شەتەلدىك ينۆەستورلار نەگىزىنەن ماشينا جاساۋ سالاسىنا, ەگىنشىلىك پەن مال شارۋاشىلىعىنا قارجى سالۋعا نيەتتى. وڭىردە ىسكە اسقان ءىرى جوبانىڭ ءبىرى – قۇنى 50 ملن دوللار بولاتىن بۇرشاق داقىلدارىن وڭدەيتىن فابريكا.
بىلتىر كۇزدە عانا تۇركيانىڭ «Arbel» حالىقارالىق حولدينگىنىڭ قارجىسىنا سالىنعان فابريكا وتاندىق ءونىمدى حالىقارالىق نارىققا شىعارۋمەن قاتار, بۇگىندە وڭىردەگى بۇرشاق داقىلدارى القابىنىڭ كەڭەيە تۇسۋىنە دە ەداۋىر سەرپىن بەرىپ وتىر. وبلىستىق اۋىل شارۋاشىلىعى باسقارماسىنىڭ مالىمەتىنشە, بيىل شارۋاشىلىقتاردىڭ كوبى القابىنىڭ ەداۋىر بولىگىنە بۇرشاق تۇقىمىن سەبۋدى جوسپارلاپ وتىر.
«Kaizen» جشس بۇرشاق, نوقات, قىزىل جانە جاسىل جاسىمىق ءتارىزدى بۇرشاق داقىلدارىن وڭدەيدى. شيكىزاتتى قوستاناي, سولتۇستىك قازاقستان, شىعىس قازاقستان, اقمولا, اقتوبە وبلىستارىنان ساتىپ الىپ وتىر. الايدا اتالعان وڭىرلەر فابريكانىڭ سۇرانىسىن جەتكىلىكتى تۇردە وتەي المايتىنىن دا ايتا كەتۋ كەرەك. سوندىقتان «Kaizen» جشس جەرگىلىكتى اگرارلىق كومپانيالاردىڭ بۇرشاق وسىرۋگە دەگەن ىنتاسىن ارتتىرۋ جاعىن قاراستىرىپ جاتىر. فابريكا قازىردىڭ وزىندە بىرقاتار شارۋاشىلىققا كومەك رەتىندە تۇركيادان تۇقىم جەتكىزىپ بەرەدى. كاسىپورىن الداعى ۋاقىتتا كانادادان بۇرشاق داقىلدارىنىڭ تۇقىمىن, سولتۇستىك امەريكادان جاسىل جانە قىزىل جاسىمىق تۇقىمىن الدىرتپاق. تاۋلىگىنە 520 تونناعا دەيىن ءونىم وندىرە الاتىن كاسىپورىندا 50 ادام جۇمىس ىستەپ جاتىر. ءونىمىنىڭ كوبىن شەتەلگە ەكسپورتتاپ جاتقان ءوندىرىس ورنى الداعى ءۇش جىل ىشىندە تاۋار اينالىمىن 170 ملن دوللاعا جەتكىزۋدى جوسپارلاپ قويعان.
