«شاڭىراق كۇنى» اياسىندا جالاعاشتا اۋدان اكىمىنىڭ ورىنباسارى عاني سۇلەيمەنوۆ, اۋداندىق قوعامدىق دامۋ ءبولىمىنىڭ باسشىسى جاسۇلان ەسپەنبەت پەن اۋداندىق انالار كەڭەسىنىڭ ءتورايىمى ايقىن جاقسىلىقوۆا پەرزەنتحاناعا بارىپ, وسى كۇنى دۇنيەگە اتۇستار اكەلگەن فاريدا اليەۆا مەن پەريزات احمەتوۆاعا, كەستەتىگەردىڭ اناسى نۇرگۇل مۇساباەۆاعا سىي-سياپات تابىستاپ, گۇل شوقتارىن ۇسىندى.
قازالىلىقتار دا وسى اتاۋلى كۇندى ايرىقشا اتاپ ءوتتى. ر.باعلانوۆا اتىنداعى مادەنيەت ورتالىعىندا ءىس-شارا ۇيىمداستىرىلىپ, جارتى عاسىر جۇپ جازباعان جەتكەرگەنوۆتەر وتباسى مەن وتاسقاندارىنا 25 جىل بولعان مۇقانوۆتار شاڭىراعىنا قۇرمەت كورسەتىلدى. اۋدانارالىق اۋرۋحانانىڭ باس دارىگەرى باقىتكۇل الىشەۆا جاس بوسانعان انالارعا سىي تابىستادى.
ارال قالاسىنداعى وتباسىن قولداۋ ورتالىعىندا كەلىن ءتۇسىرىپ, جاڭا وتاۋ كوتەرگەن جاستاردىڭ نەكە قيۋ راسىمدەرى وتكىزىلدى. داستۇرگە ساي بەتاشار ءوتىپ, وتباسى قۇندىلىقتارى دارىپتەلدى. سالتاناتتى تۇردە جاستاردىڭ نەكەسى قيىلىپ, جاس وتاۋ يەلەرىنە كۋالىك پەن سىي-سياپات تابىستالدى. اۋدانعا بەلگىلى مادەنيەت سالاسىنىڭ ارداگەرى, قازىنا قاريا باينياز تىلەپوۆ جاس جۇبايلارعا باتا بەرىپ, ەلىمىزگە باق-بەرەكە تىلەدى.
سىرداريادا وسى كۇنى ۇل بوسانعان گۇلجان قۇلماعامبەتوۆانى اۋداندىق اۋرۋحانا باس دارىگەرىنىڭ ورىنباسارى اقكۇل كۇلەكە مەن اۋرۋحانا قىزمەتكەرلەرىنىڭ كاسىپوداق ۇيىمى توراعاسى سەرىك ماحانبەتوۆ قۇتتىقتادى.
اتاۋلى كۇنى جاڭاقورعاندا اۋدان اكىمىنىڭ ورىنباسارى بەكتاس نۇريددينوۆ پەن اۋداندىق اۋرۋحانا باس دارىگەرى تاڭىربەرگەن ءاميت ۇلى دۇنيەگە كەلگەن 3 ءسابيدىڭ اناسىن «شاڭىراق كۇنىمەن» قۇتتىقتاپ, قۇرمەت كورسەتتى.
وسى كۇنى قىزىلوردا قالاسىنداعى وتباسى ورتالىعىندا وتباسىلىق تانىمدىق ءىس-شارا ۇيىمداستىرىلىپ, بەرەكە-بىرلىگى جاراسقان شاڭىراقتار كوپشىلىككە ناسيحاتتالدى.
قىزىلوردا وبلىسى
