فوتو: baq.kz
«ميگرانتتار تۋرالى جۇيەلى الەۋمەتتىك زەرتتەۋلەر جۇرگىزۋ قاجەت. ميگراتسيا – ادامداردىڭ بەي-بەرەكەت قوزعالىسىنىڭ مەحانيكالىق پروتسەسى عانا ەمەس. ول, ەڭ الدىمەن, بەيىمدەلۋ ءۇردىسى, الەۋمەتتىك جاعداي مەن ءومىر سالتىنىڭ وزگەرۋى. سوندىقتان ەڭبەك ميگرانتتارى مەن قونىس اۋدارۋشىلارعا اقپاراتتىق, زاڭنامالىق, تىلدىك, مادەني قىزمەت كورسەتەتىن ارنايى بەيىمدەۋ ورتالىقتارى بولۋى كەرەك», دەپ اتاپ ءوتتى سەناتور.
زاڭسىز ەڭبەك ميگرانتتارى ماسەلەسىنە دە نازار اۋدارعان سەناتور قانداستاردى كوشىرۋ جانە ولار ءۇشىن كۆوتالاردى ۇلعايتۋ ماسەلەسىن دە قوزعادى. دەپۋتات ەڭبەك جانە الەۋمەتتىك قورعاۋ مينيسترلىگى ازىرلەگەن «اتا جولى» كارتاسىن قانداستار مارتەبەسىمەن تەڭەستىرۋ قاجەت دەپ سانايدى.
«ەڭبەك جانە الەۋمەتتىك قورعاۋ مينيسترلىگى ازىرلەگەن «اتا جولى» كارتاسىنىڭ مۇمكىندىكتەرى زاڭدى تۇردە بەكىتىلۋى ءتيىس. بۇل كارتا ەتنيكالىق قازاقتارعا بەرىلەتىن قانداس مارتەبەسىمەن تەڭەستىرىلۋى كەرەك. قانداستارعا بەرىلەتىن كۆوتانى دا كوبەيتۋ قاجەت. ماسەلەن اقمولا وبلىسىنا بولىنگەن 285 كۆوتا قاڭتار ايىندا, رۋدنىيعا بولىنگەن 200 كۆوتا اقپان ايىندا يگەرىلىپ قويعان. قازاقستانعا كەلگەندەردىڭ باسىم بولىگى ماڭعىستاۋ وڭىرىنە تۇراقتاعانىن ەسكەرسەك, سولتۇستىككە قونىس اۋدارۋ باعدارلاماسىنا وڭتۇستىكپەن بىرگە باتىس ايماقتاردى دا قوسقان ابزال دەپ ويلايمىز. سونىمەن قاتار سولتۇستىك ءوڭىر اكىمدىكتەرى حالىق كوبىرەك كوشەتىن اۋدانداردا فرونت-وفيس تۇرىندە وكىلدىكتەر اشىپ, ءتۇسىندىرۋ جۇمىستارىن ارتتىرعانى ءجون», دەدى دارحان قىدىرالى.
