فوتو: مەرەي قاينار ۇلى
جۋرناليستەر مىنگەن شاعىن اۆتوبۋس ومەش اسۋىن اسىپ, سامار اۋدانىن باسىپ, «قىزىل تۋ» وتكەلىنە كەلىپ تىرەلگەن. تىزىلگەن كولىكتەر پارومعا كەزەك كۇتىپ تۇر. كوك ايدىننىڭ ارعى جاعى – كۇرشىم.
كۇرشىم ءوڭىرىنىڭ تۇرعىندارى 1960 جىلداردان بەرى پاروممەن قاتىنايدى. قىستىڭ كۇنى مۇزدىڭ بەتىمەن جۇرەدى. بيىل جىل سوڭىندا پرەزيدەنت تاپسىرماسىمەن سالىنىپ جاتقان كوپىر قۇرىلىسى اياقتالۋى ءتيىس. ايتقانداي, كوپىر ماسەلەسى «Egemen Qazaqstan» گازەتىندە كوتەرىلىپ, مەملەكەت باسشىسى قاسىم-جومارت توقاەۆتىڭ نازارىنا ىلىنگەن.
جاعالاۋدا قايناعان تىرشىلىك. كۇرشىمگە ءا دەپ, تابانىڭىز تيسە, قاقتالعان بالىقتان ءدام تاتار ەدىڭىز...
بۇل قازاقستانداعى ەڭ ۇزىن كوپىر بولماق. قۇرىلىسشىلار قۇيعان اۋىلىنىڭ تۇسىنداعى ەڭ جىڭىشكە تۇسىنا توقتالعان. ونىڭ ءوزى – 1300 مەتر.
كوپىر قۇرىلىسىنىڭ 85 پايىزى ورىندالدى. ءۇش تىرەۋدى بۇرعىلاۋ جۇمىستارى ءجۇرىپ جاتىر. «وبلشىعىسجول» جشس مامانى نيعماتۋللا ابدۋلحاكوۆ نىساندى بيىل تاپسىرامىز دەيدى.
جۇمىسشىلاردىڭ ەندى ءبىر توبى نەگىزگى كوپىردىڭ بەتىنە ورمەك توقىعانداي ەتىپ, تۇتاستىرا ارماتۋرا تەمىر توقىپ ءجۇر.
جۋرناليستەر توبى ات باسىن كۇرشىم اۋىلىنداعى باسسەينگە بۇرعان. بۇل نىساننىڭ قۇرىلىسى قاڭتارىلىپ بىرنەشە جىل تۇرعان. قازىرگى ۋاقىتتا ماسەلە شەشىلدى. حالىققا قىزمەت كورسەتىپ تۇر.
كۇرشىم اۋدانىندا تاسقىنعا توسقىن جۇمىستارى قارقىندى جۇرگىزىلىپ جاتىر. سۋ باسۋ قاۋپى بار توپتەرەك, بىرلىك, بۋراباي اۋىلدارىنىڭ تۇسىندا بوگەتتەر سالىنعان. سونداي-اق مارالدى, ۇشبۇلاق اۋىلدارىندا جانە قالعۇتى وزەنىنىڭ بويىنا بوگەتتەر تۇرعىزىلىپ جاتىر. دايىندىق جۇمىستارى ءساۋىردىڭ 25-نە دەيىن اياقتالادى.
سونىمەن قاتار اۋدان تۇرعىندارى ءۇشىن كەرەك-جاراقپەن تولىق قامتىلعان ۋاقىتشا ەۆاكۋاتسيالىق پۋنكتەرى دايارلانعان.
كۇرشىم اۋىلىنداعى «كوۆوركينگ» ورتالىعىنا دا باس سۇقتىق. مۇندا اۋىل جاستارى ءۇشىن ءتۇرلى ءىس-شارالار ۇيىمداستىرىلىپ تۇرادى ەكەن.
جابىلىپ قالعان بەسجىلدىق اۋىلىنىڭ تامىرىنا قايتا قان جۇگىرىپ جاتىر. اۋىلعا دەيىن اسفالت توسەلدى. بالالار ويىن الاڭى سالىندى. سونداي-اق كوپبالالى وتباسىلارعا ارنالعان ۇيلەر سالىنىپ جاتىر.
وسىدان ەكى-ءۇش جىل بۇرىن «Egemen Qazaqstan» گازەتىندە جاۋعاشتى كانالىنىڭ قۇرعاپ كەتكەندىگى تۋرالى ماسەلەنى قاۋزاعان ەدىك. حالىق ۇنىنە قۇلاق اسقان اۋدان اكىمى المات اقىشەۆ بۇل ماسەلەنى دە دەرەۋ شەشكەن.
كاسىپتىڭ كوزىن تاپقاندار مەملەكەتتەن نەسيە الىپ, شارۋالارىن دوڭگەلەتىپ وتىر. ءتۇشپارا ءتۇيىپ, ناپاقا تاۋىپ جۇرگەن رايحان نۇرعازينا «اۋىل اماناتى» باعدارلاماسى بويىنشا 2,5 پايىزبەن 5 ملن تەڭگە نەسيە الىپ, كاسىبىن كەڭەيتكەن.
اۋىلدىقتاردىڭ ەندىگى تىلەگى – كوپىر. كوپىر قۇرىلىسى ۋاقتىلى اياقتالسا, كۇرشىم مەن مارقاكول اۋداندارىنا قاتىناۋ اناعۇرلىم جەڭىلدەيدى.
