«پرەزيدەنتكە سۋ تاسقىنى كەزىندە قوستاناي وبلىسىنىڭ ۆولونتەرلەرى قانداي جۇمىس اتقارعانى تۋرالى باياندادىم. قاسىم-جومارت كەمەل ۇلى: «ەڭبەكتەرىڭدى ەستىپ, كورىپ جاتىرمىن, بارىڭە ريزامىن دەپ وڭ باعاسىن بەردى. بارىنە سالەم ايت», دەدى. مەملەكەت باسشىسىنىڭ قيىن-قىستاۋ كەزەڭدە ءىستىڭ باسىنان, كوپتىڭ قاسىنان تابىلعان ەرىكتى جاستارعا ەرەكشە ريزا ەكەنى بايقالدى», دەيدى ايبەك.
ايبەك تاڭاتباەۆ قوستانايداعى «قوعامدىق كەلىسىم» ۇيىندە باس ساراپشى بولىپ قىزمەت ەتەدى. ۇنەمى وبلىستىق اسسامبلەيانىڭ ۇيىمداستىرۋىمەن ءوتىپ جاتاتىن يگى ءىس-شارالاردىڭ باسى-قاسىنان تابىلادى. بەلسەندى ازامات 26 ناۋرىزدا ءوزىنىڭ كىندىك قانى تامعان امانگەلدىنى تاسقىن سۋ باسىپ جاتىر دەگەندى ەستي سالا, باسشىلارىنان سۇرانىپ, اۋىلعا اتتانعان. سودان بەرى, مىنە, 20 كۇننەن استى, امانگەلدى اۋدانىندا ءجۇر. ءاۋ باستا اۋداننىڭ بەلسەندى جاستارىن ۇيىمداستىرىپ, انتالاعان سۋدىڭ الدىن بوگەۋگە شاپقىلاپ ءجۇردى. ەندى سۋ كەتىپ, قاۋىپتىڭ بەتى قايتقان سوڭ, جانىنداعى جاستارمەن بىرگە تابيعي اپاتتىڭ زارداپتارىن جويۋعا كومەكتەسىپ جاتىر.
ايبەك سياقتى الىس قالاداعى جۇمىسىن تاستاپ, سۋ باسىپ جاتقان تۋعان اۋىلىنا جانۇشىرا كومەككە ۇمتىلعان جاستار قانشاما؟ وعان اۋىلدىڭ تۇرعىلىقتى جاستارىن قوسىڭىز. ماسەلەن, ەلدى مەكەندەرگە تاسقىن سۋ ەكپىندەپ كىرىپ جاتقاندا ءبىر عانا امانگەلدى اۋدانىنىڭ وزىندە رەسمي تۇردە 400-گە جۋىق ۆولونتەر تىركەلىپتى. تىركەلمەگەنى قانشاما؟
«تۋعان جەرىمدى تاسقىن سۋ باسىپ جاتىر دەگەندى ەستىپ, قوستانايدا وتىرا المادىم. اۋىلعا بارا سالىسىمەن اۋداننىڭ بەلسەندى جاستارىنىڭ باسىن قوسىپ, بىردەن ۆولونتەرلىك شتاب اشتىم. اۋدان اكىمدىگى كىتاپحانا عيماراتى مەن ستاديوندى بەردى. ودان كەيىن شتاب جۇمىسىنىڭ 4 باعىتىن ايقىنداپ الدىق. ءبىرىنشى باعىت بويىنشا اۋىل ازاماتتارىنان قۇرىلعان قول كۇشى سۋدىڭ الدىن بوگەۋ جۇمىستارىنا كىرىستى. ەكىنشى, ەڭبەك ادامدارى مەحانيزاتورلار مەن تراكتورشىلار, اۋىر جۇك كولىگىنىڭ جۇرگىزۋشىلەرى بىرىگىپ, تەحنيكا كۇشىمەن قۇم, كۇل توكتى. ال قىزدار, اپكەلەرىمىز, اپالارىمىز ىستىق تاماق, كوجە, شاي ۇيىمداستىرىپ, ەۆاكۋاتسيالانعان تۇرعىنداردى, الىستان گۋمانيتارلىق كومەك اكەلگەن جۇرگىزۋشىلەردى, قۇتقارۋشىلاردى تاماقتاندىرىپ وتىردى. ءتورتىنشى باعىت بويىنشا گۋمانيتارلىق كومەك رەتىندە كەلگەن ازىق-ت ۇلىك, ىستىق تاماق, كيىم-كەشەك, اياق-كيىم, قاپتار مەن قۇرال-سايمانداردى سۇرىپتاپ, ەلگە شۇعىل تاراتىپ وتىردىق. ءبىزدىڭ قاتارىمىز بىردەن كوبەيىپ كەتتى. ۆولونتەرلەردى جاس, كارى دەپ بولۋگە بولمايدى, قاتارىمىزدا جاس تا, كارى دە ءجۇردى. مىسالى, 74 جاستاعى ءبىر اجەمىز كۇن سايىن ىستىق كوجەسىن قايناتىپ, باۋىرساعىن ءپىسىرىپ دالادا جۇمىس ىستەپ جاتقاندارعا تاراتتى. مەكتەپتى سۋ باسىپ جاتقاندا ونى بوگەۋگە قانشاما جىگىتتەر اتسالىستى. سولاردىڭ ەڭبەگىنىڭ ارقاسىندا التىن ۇيا مەكتەبىمىزدى امان الىپ قالدىق. سول ازاماتتارعا دەگەن العىسىم شەكسىز. ءالى كۇنگە دەيىن جۇمىس جۇرگىزىپ جاتىرمىز. كەشە قوستانايعا كەلە سالىپ ءبىر جۇك كولىگىمەن كەلگەن گۋمانيتارلىق كومەكتى قابىلداپ, اۋىلعا جىبەردىم. امانگەلدى اۋدانىندا رەسمي تۇردە تىركەلگەن 394 ۆولونتەر جۇمىس ىستەدى. قازىر جاعداي دۇرىستالعان سوڭ, گۋمانيتارلىق شتابتا 30 ۆولونتەر قالدى. جۇك كەلگەن كەزدە ءتۇسىرىپ, سۇرىپتاپ, ەلگە تاراتۋ ءۇشىن تاعى 20 ۆولونتەر شاقىرامىز», دەيدى امانگەلدى اۋدانىنداعى ۆولونتەرلەر شتابىنىڭ باسشىسى ا.تاڭاتباەۆ.
