وبلىس ورتالىعى مەن قاراسۋ, قوستاناي اۋداندارىندا دا ارنايى كوميسسيا قۇرىلىپ, زارداپ شەككەن تۇرعىنداردان ءوتىنىش قابىلداپ جاتىر. وڭىرلىك جەدەل شتاب وبلىس اۋماعىنداعى سۋ قويمالارىنىڭ دەڭگەيىن ساعات سايىن ولشەپ, وزەندەردى ءجىتى باقىلاپ وتىر. ايماقتاعى ءىرى سۋ قويمالارىنىڭ ءبارى تولعان.
«بۇرىن-سوڭدى بولماعان جويقىن سۋ تاسقىنى كەزىندە وبلىس اۋماعىنداعى نەگىزگى بوگەتتەردىڭ ەشقايسىسى بۇزىلعان جوق. قازىرگى تاڭدا قاراتومار سۋ قويماسىنان اعىپ جاتقان سۋدىڭ مولشەرى سەكۋندىنا 900 تەكشە مەترگە دەيىن ءتۇستى», دەپ مالىمدەدى وبلىستىق جەدەل شتاب وكىلدەرى.
توبىل وزەنى مەن ءتىنتۋىر وزەندەرى بويىنان ەۆاكۋاتسيالانعان 9 099 ادامنىڭ 325-ءى ۋاقىتشا ورنالاستىرۋ پۋنكتتەرىندە جاتىر. قالعانى تۋىستارىنىڭ ۇيىنە ورنالاسقان.
امانگەلدى جانە جانكەلدين اۋداندارىنا قاراستى ءبىرتالاي ەلدى مەكەن جارىقسىز وتىر. ماسەلەن, امانگەلدى اۋدانىنداعى ۇرپەك اۋىلىنىڭ جارىقسىز وتىرعانىنا ەكى اپتاداي بولىپ قالدى. اۋدان ورتالىعىمەن ىرگەلەس جاتقانىنا قاراماستان, كۇنى بۇگىنگە دەيىن بۇل ەلدى مەكەنگە كولىك قاتىناسى جوق. اۋدان اكىمدىگىنىڭ مالىمەتىنشە, تاسقىن سۋ 120-دان اسا ەلەكتر باعانىن قۇلاتىپ كەتكەن. جان-جاقتى تۇگەل سۋ باسىپ جاتقاندىقتان, سۋ استىنداعى باعانداردى تۇرعىزىپ, ەلەكتر سىمىن جالعاۋ جۇمىستارى ىلگەرىلەمەي تۇر. اۋىلدا ەلەكتر جارىعى بولماعان سوڭ, اۋىزسۋ دا تاپشى, جەرگىلىكتى ناۋبايحانا دا جۇمىسىن توقتاتقان. اتالعان اۋداندا ۇرپەكتەن باسقا دا ءبىرتالاي ەلدى مەكەن ءبىرازدان بەرى جارىقسىز, بايلانىسسىز وتىر.
«قازىرگى تاڭدا گۋمانيتارلىق كومەكپەن كەلگەن گەنەراتورلاردى وسى جاقتارعا ۇلەستىرىپ جاتىرمىز. بۇل زاتتار توتەنشە جاعدايلار ءبولىمىنىڭ ماماندارى ارقىلى ارنايى تىكۇشاق, قايىقتارمەن جونەلتىلەدى. كۇنى كەشە عانا «بىز بىرگەمىز» ۇيىمىنان تاعى 80 گەنەراتور كەلدى», دەيدى سۋ تاسقىنى باستالعاننان بەرى سول جاقتاعى ۆولونتەرلەر شتابىنىڭ جۇمىسىن باسقارىپ جۇرگەن ايبەك تاڭاتباەۆ.
جانكەلدين اۋدانىنا قاراستى اقكول, احمەت بايتۇرسىن ۇلى, سارىسۋ, قىزبەل ەلدى مەكەندەرى دە ءبىرازدان بەرى جارىقسىز وتىر. توعىز اۋىلمەن كولىك قاتىناسى ۇزىلگەن. بۇل جولداردى جوندەۋ قازىر مۇمكىن ەمەس. ويتكەنى جولدىڭ سۋ جىرىپ كەتكەن جەرلەرىنەن ارقىراپ سۋ اعىپ جاتىر.
«جەر قۇرعاسا بىردەن جولدى قالپىنا كەلتىرۋگە كىرىسەمىز. تەحنيكا دايىن تۇر. سۋدىڭ ءالى بەتى قايتپاعان جەرلەر بار. اۋدانعا قاراستى 10 اۋىل جارىقسىز وتىر. ونى قازىر قالپىنا كەلتىرۋ مۇمكىن ەمەس. ويتكەنى باعاندارى جارامسىز, سۋدىڭ ورتاسىندا تۇر. سوندىقتان بىرتە-بىرتە قوسۋعا تۋرا كەلىپ وتىر. قازىر بۇل ماسەلەمەن ارقالىقتان كەلگەن ماماندار اينالىسىپ جاتىر. قازىر قىزبەلدەن باسقا اۋىلداردىڭ ءبارى ءوز ورنىندا وتىر. تۇيەمويناق اۋىلىندا دا سۋ تۇر. بۇل اۋىلدا 7 ءۇي وتىر ەدى, كەشە ء«بىز بىرگەمىز» قورىنان جەتكەن كيىز ۇيلەردى وسى جەتى وتباسىنا اپارىپ بەردىك. ولار اۋىل شەتىندەگى سۋ شىقپاعان جەرگە كيىز ءۇي تىگىپ, كىرىپ الدى. ال بالا-شاعاسى – اقشىعاناق اۋىلىندا. قازىر تورعاي, قابىرعا وزەندەرىندە سۋ دەڭگەيى ءتۇستى. تەك قانا قىزبەل جاقتان وتەتىن سارىوزەن عانا كوتەرىلىپ تۇر», دەدى جانگەلدين اۋدانىنىڭ اكىمى شوتا وسپانوۆ.
استاناداعى ء«بىز بىرگەمىز» قورى تورعايداعى تاسقىن سۋدان زارداپ شەككەن تۇرعىندارعا 25 كيىز ءۇي جەتكىزىپ بەرگەن. امانگەلدى, جانگەلدين اۋدانىنداعى ءبىراز وتباسى سۋ تارتىلىپ, جەر دەگدىگەنشە وسى ۇيلەردى پانالاي تۇرادى.
ارقالىق توڭىرەگىندەگى سۋ باسقان ەلدى مەكەندەرمەن دە بىرتىندەپ قاتىناس ورناتىلىپ جاتىر. قازىر ەكىدىڭ اۋىلىنىڭ تۇرعىندارى ارقالىققا پاروممەن بارىپ-كەلىپ ءجۇر. جارىقسىز قالعان قىستاقتار گەنەراتورلارمەن قامتاماسىز ەتىلگەن.
سۋ تاسقىنىنان زارداپ شەككەن كاسىپكەرلەرگە دە كومەك كورسەتىلەدى. مىسالى, وبلىستىق كاسىپكەرلەر پالاتاسىنا تاسقىننان زارداپ شەككەن 300-گە جۋىق كاسىپكەر كومەك سۇراپ, ءوتىنىش تۇسىرگەن. بيزنەسكە كەلگەن شىعىن كولەمى 2,7 ملرد تەڭگەگە باعالانىپ وتىر.
قوستاناي وبلىسى
