ينۆەستيتسيالىق كەلىسىمشارت تالابىنا سايكەس كەلۋى ءۇشىن ءالى 200 ملن تەڭگە سالۋىم كەرەك. وتاندىق بيزنەس وكىلدەرى ءۇشىن وسى كەلىسىم سوماسىن ازايتسا, ۇلكەن جەڭىلدىك بولار ەدى», دەيدى
كاسىپكەر.
كاسىپورىن ەندى ەرلەر كۇرتەسىن تىگۋگە بەل بايلاپ وتىر. قازىر كيىم ۇلگىلەرى مەن ماتالارى تاڭدالىپ جاتىر. جاقىن ارادا تۇركيادان شاقىرىلعان ماماندار كەلىپ, جەرگىلىكتى شەبەرلەردى ءونىمنىڭ جاڭا تۇرىنە بەيىمدەيدى.
قىزىلوردا
