فوتو: تۇركى اكادەمياسىنىڭ ءباسپاسوز قىزمەتى
باسقوسۋعا تۇركى اكادەمياسىنىڭ پرەزيدەنتى شاھين مۇستافاەۆ, تۇرىك ءتىلى قوعامىنىڭ پرەزيدەنتى وسمان مەرت, ازەربايجان ۇلتتىق عىلىم اكادەمياسىنىڭ پرەزيدەنتى يسا گابيببەيلي, اتاتۇرىك ورتالىعىنىڭ توراعاسى نيزامي دجافاروۆ جانە تمۇ اقساقالدار كەڭەسىنىڭ مۇشەسى گاسان گاسانوۆ, سونىمەن قاتار تۇركى مەملەكەتتەرى ۇيىمىنا مۇشە ەلدەردەن جانە باقىلاۋشى مەملەكەتتەردەن كەلگەن كوميسسيا مۇشەلەرى مەن ءتىل ءبىلىمى سالاسىنداعى عىلىمي-زەرتتەۋ ينستيتۋتتارىنىڭ عالىمدارى قاتىستى.
تۇركى الەمىنىڭ ورتاق ءالىپبيى جونىندەگى كوميسسيانىڭ ەكىنشى وتىرىسىندا باۋىرلاس مەملەكەتتەردىڭ وكىلدەرى ورتاق ءالىپبي يدەياسىن ىلگەرىلەتۋ باعىتىنداعى جاڭا قادامداردى تالقىلادى.
وتىرىستىڭ اشىلۋ سالتاناتىندا ءسوز سويلەگەن شاھين مۇستافاەۆ ورتاق ءالىپبي ماسەلەسى — تۇركى حالىقتارى ىنتىماقتاستىعىنىڭ ماڭىزدى باعىتى ەكەنىن اتاپ ءوتتى.
«تۇركى الەمىنىڭ بىرلىگىن نىعايتۋ ءۇشىن ءالىپبي بىرلىگىنە دە ءمان بەرىلۋى ءتيىس. سوڭعى جىلدارى تۇركى مەملەكەتتەرى اراسىنداعى ىنتىماقتاستىق ينستيتۋتسيونالدى سيپاتقا يە بولعان سايىن, ورتاق ءالىپبي ماسەلەسى كۇن تارتىبىندە ءجيى قوزعالا باستادى», دەدى ش.مۇستافاەۆ.
ايتا كەتسەك, تۇركى مەملەكەتتەرى ۇيىمىمەن كەلىسە وتىرىپ, تۇركى اكادەمياسىنىڭ بازاسىندا جۇمىس ىستەيتىن كوميسسيا ءار تاراپتان لينگۆيستيكالىق سالاعا جاۋاپتى ەكى مۇشەنىڭ قاتىسۋىمەن قۇرىلعان بولاتىن. كوميسسيانىڭ العاشقى وتىرىسى 2023 جىلى 29 مامىردا استانا قالاسىندا ءوتىپ, بىرقاتار ماڭىزدى شەشىمدەر قابىلدانعان ەدى.
