سۆەتلانا جاقىپوۆا الدىمەن قوستاناي وبلىسىنىڭ اكىمى قۇمار اقساقالوۆپەن كەزدەستى. كەزدەسۋ بارىسىندا سۋ تاسقىنىنان زارداپ شەككەندەرگە قولداۋ كورسەتۋ جانە مەملەكەت باسشىسىنىڭ الەۋمەتتىك-ەڭبەك سالاسىنا قاتىستى تاپسىرمالارىن ىسكە اسىرۋ ماسەلەلەرى تالقىلاندى. اتاپ ايتقاندا, حالىقتى جۇمىسپەن قامتۋ جانە الەۋمەتتىك قولداۋ, كاسىپورىنداردا ەڭبەك قاۋىپسىزدىگى جانە ەڭبەكتى قورعاۋ, مۇگەدەكتىگى بار ادامدار ءۇشىن كەدەرگىسىز ورتا قۇرۋ جانە باسقا دا ماڭىزدى ماسەلەلەر قارالدى.
مينيستر ودان كەيىن مۇگەدەكتىگى بار ادامدارعا ارنالعان وبلىستىق وڭالتۋ ورتالىعىنا بارىپ, ارناۋلى الەۋمەتتىك قىزمەت الۋشىلارمەن جانە مەكەمەگە ۋاقىتشا ورنالاستىرىلعان سۋ تاسقىنىنان زارداپ شەككەن تۇرعىندارمەن كەزدەستى. سالا باسشىسى سۋ تاسقىنى كەزىندە بارلىق ارناۋلى الەۋمەتتىك قىزمەت كورسەتۋ ورتالىعىنىڭ قىزمەتى ەرەكشە باقىلاۋدا ەكەنىن اتاپ ءوتتى.
اتالعان وڭالتۋ ورتالىعىندا ادام تۇرمىسىنا قولايلى جاعدايدىڭ ءبارى ەسكەرىلگەن, سونداي-اق ازاماتتاردىڭ جەكە قاجەتتىلىكتەرىنە ساي ارناۋلى الەۋمەتتىك قىزمەتتەر كورسەتىلەدى. بۇل قىزمەتتەر ەرەكشە قاجەتتىلىكتەرى بار ادامداردىڭ جەكە دامۋ دەڭگەيىن ارتتىرۋعا, الەۋمەتتەنۋىنە جانە قوعاممەن ىقپالداسۋىنا باعىتتالعان.
قازىر ورتالىقتا سۋ تاسقىنىنان زارداپ شەككەن 15 ادام ۋاقىتشا تۇرىپ جاتىر. ولاردىڭ ىشىندە مۇگەدەكتىگى بار 4 ازامات بار.
«بۇل جەردە ءبىزدى جاقسى كۇتىپ الدى, ورتالىق تازا, جىلى ءارى كۇنىنە ءۇش رەت تاماقتاندىرادى. ءبارى وتە جاقسى ۇيىمداستىرىلعان, مەديتسينالىق كومەك كورسەتىلەدى», دەيدى سۋ تاسقىنىنا بايلانىستى وسىندا تۇرىپ جاتقان گالينا زاليالوۆا.
مينيستر ءوز كەزەگىندە مەديتسينالىق-الەۋمەتتىك مەكەمەلەردىڭ ۇزدىكسىز جۇمىس اتقارۋى اسا ماڭىزدى ەكەنىن اتاپ ءوتتى.
«قازىرگى ۋاقىتتا رەسپۋبليكا بويىنشا قارتتار مەن مۇگەدەكتىگى بار ادامدارعا ارنالعان ارناۋلى الەۋمەتتىك قىزمەتتەر كورسەتەتىن 118 ورتالىقتىڭ ءبارى شتاتتىق رەجىمدە جۇمىس ىستەپ جاتىر. مينيسترلىك بىرقاتار وڭىردە تج رەجىمى جاريالانعانىن ەسكەرە وتىرىپ, وسى ۇيىمدارداعى جاعدايدى جانە ولاردىڭ قىزمەتىن تۇراقتى باقىلاۋدا ۇستايدى. ازاماتتارىمىزدىڭ قاجەتتى ارناۋلى قىزمەتتەر الۋىن جالعاستىرۋ وتە ماڭىزدى», دەدى س.جاقىپوۆا.
مينيستر جۇمىس ساپارى بارىسىندا ش.قابىلباەۆ اتىنداعى ءىىم قوستاناي اكادەمياسىنىڭ عيماراتىندا ۇيىمداستىرىلعان ەۆاكۋاتسيالىق پۋنكتكە باردى. مۇندا 31 ادام ۋاقىتشا ورنالاستىرىلعان. سۋ تاسقىنىنان زارداپ شەككەندەرگە بارلىق قاجەتتى مەديتسينالىق جانە پسيحولوگيالىق كومەك كورسەتىلىپ جاتىر, كۇنىنە ءۇش رەت تاماقتاندىرىلادى, سونداي-اق ادامدار ءبىرىنشى كەزەكتە قاجەت قۇرالدارمەن قامتاماسىز ەتىلگەن.
بۇدان كەيىن مينيستر التىنسارين اۋدانىنداعى «سوسنوۆىي بور» شيپاجايىنا باردى. مۇندا مۇگەدەكتىگى بار ادامدار, زەينەتكەرلەر جانە تولىق ەمەس وتباسىلاردى قوسا العاندا, سۋ تاسقىنىنان زارداپ شەككەن 23 ادام ۋاقىتشا تۇرىپ جاتىر.
ء«بىز قازىر كۇردەلى جاعدايدى باستان وتكەرىپ جاتىرمىز. وسىعان وراي مەملەكەت تابيعي سۋ اپاتىنا قارسى كۇرەس بويىنشا بارلىق قاجەتتى ءىس-شارانى قابىلدادى. سونداي-اق زارداپ شەككەندەرگە ءتۇرلى قولداۋ شاراسى كورسەتىلىپ جاتىر. ەڭبەك جانە حالىقتى الەۋمەتتىك قورعاۋ مينيسترلىگى تج رەجىمى جاريالانعان قالالار مەن اۋدانداردا 5 مىڭنان استام وتباسىنا مەملەكەتتىك ورگاندارعا جۇگىنۋسىز-اق, اۆتوماتتى تۇردە اتاۋلى الەۋمەتتىك كومەك تاعايىندادى. سونداي-اق تج رەجىمى كەزەڭىندە بالالاردى قوسا العاندا, 4 مىڭعا جۋىق ادامنىڭ مۇگەدەكتىكتى قايتا كۋالاندىرۋ مەرزىمدەرى اۆتوماتتى تۇردە ۇزارتىلدى. مۇگەدەكتىگى بويىنشا جاردەماقى تولەۋ بۇرىن بەلگىلەنگەن توپ بويىنشا جۇزەگە اسىرىلادى. كاسىپوداقتار فەدەراتسياسىمەن بىرلەسىپ, رەسپۋبليكانىڭ 7 شيپاجايىندا سۋ تاسقىنىنان زارداپ شەككەن الەۋمەتتىك وسال ساناتتارعا جاتاتىن ازاماتتارعا ۋاقىتشا تۇرۋ جانە ساۋىقتىرۋ مۇمكىندىگى بەرىلدى», دەدى س.جاقىپوۆا.
وبلىس اكىمدىگىنىڭ مالىمەتىنشە, وڭىردە سۋ تاسقىنى كەزىندە 9 114 ادام ەۆاكۋاتسيالانىپ, 181 ادام ۋاقىتشا ورنالاستىرۋ پۋنكتتەرىندە قونىستانعان.
قوستاناي وبلىسى