«ازىرگە جىلىنا 170 مىڭ توننا ءونىم شىعارامىز. نەگىزىنەن اۋعانستانعا بۇرشاق جونەلتىپ جاتىرمىز. كاسىپورىن ءوندىرىس قۋاتىنا تولىق كوشكەن سوڭ, ءۇندىستان, بانگلادەش, وڭتۇستىك افريكا, يران, تۇركيا, سونداي-اق شىعىس ازيا ەلدەرىنە ءونىم جىبەرۋدى كوزدەپ وتىرمىز. وكىنىشكە قاراي, بۇگىنگە دەيىن ەلىمىزدە بۇرشاق وسىرۋگە اسا ءمان بەرىلمەي كەلدى. ءبىزدىڭ الدىمىزدا وسى كەمشىلىكتىڭ ورنىن تولتىرۋ مىندەتى تۇر. بۇرشاق داقىلىن بارىنشا ناسيحاتتاۋعا تىرىسامىز. شيكىزاتتى قازىر بۇكىل قازاقستان اۋماعىنان ساتىپ الىپ جاتىرمىز. ەڭ باستىسى, وتاندىق شيكىزاتتى وڭدەيمىز, بۇل سول شيكىزاتتى ءوسىرىپ جاتقان جەرگىلىكتى شارۋالارعا دا جاقسى. ولار وزدەرى وسىرگەن ءونىمدى لايىقتى باعامەن ساتىپ الاتىن ناقتى كاسىپورىننىڭ بار ەكەنىن بىلە باستادى. سوندىقتان شاماسى جەتكەندەرى القابىن ءارتاراپتاندىرىپ, ەرتەڭ بۇل ءونىمدى وتكىزە الام با دەپ الاڭداماي بۇرشاق وسىرۋگە دەن قويىپ جاتىر», دەدى بۇرشاق داقىلدارىن وڭدەۋ فابريكاسىنىڭ ديرەكتورى نۇرلان ەسەتوۆ.
كاسىپورىننىڭ 9 مىڭ توننا شيكىزات سىياتىن قويماسى بار. بيىل تاعى وسىنداي مولشەردە شيكىزات ساقتايتىن جاڭا قويمانىڭ قۇرىلىسى اياقتالادى. قازىر ءوندىرىس ورنىندا 50 ادام جۇمىس ىستەپ جاتىر. جاڭا قويما پايدالانۋعا بەرىلگەن سوڭ, قوسىمشا تاعى 20 جۇمىسشى قاجەت بولادى. كاسىپورىن وزىنە جۇكتەلىپ وتىرعان الەۋمەتتىك مىندەتتى دە جەتە سەزىنەدى. ويتكەنى ءوزى دە مەملەكەت تاراپىنان ۇلكەن قولداۋ كورىپ وتىر.
«مۇنداي ىلكىمدى جوبا قوستاناي وبلىسىنىڭ اكىمدىگى مەن «Kazakh Invest» ۇلتتىق كومپانياسىنىڭ وڭىرلىك وكىلدىگىنىڭ كومەگىمەن ىسكە اسىرىلعانىن ايتا كەتۋ كەرەك. وبلىس اكىمدىگى ينفراقۇرىلىمدى دامىتۋ تۇرعىسىنان ۇلكەن كومەك كورسەتتى. جول سالدى. گاز قۇبىرىن تارتىپ بەردى. كاسىپكەرلىك اياسىن كەڭەيتىپ جاتقان شەتەلدىك كومپانيالار ءۇشىن كەز كەلگەن ەلدە مۇنداي قولايلى ينۆەستيتسيالىق جاعداي جاسالا بەرمەيدى. مۇنى ءبىز جاقسى تۇسىنەمىز جانە قازاقستان ەكونوميكاسىنىڭ دامي تۇسۋىنە ءوز ۇلەسىمىزدى قوسا الاتىنىمىزعا سەنىمدىمىن», دەيدى «Kaizen» سەرىكتەستىگىنىڭ باسشىسى.
وڭىرگە شەتەلدەن, سونىمەن قاتار ەلىمىزدىڭ وزگە دە وڭىرلەرىنەن ينۆەستيتسيا تارتۋمەن اينالىساتىن «Kazakh Invest» ۇلتتىق كومپانياسى وڭىرلىك وكىلدىگىنىڭ ديرەكتورى رومان تەڭىزباەۆتىڭ ايتۋىنشا, اتالعان جوبانىڭ جۇزەگە اسىرىلۋىنا قازاقستان مەن تۇركيا ەلشىلىكتەرىنىڭ ىنتىماقتى قارىم-قاتىناسى دا كوپ ىقپال ەتكەن.
