ءابدىراحمان اۋلەتىندە دۇنيەگە كەلگەن ۇشەمنىڭ بىرەۋى – قىز, ەكەۋى – ۇل. پەرزەنتحانادان جاڭا شىققان باتىر انا اقشاگۇل ءابدىراحمانوۆانى قوستاناي قالاسىنىڭ اكىمى مارات جۇندىباەۆ تا ارنايى قۇتتىقتاي كەلىپ, وڭىرگە بەلگىلى اتىمتاي كاسىپكەر, «بك-ستروي» قۇرىلىس كومپانياسىنىڭ باس ديرەكتورى يگور كيمنىڭ اتىنان ءۇش بولمەلى پاتەردىڭ كىلتىن تابىس ەتتى.
«ۇشەمنىڭ دۇنيەگە كەلۋى – قوستانايلىقتار ءۇشىن ۇلكەن وقيعا. پەرزەنتحانادان قاسيەتتى ورازا ايت كۇنى شىعىپ جاتقاندارىڭىز دا – جاقسىلىقتىڭ نىشانى. ءبىز كەشە عانا بۇكىل قالا تۇرعىندارى جابىلىپ ءجۇرىپ تاسقىن سۋدان باس كوپىرىمىزدى امان الىپ قالدىق. بۇگىن, مىنە, ۇشەم دۇنيەگە كەلدى دەگەن قۋانىشتى حاباردى ەستىپ, پەرزەنتحاناعا شاۋىپ كەلدىك. ءۇش بىردەي نارەستەنىڭ ءبىر كۇندە ءبىر وتباسىندا دۇنيەگە كەلۋىن جاقسىلىققا جوريىق, بۇل – قيىن كۇندەردىڭ كەلمەسكە كەتىپ, جاڭا ءومىردىڭ باستالىپ جاتقانىن بىلدىرەدى. «بك-ستروي» قۇرىلىس كومپانياسىنىڭ باسشىسى يگور كيم دە سىزدەردىڭ اۋلەتتە بولىپ جاتقان قۋانىشتى حاباردى ەستي سالا, ماعان 109 شارشى مەترلىك, جوندەۋدەن وتكەن 3 بولمەلى پاتەردىڭ كىلتىن تابىس ەتۋدى اماناتتادى. ول پاتەرگە بۇگىن كوشىپ بارساڭىزدار دا بولادى, ءبارى دايىن تۇر», دەدى قالا اكىمى.
قالا اكىمى قىزىل بارقىت قوراپشاداعى پاتەر كىلتىن وتاعاسى جاراستىڭ قولىنا ۇستاتتى.
«جاڭا تۋعان بالالاردىڭ اتىن ايارۋ, اردان, ارلان دەپ قويدىق. ءوزىمىز بۇعان دەيىن دە 5 بالا تاربيەلەپ وتىر ەدىك, جۇبايىم ەندى بىردەن 8 بالانىڭ اناسى اتانىپ, باتىر انا بولىپ شىعا كەلدى. 2020 جىلى مەملەكەت 58 شارشى مەترلىك جالدامالى پاتەر بەرگەن. ەندى مىنە, كۇتپەگەن جەردەن ودان ەكى ەسە كەڭ پاتەرگە كىرەتىن بولىپ وتىرمىز. قۋانىشىمىزدا شەك جوق. قالا اكىمى مارات جۇندىباەۆ پەن «بك-ستروي» كومپانياسىنىڭ باسشىسى يگور كيم مىرزاعا العىسىمىز شەكسىز. ءبىزدىڭ وتباسىمىزداعى قۋانىش كوپكە جۇعىستى بولسىن», دەيدى ۇشەمنىڭ اكەسى جاراس ءابدىراحمانوۆ.
قوستانايداعى وبلىستىق اۋرۋحانانىڭ پەريناتالدىق ورتالىعىندا كەيىنگى 10 جىل ىشىندە وسىمەن ءۇشىنشى رەت ۇشەم دۇنيەگە كەلىپ وتىر.
قوستاناي وبلىسى
