سۋرەتتى تۇسىرگەن – رۋسلان كادىروۆ
گاز جەلىسىنە قوسىلۋ سالتاناتىنا اۋدان اكىمى ەلدوس احمەتوۆ, وبلىستىق تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ايدوس بەكەتاەۆ, مەردىگەر كومپانيالاردىڭ وكىلدەرى جانە اۋىل تۇرعىندارى قاتىستى. ماتاي بايىسوۆ قۇرامىنا كىرەتىن قارابۇلاق اۋىلدىق وكرۋگىنىڭ اكىمى سەرجان وڭالباەۆ تۇرعىنداردى قۇتتىقتاپ, ولاردى بيىل كوپ قۋانىش كۇتىپ تۇرعانىن جەتكىزدى.
«مەملەكەت باسشىسىنىڭ تاپسىرماسىنا ساي ەلدى مەكەندەگى تۇرعىنداردىڭ كوگىلدىر وتىنعا قولجەتىمدىلىگىن ارتتىرۋعا كۇش سالىپ جاتىرمىز. م.بايىسوۆ اۋىلىنىڭ تۇرعىندارى كوكتەمنىڭ شۋاقتى ساتىندە ءبىر قۋانىشقا كەنەلسە, جىل سوڭىنا دەيىن سالتاناتتى ءىس-شارالارىمىز كوپ بولماق. ماسەلەن, 15 جىلدان اسا قاراۋسىز قالعان عيماراتتى جوندەپ, بالاباقشاعا اينالدىرىپ جاتىرمىز. سونىمەن قاتار جۋىردا بالالار ويىن الاڭقايى سالىنادى. مۇنىڭ ءبارىن ءاربىر تۇرعىننىڭ قولايلى ورتادا ءومىر سۇرۋىنە جاعداي جاساۋعا ۇمتىلعان قادام دەپ تۇيسىنگەن ابزال», دەدى س.وڭالباەۆ.
مۇنان سوڭ اۋىل بەلسەندىسى ابدىكارىم كايمۋلدينوۆ ءسوز الىپ, گاز جەلىسىن تارتقان مەردىگەر «رەمستروي» سەرىكتەستىگىنىڭ باسشىلىعىنا, قىزمەتكەرلەرىنە العىس ءبىلدىردى. اۋىل تۇرعىندارى اتىنان كومپانيا وكىلدەرىنە شاپان جاۋىپ, ءىلتيپات ەتتى.
باقتىباي ەلدى مەكەنىندە قۋانىشتى كۇن بولدى. 2021 جىلى باستالعان گازداندىرۋ جۇمىسى اياقتالىپ, قازىر تۇرعىندار كوممۋنالدىق جايلىلىقتى سەزىنە باستادى. بۇل ءىس-شارادا اۋدان اكىمى ەلدوس احمەتوۆ تۇرعىنداردى قۇتتىقتاپ, اۋدانداعى گازداندىرۋ جۇمىستارىن تارازىلادى.
«اۋدانىمىزداعى 33 ەلدى مەكەننىڭ 21-ءى گازداندىرۋعا جاتادى. قازىر 5 ەلدى مەكەنگە كوگىلدىر وتىن جەتكىزىلدى. سونىمەن قاتار 11 ەلدى مەكەندى گازداندىرۋ جۇمىستارى جۇرگىزىلىپ جاتىر. 3 ەلدى مەكەنگە جوبالىق-سمەتالىق قۇجاتتاما ازىرلەنۋدە. 2025 جىلدىڭ سوڭىنا دەيىن اۋداننىڭ 41 مىڭ تۇرعىنى بار 21 ەلدى مەكەنى تابيعي گازعا قول جەتكىزەدى. مەملەكەت باسشىسى ايتقانداي, «بارشاعا تەڭ مۇمكىندىك تۋدىرۋ – باستى ۇستانىم», دەدى ە.احمەتوۆ.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ مالىمەتىنشە, ەكى اۋىلدى گازداندىرۋ جوبالارىن جۇزەگە اسىرۋعا بيۋدجەتتەن 1,4 ملرد تەڭگەدەن اسا قارجى ءبولىنىپ, 110,5 شاقىرىم گاز قۇبىرى تارتىلعان. سول سياقتى اۋداننىڭ 10 اۋىلىنا دا گاز قۇبىرلارى تارتىلىپ جاتىر. جىل سوڭىنا دەيىن بىرتىندەپ كوكجازىق, تەرەكتى, قاراتال, جاڭالىق, شىمىر, جەتىسۋ, جاستار, اباي, ەشكىولمەس, وتەناي اۋىلدارىنىڭ تۇرعىندارى گازعا قول جەتكىزەدى دەپ جوسپارلانىپ جاتىر. سونداي-اق اقتاستى, قاينارلى, جالعىزاعاش ەلدى مەكەندەرىن گازداندىرۋدىڭ جوبالىق-سمەتالىق قۇجاتتاماسى ازىرلەنۋدە. وسىنداي جۇمىستاردىڭ ناتيجەسىندە 2025 جىلدىڭ سوڭىنا دەيىن وبلىستاعى گازداندىرۋعا جاتاتىن 21 اۋىلدىڭ 40 مىڭنان اسا تۇرعىنى كوگىلدىر وتىنعا قول جەتكىزەدى.
باقتىبايلىق ديدار رازيەۆتىڭ ءۇيى جۋىردا عانا گاز جەلىسىنە قوسىلعان. ايتۋىنشا, ءبىر تاۋقىمەتتەن ارىلىپتى. جەرگىلىكتى اتقامىنەرلەرگە العاۋسىز العىسىن جاۋدىردى.
ايتا كەتەتىن جايت, وسى كۇنى قاراتال اۋدانىندا دا قۋانىشتى جاڭالىق بولدى. ۇشتوبە قالاسىنداعى گاز تاراتۋ جەلىلەرىنىڭ قۇرىلىسى 2022 جىلدان بەرى جۇرگىزىلىپ كەلەدى. قۇنى 7 ملرد تەڭگە بولاتىن جوبا 2024 جىلدىڭ قىركۇيەك ايىندا اياقتالادى. بۇگىندە مۇنداعى جۇمىستار 90,5 پايىزعا تامامدالعان. مەرەكە قارساڭىندا ۇشتوبە قالاسىنىڭ شىعىس بولىگىن گازبەن قامتۋعا باعىتتالعان ىسكە قوسۋ كەشەنى ءوز جۇمىسىن باستادى. وسى قوندىرعى ناتيجەسىندە اۋدان ورتالىعىنىڭ 40 پايىزى كوگىلدىر وتىنعا قول جەتكىزەدى.
جالپى, قاراتال اۋدانىندا 35 ەلدى مەكەننىڭ 19-ى گازداندىرۋعا جاتادى. بۇگىندە 2300-دەن اسا تۇرعىنى بار ويان جانە كالپە اۋىلدارىنىڭ تۇرعىندارىنا كوگىلدىر وتىن جەتكىزىلدى. جىل سوڭىنا دەيىن وبلىستاعى جاڭاتالاپ, ەسكەلدى بي, كوكدالا, قىزىلجار, دوستىق, تاستوبە, ورتاتوبە, باستوبە, كوكپەكتى, سارىبۇلاق سياقتى 10 اۋىلدى كەزەڭ-كەزەڭىمەن گازداندىرۋ جوسپارلانىپ جاتىر.
جەتىسۋ وبلىسى