«الدىن الا كوپتەگەن ەكىجاقتى كەلىسىم, جيىن, كەزدەسۋ ءوتتى. ءبىز ءوز تاراپىمىزدان ينۆەستورعا قانداي مەملەكەتتىك قولداۋ كورسەتىلەتىنىن تۇسىندىردىك. ودان كەيىن تۇركيادان ارنايى دەلەگاتسيا كەلىپ, وبلىس باسشىلىعىمەن, جەرگىلىكتى فەرمەرلەرمەن كەزدەستى. يندۋستريالىق ايماقتى ارالاپ كوردى. ناتيجەسىندە, وزدەرىڭىز كورىپ تۇرعان بۇرشاق وڭدەۋ فابريكاسى ىسكە قوسىلدى. ينۆەستورلار براۋنفيلد نەمەسە گرينفيلد ءتاسىلىن تاڭداۋعا ەرىكتى. باسقاشا ايتقاندا, بۇرىننان تۇرعان ءوندىرىس عيماراتتارىن قاجەتىنە جاراتا الادى نەمەسە جەر تەلىمى بەرىلەدى. قالاسا, دايىن الاڭمەن قامتاماسىز ەتەمىز. يندۋستريالدى ايماقتىڭ ينفراقۇرىلىمى تۇگەلدەي وبلىستىق بيۋدجەت ەسەبىنەن جاسالدى. ينۆەستور ءۇشىن ونىڭ ءبارى تەگىن ءارى قولايلى. مۇنىڭ سىرتىندا, ءبىزدىڭ تاراپىمىزدان, سونداي-اق جەرگىلىكتى اتقارۋشى بيلىك تاراپىنان بارىنشا قولداۋ كورسەتىلەدى. قوستاناي وبلىسى شەكارالىق ايماقتا جاتقاندىقتان تۇتىنۋ نارىعى 25 ملن ادامنان جوعارى. بۇل دا ينۆەستور ءۇشىن وتە ءتيىمدى. بىلىكتى ماماندار دا وڭاي تابىلادى. سوندىقتان بىزدە قازىر رەسەي, تۇركيا, قىتاي, وزبەكستان سەكىلدى كوپتەگەن ەلدەن كەلگەن ينۆەستورلار جاقسى جۇمىس ىستەپ جاتىر», دەيدى رومان تەڭىزباەۆ.
«Kazakh Invest» ۇلتتىق كومپانياسى ماماندارىنىڭ ايتۋىنشا, بۇگىندە ءوڭىر ەكونوميكاسىنىڭ ءتۇرلى سالاسىندا ەلۋدەن استام جوبا جۇزەگە اسىرىلىپ جاتىر. اقپان ايىندا قۇرىلعان وڭىرگە ينۆەستيتسيا تارتۋ جونىندەگى كەڭەس تە ايماق ەكونوميكاسىنا قان جۇگىرتەتىن قۇرىلىمعا اينالماق. كەڭەس قۇرامىنا پروكۋراتۋرا, ۇلتتىق قاۋىپسىزدىك ورگاندارى مەن مەملەكەتتىك كىرىس قىزمەتكەرلەرى, سونداي-اق جەرگىلىكتى اتقارۋشى ورىنداردىڭ وكىلدەرى كىرەدى.
«كەڭەستىڭ باستى مىندەتى – اكىمشىلىك كەدەرگىلەردى جويۋعا جانە وڭىرگە ينۆەستيتسيالار تارتۋعا مۇددەلى مەملەكەتتىك ورگانداردىڭ جۇمىسىن ۇيلەستىرۋ. سونىمەن قاتار ينۆەستيتسيالىق جوبالاردى ىسكە اسىرۋ بارىسىندا تۋىندايتىن قيىن ماسەلەلەر مەن كەيستەر تالقىلانادى. ولاردى شەشۋ ءۇشىن ۇسىنىستار ازىرلەنەدى», دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ ءبولىم باسشىسى ناۋرىز بايجانوۆ.
قوستاناي وبلىسى
