قوستاناي وبلىسىندا قىلمىستىق ارەكەتتەر ازايماي تۇر

قوستاناي. 10 قاڭتار. وتكەن جىلدىڭ قورىتىندىسى بويىنشا, قوستاناي وبلىسى رەسپۋبليكامىزدا قىلمىس كوپ جاسالاتىن وڭىرلەردىڭ قاتارىنان كورىندى. بۇل تۋرالى ng.kz حابارلادى. قوستاناي وبلىسى قىلمىستىڭ سانىنان ەلىمىزدەگى الماتى, استانا قالالارى مەن الماتى, شىعىس قازاقستان, وڭتۇستىك قازاقستان وبلىستارىنان كەيىنگى التىنشى ورىندا تۇر. جىل بويىنا بارلىعى 23 845 قىدمىس تىركەلگەن. بۇل الدىڭعى جىلعا قاراعاندا 9 پايىزعا كەم. قۇقىقتىق ستاتيستيكا جانە ارنايى ەسەپ كوميتەتىنىڭ وبلىستىق باسقارماسىنىڭ ءبولىم باستىعى رەنات زۇلحايىروۆ: «قىلمىستى ءار 10 000 تۇرعىنعا شاققاندا قوستاناي وبلىسى 3-ءشى ورىنعا شىعادى. حالقىنىڭ سانى جاعىنان شامالاس اقتوبە, پاۆلودار جانە قىزىلوردا وبلىستارىن باسىپ وزدى», – دەدى. باسقارما ماماندارى تالداۋ جاساي كەلە قازىرگى قىلمىسكەردىڭ پورترەتىن شىعارعان. ول شامامەن 21-29 جاس ارالىعىندا, بەلگىلى جۇمىس ورنى جوق, ورتا ءبىلىمى بار, قالادا تۇراتىن ازامات. 2014 جىلى قىلمىستىق جاۋاپكەرشىلىككە تارتىلعان 6 875 قىلمىسكەردىڭ 75 پايىزىنىڭ جۇمىسى جوق, 20 پايىزى بۇرىن سوتتالعان, ءار ءۇشىنشى قىلمىستى اراققا تويعان ادام جاساعان. ەڭ وكىنىشتىسى, قىلمىستىق تەرگەۋ ورگاندارىنىڭ قىلمىستى جاسىرىپ قالۋى ءالى تيىلماي كەلەدى. ءار ايدا 35-كە جۋىق جاسىرىپ قالعان قىلمىستار قايتا تىركەلەدى. وتكەن جىلى پروكۋراتۋرا قىزمەتكەرلەرى جاسىرعان 211 قىلمىستى اشقان. ءنازيرا جارىمبەتوۆا. دەرەك: ng.kz. سۋرەت: kazakhstanzsmsn.kz.