فوتو: ا.بايجۇمانوۆ
سەناتور الەۋمەتتىك-ەڭبەك سالاسىنداعى مەملەكەتتىك ساياساتتى ىسكە اسىرۋ, ەڭبەك نارىعىنىڭ اعىمداعى جاي-كۇيى مەن دامۋ كەلەشەگىن باعالاۋ, سونداي-اق جۇمىسسىز ازاماتتاردى قولداۋ شارالارى مەن حالىقتى جۇمىسپەن قامتۋدى ىنتالاندىرۋ ماسەلەسىنە دەپۋتاتتار ەرەكشە نازار اۋدارىپ وتىرعانىن اتاپ ءوتتى.
«پرەزيدەنت جولداۋىندا ەڭبەك نارىعىن دامىتۋ جانە قاۋىپسىزدىك ماسەلەلەرىنە ەرەكشە نازار اۋدارىپ, ەڭبەك نارىعىنداعى تۇبەگەيلى وزگەرىستەردى, ونىڭ ىشىندە جارتى ميلليوننان استام ادامدى قامتيتىن تسيفرلىق ەكونوميكا مەن جۇمىسپەن قامتۋ تۇعىرنامالىق تۇرعىدا وسە تۇسكەنىن جانە وسى ساناتتاعى ازاماتتاردىڭ ەڭبەك قۇقىقتارىن قورعاۋ جانە جۇمىسپەن قامتۋدى تۇعىرنامالىق تۇردە رەتتەۋ تەتىكتەرىن ازىرلەۋ قاجەتتىگىن اتاپ ءوتتى. سونداي-اق, وندىرىستەگى جاراقاتتانۋ دەڭگەيىنىڭ جوعارى ەكەنى تۋرالى ماسەلە كوتەرىلدى, كاسىبي قاۋىپتەردىڭ الدىن الۋ ءۇشىن قۇجاتتاردى ازىرلەۋ تۋرالى مينيسترلىككە تاپسىرما بەرىلدى. پارلامەنت پرەزيدەنت ايتقان مىندەتتەر مەن ماقساتتاردى باسىم دەپ سانايدى, سونداي-اق تاپسىرمالاردى ۋاقىتىلى جانە ساپالى ورىنداۋ ءۇشىن وسى مىندەتتەردى ىسكە اسىرۋدا جان-جاقتى كومەك كورسەتۋگە دايىن», دەدى نۇرتورە ءجۇسىپ.
سۆەتلانا جاقىپوۆا ءوز كەزەگىندە قاۋىپسىز ەڭبەك جاعدايىن جاساۋ, جۇمىسسىزدىقتىڭ الدىن الۋ, الەۋمەتتىك قامسىزداندىرۋ سالاسىندا ۋاقىتىندا مەملەكەتتىك قىزمەت كورسەتۋ ءارى ساپاسىن جاقسارتۋ, سونداي-اق الەۋمەتتىك-ەڭبەك سالاسىنداعى نورماتيۆتىك-قۇقىقتىق اكتىلەردى جەتىلدىرۋگە باعىتتالعان مينيسترلىكتىڭ جۇمىسى تۋرالى ايتىپ بەردى.
تاراپتار كەزدەسۋ قورىتىندىسى بويىنشا ۇدەرىستەردى وڭتايلاندىرۋ مەن الەۋمەتتىك قورعاۋ جانە ەڭبەك قاتىناستارىنىڭ نەعۇرلىم اشىق ءارى قولجەتىمدى جۇيەسىن قۇرۋعا باعىتتالعان يننوۆاتسيالىق تەحنولوگيالاردى ەنگىزۋ ماسەلەلەرىن تالقىلادى.
