فوتو: primeminister.kz
كەزدەسۋ بارىسىندا ينۆەستيتسيالىق جوبالاردى ىسكە اسىرۋ شەڭبەرىندە ءوزارا ءىس-قيمىل ماسەلەلەرى تالقىلاندى. 1864 جىلى قۇرىلعان Société Générale – 66 ەلدە وكىلدىگى بار ەڭ ءىرى حالىقارالىق قارجى ينستيتۋتتارىنىڭ ءبىرى. قازاقستان ۇكىمەتى مەن بانك اراسىنداعى 30 جىلعى ىنتىماقتاستىق بارىسىندا قۇنى $17 ملرد-تان اساتىن 30-دان استام بىرلەسكەن جوبا ىسكە اسىرىلعان.
قازىرگى ۋاقىتتا بىرقاتار وتاندىق كومپانيالار Société Générale بانكىمەن ەنەرگەتيكالىق ينفراقۇرىلىم جانە قارجى نارىعى سالاسىنداعى جوبالار بويىنشا كەلىسسوزدەر جۇرگىزىپ جاتىر. سونىمەن قاتار كەزدەسۋگە قاتىسۋشىلار ەكونوميكانىڭ بارلىق سالالارىندا ورنىقتى دامۋدى ينتەگراتسيالاۋ ماقساتىندا ESG (ەكولوگيالىق ورتا, قوعامدىق قىزمەت, كورپوراتيۆتىك باسقارۋ) باعىتى بويىنشا ىنتىماقتاستىقتى دامىتۋ پەرسپەكتيۆالارىن تالقىلادى.
«مەملەكەت باسشىسى قاسىم-جومارت توقاەۆ اتاپ وتكەندەي, قازاقستانعا شەتەلدىك ينۆەستيتسيالار اعىنىن قامتاماسىز ەتۋ ءۇشىن حالىقارالىق بانكتەردى بەلسەندى تۇردە تارتۋ قاجەت. بۇل باعىتتا ۇكىمەت ءوزارا ءتيىمدى ارىپتەستىككە دايىن جانە ەلىمىز ءۇشىن ماڭىزدى جوبالاردى ىسكە اسىرۋعا جاردەمدەسەتىن بولادى», دەپ اتاپ ءوتتى ولجاس بەكتەنوۆ.
مەملەكەت باسشىسىنىڭ قازاقستان حالقىنا جولداۋىندا قويىلعان مىندەتتەردى ورىنداۋ ماقساتىندا ەلىمىزدە ەكونوميكاعا شەتەلدىك كوزدەردەن, ونىڭ ىشىندە قارجى سەكتورىنداعى باسەكەلەستىكتى ارتتىرۋ ءۇشىن سەنىمدى حالىقارالىق بانكتەردەن قارجى تارتۋ ءۇشىن قولايلى جاعدايلار جاساۋ بويىنشا شارالار كەشەنى ىسكە اسىرىلىپ جاتىر. جۇرگىزىلىپ جاتقان جۇمىستىڭ ماقساتى – ەكونوميكانى نەسيەلەندىرۋگە بەلسەندى قاتىسا الاتىن حالىقارالىق نارىقتا جۇمىس تاجىريبەسى بار بانكتەردى قازاقستانعا تارتۋ.
