«بيىلعى ناۋرىز ايىنان باستاپ ايماعىمىزدا «رۋحانيات جىلى» جاريالاندى. اتاۋلى جىلعا باستى تارتۋ رەتىندە 1000 ورىندىق «ونەر ورتالىعى» اشىلدى. حالىقارالىق تۇركسوي ۇيىمىنىڭ شەشىمىمەن ءبىزدىڭ ءوڭىر تۇركى دۇنيەسىنىڭ «ەڭ ۇزدىك مادەني ايماعى» اتالىمىن يەلەندى. بۇل سىر جاعالاۋىنداعى بايىرعى جۇرتتىڭ ورتا ازياداعى رۋحاني, مادەني كەمەلدەنگەن ءوڭىر رەتىندە لايىقتى باعالانۋى دەپ بىلەمىز», دەدى ايماق باسشىسى.
ۇلت مادەنيەتىنىڭ مايەگى سانالعان وڭىردەگى سالا وكىلدەرىن قولداۋ قادامدارى قۋانتادى. جىل سايىن بىلىمگە قۇشتار جاستارعا وبلىس اكىمىنىڭ 100 گرانتى تابىستالىپ كەلەدى. ودان بولەك, قابىلەتتى تالاپكەرلەرگە قورقىت اتا ۋنيۆەرسيتەتىنىڭ ء«داستۇرلى ونەر» ماماندىعىنا وقۋعا قوسىمشا 10 گرانت بولىنەتىن بولادى. بىلتىردان باستاپ مادەنيەت جانە ونەر سالاسى مايتالماندارىنىڭ مارتەبەسىن كوتەرەتىن «تۇران» ارنايى سىيلىعى تاعايىندالىپ وتىر. سالتاناتتى جيىندا بۇل سىيلىقتىڭ بيىلعى يەگەرلەرىنە كوپ الدىندا قۇرمەت كورسەتىلدى. بىرقاتار ازاماتقا وبلىستىڭ قۇرمەت گراموتاسى, مادەنيەت جانە اقپارات مينيسترلىگىنىڭ ماراپاتتارى تابىستالىپ, 8 ونەر ۇجىمىنا 60 دومبىرا تارتۋ ەتىلدى.
الداعى ۋاقىتتا ءوڭىردىڭ جازبا مادەنيەتىن ناسيحاتتايتىن «الاش ادەبيەتى» مۋزەيى ۇيىمداستىرىلىپ, جازبا جادىگەرلەرىن رەستاۆراتسيالاۋعا ارنالعان ارحيۆ لابوراتورياسى ىسكە قوسىلادى.
«رۋحانيات جىلى» شەڭبەرىندە وبلىستاعى 171 مادەنيەت ءۇيى مەن كلۋب «ادال ادام» تۇجىرىمداماسى اياسىندا قايتا جاڭعىرتىلىپ وتىر. ايماق مادەنيەتىنىڭ باستى برەندى – جىراۋلىق ءداستۇر وكىلدەرىنىڭ باسىن قوسقان «جىراۋلار ءۇيى» اشىلدى. وسى كوكتەمدە دالا ءدىلمارى ايتەكە ءبيدىڭ 380 جىلدىعىنا وراي تۇڭعىش رەسپۋبليكالىق كوماندالىق ايتىس وتكىزىلدى.
«رۋحانيات جىلى» اياسىندا سىرداريا وزەنىنىڭ سول جاعالاۋىنان وبلىستىق تاريحي-ولكەتانۋ مۋزەيىنىڭ جاڭا عيماراتى بوي كوتەرمەك. بالالار تالابىن ۇشتايتىن «شىعارماشىلىق اكادەمياسى», ەكى اۋداندا «وقۋشىلار ءۇيى» مەن «ونەر مەكتەبى» سالىنىپ جاتىر. ونەر كەرۋەنىنە تالاي دارىندى قوسقان قازانعاپ اتىنداعى قىزىلوردا مۋزىكالىق جوعارى كوللەدجىنىڭ جاڭا عيماراتى دا سول جاعالاۋدىڭ ءسانىن كەلتىرەتىن كۇن الىس ەمەس. جەتى اۋداندا مۋزەي, كىتاپحانا, ارحيۆ, نەكە قيۋ زالى, ارداگەرلەر جانە انالار, جاستار ورتالىقتارىن بىرىكتىرەتىن تيپتىك ۇلگىدەگى «رۋحانيات» ورتالىقتارىنىڭ ىرگەتاسى قالاندى.
مەملەكەت باسشىسىنىڭ تۇركىستاندا وتكەن قۇرىلتايدا زاماناۋي كىتاپحانا جۇمىسىن ۇيىمداستىرۋ تۋرالى ۇسىنىسىنا سايكەس 1 ماۋسىمنان باستاپ ءا.تاجىباەۆ اتىنداعى وبلىستىق امبەباپ-عىلىمي كىتاپحانا تاۋلىك بويى جۇمىس تارتىبىنە كوشەدى.
بىلتىرعى جىلدىڭ تاعى ءبىر تابىسى – «ساق جاۋىنگەرى» مەن «سىعاناق حانشايىمىنىڭ» مۇسىندەرى. ارحەولوگ-عالىمدار 20 جىل بويى جۇرگىزگەن قازبا جۇمىستارىنىڭ ناتيجەسىندە جاسالعان بۇل جادىگەرلەر قاتارىن بيىل «تۇگىسكەن كوسەمى» مەن «جەتىاسار اقسۇيەك ايەلى» مۇسىندەرى تولىقتىرىپ, كۇزدە ۇلتتىق مۋزەيدەگى كورمەگە قويىلماق.
بىلتىر ەلوردادا استانانىڭ 25 جىلدىعىنا وراي «سۇلۋ سىردان – ارۋ استاناعا» اتتى قىزىلوردا وبلىسىنىڭ ونەر كۇندەرى جوعارى دەڭگەيدە ءوتتى. بيىل ايماق ونەرپازدارى وسىنداي ساپارمەن الماتى قالاسىنا جول تارتادى. وبلىستىڭ مادەني ۇيىمدار ماماندارى يتاليا, بەلارۋس ەلدەرىندە بىلىكتىلىگىن ارتتىرىپ كەلەدى. وزگە ەل ونەرىمەن تانىسىپ, ەۋروپاداعى بەلگىلى كونتسەرتتىك زالداردىڭ وزىق تاجىريبەسىن ۇيرەنىپ ءجۇر.
الدا ەل نامىسىن قورعاعان ەر جانقوجا نۇرمۇحامەد ۇلىنىڭ 250 جىلدىعىنا وراي داستان ورىنداۋشىلاردىڭ رەسپۋبليكالىق فەستيۆالى جوسپارلانىپ, قازاقستاننىڭ حالىق جازۋشىسى ءابدىجامىل نۇرپەيىسوۆتىڭ 100 جىلدىعىنا وراي «سوڭعى پارىز» رومانى تۇركسوي ۇيىمىنىڭ قولداۋىمەن تۇرىك تىلىنە اۋدارىلىپ جاتىر.
وسى كۇنى «ونەر ورتالىعىنا» كەلگەندەر ءابىلحان قاستەەۆتىڭ 120 جىلدىعىنا وراي ۇيىمداستىرىلعان «قىلقالامدا ماڭگىلىك ەل بەينەسى» اتتى حالىقارالىق سيمپوزيۋم قاتىسۋشىلارىنىڭ كورمەسىن تاماشالادى. جيىن سوڭى جەرگىلىكتى ونەرپازداردىڭ كونتسەرتتىك باعدارلاماسىنا ۇلاستى.
قىزىلوردا
