ارتىق عىلىم – كىتاپتا

حاكىم ابايدىڭ بۇل ءسوزى ەشقاشان كونەرمەيدى. بۇگىنگىدەي عىلىم مەن تەحنيكا مەيلىنشە وركەندەگەن تۇستا, جۇرتشىلىق بار كەرەگىن عالامتوردان ىزدەپ, كومپيۋتەر كىتاپتى ىعىستىرىپ شىعارادى دەيتىن پىكىرلەردىڭ كورىگى قىزىپ جاتقان كەزدە وعان ءبىر ءتۇرلى كۇماندانىپ قالاتىنىڭ دا قۇپيا ەمەس. دەسەك تە, ادامزاتتى بۇگىنگىدەي دامىپ-وركەندەگەن زامانعا جەتۋىنە كىتاپتىڭ دا ۇلەسى بولعانىن ەشكىم جوققا شىعارا الماس. «جاس بالانى ساياسي قايراتكەرگە دەيىن تاربيەلەيتىن – كوركەم ادەبيەت», دەپتى ل.فەيحتۆانگەر. ەندەشە, بالانىڭ كىتاپ وقىماي قويعانىنا الاڭداماي تۇرا الماساق كەرەك. بالانى عانا ەمەس, جالپى جۇرت­شىلىقتى كىتاپ وقۋعا قۇل­شىندىرۋ ءۇشىن نە ىستەۋ كەرەك؟ بۇل – شىمكەنت قالاسى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ ۇستازدارى مەن وقۋشىلارىنىڭ  كوكەيىندەگى سۇراق ەدى. كوپ ۇزاماي ءبىلىم ورداسىنىڭ اكىمشىلىگى بۇل باعىتتا وزىندىك ءادىس-تاسىلدەردى قول­دانۋعا كى­رىستى. سونىڭ ءبىرى – مەكتەپتە ۇيىم­داستىرىلعان وقۋ ساعاتى. وقۋ ساعاتى اپتاسىنا ەكى كۇن وتكىزىلەدى. اپتانىڭ سەيسەنبى جانە بەيسەنبى كۇندەرى ۇلكەن ءۇزىلىس كەزىندە مەكتەپتىڭ بۇكىل مۇعالىمدەر ۇجىمى, وقۋ­شىلارى مەن تەحنيكالىق قىزمەتكەرلەرى جاپپاي كوركەم ادەبيەت وقۋمەن اينالىسادى. بۇل ۇدەرىستىڭ جۇزەگە اسۋ بارىسى ارنايى قاداعالانادى, بەينەتاسپاعا تۇسىرىلەدى. ال اپتا قورىتىندىسىندا وقۋ ساعاتىنا تالداۋ جاسالىپ, كەمشىلىكتەر مەن ۇسىنىستار ايتىلادى. «كەڭەسىپ پىشكەن تون كەلتە بولماس». يگىلىكتى يدەيا ىسكە اسى­رىلۋدان بۇرىن جەتى رەت ولشەنگەن. اسىرەسە, ۋاقىت ءتيىم­دىلىگىن قامتاماسىز ەتۋ ادەپكىدە اجەپتاۋىر سۇراق تۋىنداتتى. راس, اۋقىمدى شىعارمانى وقىپ-اياقتاۋ ءۇشىن كەمى 3-4 كۇن قاجەت دەلىك. باس-اياعى ءبىر ساعاتقا جەتەر-جەتپەس ۇزىلىستە ونى قالاي وقۋعا بولادى؟ مەكتەپ ۇجىمى وقيتىن كىتابىن ۇنەمى وزىمەن بىرگە الىپ جۇرۋگە مىندەتتەمە الدى. ولار وقۋ ساعاتى باستالعان ۋاقىتتا بارلىق جۇمىستى ىسىرىپ قويىپ, جاپپاي كىتاپ وقۋعا كىرىسەدى. بۇل ۋاقىتتىڭ ىشىندە شاعىن جانرداعى بىرنەشە پوەزيالىق, پروزالىق تۋىندىلاردى وقىپ اياقتاۋعا بولاتىنى بەلگىلى بولدى. ەڭ باستىسى, اكىمشىلىك-باسقارۋ قىزمەتكەرلەرىنەن باس­تاپ, مۇعالىمدەر مەن تەحنيكالىق قىزمەتكەرلەر, وقۋشىلار وقۋ ساعاتىنا بەلسەندى قاتىسۋعا داعدىلاندى. كىتاپحانا قىزمەتكەرلەرىنىڭ ايتۋىنشا, وقۋ ساعاتى ەنگ­ى­زىلگەننەن بەرگى ۋاقىتتا مەكتەپ كىتاپحاناسىنا كەلۋشىلەر كۇرت كوبەيىپ, الەمدىك كلاسسيكا مەن قازاق ادەبيەتى وقىرماندارىنىڭ سانى ارتا ءتۇستى. سورەلەردە سىقيىپ تۇراتىن قالىڭ كىتاپتار وقۋشىلارىن تاۋىپ, كىتاپحانالىق قوردىڭ كۇندەلىكتى اينالىمى ارتتى. مۇنىڭ ءوزى وڭتايلى ءىستىڭ وڭ ناتيجە بەرە باستاعانىن كورسەتتى. ەندىگى مىندەت – وقۋ ساعاتىن ۇيىمداستىرۋ تيىمدىلىگىن ارتتىرۋ, وقۋ ۋاقىتىن كوبەيتۋ. ءابدىماناپ تاسبولات, حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ قازاق ءتىلى مەن ادەبيەتى مۇعالىمى. شىمكەنت.