قازىر اۋدانداعى جاعداي ءبىرشاما تۇراقتالىپ قالدى. بىراق ولگەن مال كوپ. ەۆاكۋاتسيادان كەيىن اۋىلعا ورالعان جۇرت ۆەتەرينار ماماندار جەتىسپەگەندىكتەن ولگەن مالىن وزدەرى اۋلاققا اپارىپ, ورتەپ, كومىپ جاتىر. مۇنداي ىسكە اربا, رەسپيراتورلىق ماسكا, قولعاپ, رەزەڭكە ەتىك, وزگە دە زاتتار كەرەك. قوستانايعا وسى دۇنيەلەر ءۇشىن كەلگەن ايبەك كەشە عانا كەرەگىن تاۋىپ, جۇك كولىگىنە تيەپ, امانگەلدىگە جىبەرگەن. ەرتەڭ ەلگە تاراتادى. مۇنىڭ سىرتىندا, قازىر امانگەلدى اۋدانى بويىنشا 11 اۋىل جارىقسىز وتىر. سوندىقتان اۋداندىق ۆولونتەرلەر شتابى قوسىمشا دەمەۋشىلەر تاۋىپ, جارىقسىز وتىرعان اۋىلدارعا ەلەكتر گەنەراتورلارىن جىبەرىپ جاتىر.
ۆولونتەرلىك شتاب سۋ تاسقىنى كەزىندە وبلىس اكىمىمەن تىكەلەي بايلانىس جاساپ وتىردى. ەل ءىشى بولعان سوڭ, كەيبىر شەندى-شەكپەندىلەر ەرىكتىلەر شتابىنا قىسىم كورسەتىپ, گۋمانيتارلىق كومەك رەتىندە كەلىپ جاتقان موتورلى قايىق, كيىز ءۇي سياقتى ەڭ كەرەك دۇنيەلەردى ءوز جاقىندارىنا الىپ بەرگىسى كەلگەن جاعداي بولعان. الايدا ايبەك مۇندايلارعا جول بەرمەي, حالىققا ءادىل ءبولىپ بەرەمىز دەگەن قاتاڭ تالابىنان تايمادى. «ەگەر مۇنداي قىسىم جالعاساتىن بولسا, الەۋمەتتىك جەلى ارقىلى بىردەن وبلىس اكىمىنە ۇندەۋ جولدايمىن» دەپ الگىندەي پىسىقايلاردى تىيىپ تاستادى. قابىلداۋ-جىبەرۋ اكتىسىن جاساپ, كەلىپ جاتقان تەبەنگە دەيىن قۇجاتقا تىركەپ وتىردى. وسىنىڭ ناتيجەسىندە, كيىز ءۇي, ەلەكتر گەنەراتورى ءتارىزدى قۇندى دۇنيەلەردىڭ ءبارى ايبەكتىڭ قاتاڭ تارتىبىنە سايكەس تەگىس حالىققا تەگىن تاراتىلدى.
«تەك امانگەلدىنىڭ عانا ەمەس, ىرگەلەس جاتقان جانگەلدين اۋدانىنىڭ 7 اۋىلىنا كومەكتەستىك. وزىمىزگە جەتەتىن بولعان سوڭ, بىزگە كەلگەن گۋمانيتارلىق كولىكتى ازىق-ت ۇلىك جەتپەي جاتقان جانگەلدين اۋدانىنا جىبەردىك. جاعداي تۇراقتالعان سوڭ, ءتورت كۇننەن كەيىن جيىرماعا جۋىق ۆولونتەردىڭ باسىن بىرىكتىرىپ, جانارمايىن, تاماعىن, قاپشىق-كۇرەكتەرىن بەرىپ تورعايعا كومەككە جىبەردىك. بۇل جەردە جالپى جىگىتتەردىڭ ەڭبەگىن كورسەتۋ كەرەك. مەن بۇل جەردە جاي عانا جوسپار جاساپ, باعدار بەرىپ وتىراتىن ۇيلەستىرۋشى, ۇيىمداستىرۋشى عانامىن. تجد-مەن دە تىعىز بايلانىستا جۇمىس جۇرگىزدىك. دەر كەزىندە قايىق, تىكۇشاق ۇيىمداستىردىق. وسىلايشا, ءبارىمىز بىرىگىپ قيىندىقتى ەڭسەردىك. مۇنداي جاعدايدا ەڭ الدىمەن بىرلىك كەرەك», دەيدى ايبەك.
قوستاناي وبلىسى
