وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ينديرا كۇنباسوۆانىڭ ايتۋىنشا, ونكوگەندى ادام پاپيللوما ۆيرۋستارىنىڭ (اپۆ) بارلىعى 14 ءتۇرى بار. ولار ونكولوگيالىق اۋرۋلاردىڭ دامۋىنا اكەلەدى. ال اپۆ بار ايەلدەردە جاتىر موينى وبىرىنىڭ دامۋ ىقتيمالدىعى اپۆ جوق ايەلدەرگە قاراعاندا 6 ەسە جوعارى. 2024 جىلدىڭ ءۇشىنشى توقسانىنان باستاپ 11 جاستان 14 جاسقا دەيىنگى قىزدارعا ۆاكتسينالاۋ جۇرگىزۋ جوسپارلانىپ وتىر.
«جەتىسۋ وبلىسىنا ۆاكتسينالاردىڭ ءبىرىنشى پارتياسى قىركۇيەك ايىندا كەلەدى. سودان كەيىن ايماققا 6 مىڭ دوزا سالۋ جوسپارلانىپ وتىر. سايكەسىنشە, العاشقى ۆاكتسينالاۋ ەمشارالارى قىركۇيەك ايىندا باستالادى. قاراشا ايىندا 6 134 دوزانىڭ ەكىنشى پارتياسىن الۋ جوسپارلانعان. ايتا كەتۋ كەرەك, الەمدە بۇل ۆاكتسينالاۋعا سۇرانىس وتە جوعارى. بۇگىندە الەمنىڭ 125 ەلىندە ەكپە كۇنتىزبەسىنە ەنگىزىلگەن», دەيدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى جانەتا نۇرمانبەتوۆا.
وزدەرىڭىز بىلەتىندەي, قىزدارعا ۆاكتسينا سالۋ اتا-انالارىنىڭ كەلىسىمىن العاننان كەيىن 11 جاستان باستالادى. بۇل جاس ددۇ, ونكولوگتەردىڭ ۇسىنىستارىنا سايكەس تاڭدالادى, ويتكەنى 11-14 جاس ارالىعىنداعى ۆاكتسينالاۋ ەرەسەك جاسقا قاراعاندا ءتيىمدى. ۆاكتسينالاۋدان كەيىن جاتىر موينى وبىرىنا تۇراقتى يممۋنيتەت قالىپتاسادى.
«جەتىسۋدا جاتىر موينى وبىرى بويىنشا ديسپانسەرلىك ەسەپتە بارلىعى 553 ايەل تۇر. جىل سايىن ايەلدەر اراسىندا اۋرۋدى ەرتە ساتىسىندا انىقتاۋ ءۇشىن سكرينينگ جۇرگىزىلەدى. ماسەلەن, سوڭعى سكرينينگتىڭ ناتيجەلەرى بويىنشا 26 903 ايەل پروفيلاكتيكالىق تەكسەرۋدەن ءوتتى. ناتيجەسىندە, جاتىر موينى وبىرىنىڭ 26 جاعدايى انىقتالدى», دەيدى وبلىستىق كوپسالالى كلينيكاسىنىڭ ديرەكتورى ماديار ومىرباەۆ.
قازىر وڭىرلىك دارىگەرلەر تۇرعىندارمەن اشىق ديالوگ جۇرگىزىپ, سىرقاتىن جاسىرماۋعا شاقىرىپ وتىر. ماماندار قولدان كەلگەن كومەگىن كورسەتۋگە دايار.
جەتىسۋ وبلىسى
