«پاتەرگە كوشكىسى كەلەتىندەرگە پاتەر ساتىپ الىپ بەرەمىز. ءوز قونىسىندا قالعىسى كەلگەندەرگە تيپتىك ۇلگىدەگى ۇيلەر سالامىز. مۇنداي ۇيلەردىڭ جوباسى دايىن. بۇل ۇيلەر قىسقا دەيىن تولىقتاي سالىنىپ بىتەدى. مەن ۇكىمەتكە الداعى جاز مەزگىلىندە, سونداي-اق كۇزدە بارلىق قۇرىلىس جۇمىستارىن ءبىتىرۋ جانە اپات سالدارىن تولىق جويۋ جونىندە مىندەت جۇكتەدىم», دەگەن پرەزيدەنت سوزىنەن كەيىن ەندى ەس جيا باستاعان ەلدىڭ ەڭسەسى كوتەرىلىپ قالعانى راس.
پرەزيدەنت تاپسىرماسى اياسىنداعى جەدەل ءىس-شارالار وڭىردە جۇيەلى تۇردە قولعا الىنىپ, ىسكە اسىرىلىپ جاتىر. مىسالى, ارقالىق قالاسىندا جۇمىس ىستەپ جاتقان ارنايى كوميسسيا 73 ءۇيدى تۇرۋعا جارامسىز, قالپىنا كەلتىرۋگە بولمايدى دەپ تاپقان. سونىمەن قاتار سۋ تاسقىنى كەزىندە باسپاناسىز قالعاندارعا ارنالىپ 27 پاتەر ساتىپ الۋعا رەسپۋبليكالىق ترانسفەرت ارقىلى 405 ملن تەڭگە قارجى ءبولىندى. قازىردىڭ وزىندە ارقالىق قالاسىنا قونىس اۋدارۋعا نيەت بىلدىرگەن ەكىدىڭ, قىزىلجۇلدىز ەلدى مەكەندەرىنىڭ تۇرعىندارى ءۇشىن 317 ملن 183 مىڭ تەڭگەگە 24 پاتەر ساتىپ الۋعا كەلىسىمشارت جاسالعان.
بۇل پاتەرلەردىڭ بىرىنە بۇرىنعى ەكىدىڭ اۋىلىنىڭ تۇرعىنى, زەينەتكەر ساعيرا احمەتجاننىڭ وتباسى قونىستاندى. ساعيرا اپايعا ەكى بولمەلى پاتەرىنىڭ كىلتىن قالا اكىمى ءامىرحان اسانوۆ تابىس ەتىپ, جەدەل شتابقا كەلىپ تۇسكەن گۋمانيتارلىق كومەكتەن ازىق-ت ۇلىك, توسەك-ورىن, باسقا دا كەرەكتى جيھازداردى كىرگىزىپ بەردى.
قۋانىشتىڭ كوز جاسىن جاسىرا الماعان ساعيرا اپا: «مەن وتباسىم دالادا قالعانداي كۇي كەشكەن قيىن ساتتە كومەك قولىن سوزىپ, قامقورلىعىنا العان مەملەكەت باسشىسىنا, قالا اكىمدىگىنە وتە ريزامىن. پاتەر كۇردەلى جوندەۋدەن وتكەن, ءتىپتى جيھازعا دەيىن اكەلىپ, ورىن-ورنىنا ورنالاستىرىپ بەرىپ جاتىر», دەيدى.
ارقالىق قالاسىنا كوشۋگە نيەت بىلدىرگەن ەكىدىڭ جانە قىزىلجۇلدىز اۋىلدارىنان بارلىعى 24 وتباسى ءۇشىن پاتەر ساتىپ الۋعا 24 ءوتىنىش ءتۇستى. قۇرىلىس سالۋشىلارمەن 317 ملن 183 مىڭ تەڭگە سوماسىنا 24 شارت جاسالدى, ولار بۇگىن شوتتارعا تۇسەدى.
ارقالىق قالاسىنان وزگە اۋدانداردا دا سۋ تاسقىنى سالدارىن جويۋ, ونىڭ ىشىندە ب ۇلىنگەن م ۇلىك, زاقىم كەلگەن تۇرعىن ۇيلەر تەحنيكالىق تەكسەرۋدەن ءوتىپ, شىعىن مولشەرىن باعالاۋ جۇمىستارى ءجۇرىپ جاتىر.
زارداپ شەككەندەرگە تۇرعىن ۇيلەرىن قالپىنا كەلتىرۋ ءۇشىن اقشالاي قاراجات تۇرىندە وتەماقى تولەنەدى. تۇرعىن ءۇيى اپاتتى جاعدايدا تۇرعان جانە قالپىنا كەلتىرۋگە بولمايتىن مەنشىك يەلەرىنە تۇرعىن ءۇي ساتىپ الۋعا نەمەسە اۋدانى 80 شارشى مەتر بولاتىن تيپتىك جوباداعى جاڭا ءۇي ساتىپ الۋعا وتەماقى بەرىلەدى.
وبلىس اكىمدىگىنىڭ مالىمەتىنشە, بۇگىنگە دەيىن بىرنەشە اۋداندا جۇمىس ىستەپ جاتقان ارنايى كوميسسيالار ۇزىن-ىرعاسى 367 تۇرعىن ءۇيدى تەكسەرىپ شىققان. كوميسسيا 163 ءۇيدى قالپىنا كەلتىرۋگە بولادى دەگەن ۇيعارىم جاساپ وتىر. ال 204 ءۇي مۇلدە قالپىنا كەلمەيدى.
«مىسالى, امانگەلدى اۋدانىندا 100 ءۇي زەرتتەلدى. ونىڭ 61-ءى قالپىنا كەلتىرۋگە جارامايدى, 39 ءۇي جوندەۋدى قاجەت ەتەدى. جانگەلدين اۋدانىندا 84 ءۇي زەرتتەلدى, ونىڭ 67-ءسى قۇلاعالى تۇر, 17 ۇيگە جوندەۋ جۇمىستارىن جۇرگىزۋگە بولادى. ارقالىق قالاسىندا تەكسەرىلگەن 183 ءۇيدىڭ 107-سىنە عانا جوندەۋ جۇرگىزۋگە بولادى, قالعان 76-سىن ءسۇرىپ تاستاعاننان باسقا امال جوق», دەيدى كوميسسيا وكىلدەرى.
قوستاناي وبلىسى
