فوتو: Facebook
دەپۋتات اتىراۋ قالاسى, ماحامبەت (ماحامبەت, سارايشىق اۋىلدارى) جانە يندەر (قۇرىلىس, جارسۋات اۋىلدارى) اۋماقتارىندا «ۇلكەن سۋدى» قابىلداۋعا دايىندىق بويىنشا جۇرگىزىلىپ جاتقان جۇمىستاردى باقىلاعان.
«جاعانى كۇشەيتۋ جۇمىستارىنا اتسالىسىپ جاتقان تۇرعىندارمەن دە كەزدەستىك. جارىقتاندىرۋ, قۇرال-جابدىقتار بويىنشا كومەك سۇراپ جاتىر, ولارعا بۋلدوزەر, ەكسكاۆاتور قاجەت. قوسىمشا كومەك كورسەتۋ ءۇشىن قورعانىس مينيسترلىگىنىڭ بولىمشەلەرى تارتىلادى. قازىرگى جاعدايدى ءبارى تۇسىنەدى, بارلىعى ۇيىمشىلدىقپەن, بىرلىكپەن جۇمىس ىستەپ جاتىر», دەپ جازدى دۇيسەنباي نۇرباي ۇلى.
دەپۋتاتتىڭ مالىمەتىنشە, ەجەلگى سارايشىق قالاشىعىن سۋ باسۋ قاۋپى ءتونىپ تۇر. بولجام بويىنشا اتىراۋعا 20 ساۋىردە ۇلكەن سۋ كەلەدى دەپ كۇتىلىپ وتىر.
دۇيسەنباي تۇرعانوۆ: «ەمبى-اقكيىزتوعاي وزەندەرىنىڭ گيدروپوستىندا سۋ دەڭگەيىنىڭ تۇراقتى تومەندەۋى بايقالادى, دەڭگەيى - 295 سم. 4 ساعات ىشىندە 3 سم ءتۇستى. جايىق وزەنىنىڭ گيدروپوستتارىندا سۋ دەڭگەيى كوتەرىلىپ جاتىر جانە بۇدان ارى قاراي دا كوتەرىلۋى مۇمكىن. قيعاش وزەنىنىڭ ولشەۋ بەكەتتەرىندە جاعداي تۇراقتى, سۋ دەڭگەيىنىڭ تومەندەۋى بايقالادى. جالپى, جۇمىستى جەدەلدەتۋ قاجەت», دەپ جازباسىن تۇيىندەدى.
