ۋنيۆەرسيتەتتەگى رەكرۋتينگ جانە مانساپ ورتالىعىنىڭ جەتەكشىسى بەرىك سايماعامبەتوۆ وتىرىستىڭ ماقساتى تۋرالى ايتىپ, «سىر مەديا» جشس ديرەكتورىنىڭ مىندەتىن اتقارۋشى مارات ارالباەۆ سەرىكتەستىكتىڭ قازىرگى جاي-كۇيى, ەل دامۋىنا ۇلەس قوسىپ كەلە جاتقان جۋرناليستەردى شىعارماشىلىق تۇرعىدا قولداۋ باعىتىنداعى باستامالار تۋرالى حابارلاما جاسادى.
بىلتىردان بەرى ساراپتامالىق باعىتتاعى, ەكسكليۋزيۆتى ماتەريال جازعان گازەت تىلشىلەرگە تاۋەلسىز كوميسسيا شەشىمىمەن اي سايىن اقشالاي جۇلدە بەرىلىپ كەلەدى. گازەتتەر ديزاينى دا ساراپقا ءتۇسىپ جاتادى. باسىلىمدار بەتتەرىندە قوعامداعى وزەكتى ماسەلەلەر قالىس قالىپ جاتقان جوق. سەرىكتەستىك بيىلدان باستاپ «ميلليونەر جۋرناليست» اتتى جوبانى جۇزەگە اسىرماقشى. جىل بويى بارلىق تالاپقا ساي كەلىپ, ءونىمدى قىزمەتىمەن كوزگە تۇسكەن سەرىكتەستىك تىلشىسىنە كاسىبي مەرەكە قارساڭىندا 1 ميلليون تەڭگە تابىستالادى.
سالانىڭ وزەكتى ماسەلەلەرىن تالقىلاپ, قوعامنىڭ قوزعاۋشى كۇشى رەتىندەگى باق ءرولىن ايقىنداۋعا ارنالعان جيىندا فيلولوگيا, جۋرناليستيكا جانە تاريح كافەدراسىنىڭ اعا وقىتۋشىسى, فيلولوگيا عىلىمدارىنىڭ كانديداتى نۇرلان نۇرماحانوۆ وقۋ ورنىندا بولاشاق جۋرناليستەردى دايىنداۋ ىسىنە توقتالدى. وقىتۋشىلىقتان بولەك «الىمساق» جۋرنالى مەن «ۇستاز مارتەبەسى» گازەتىنە جەتەكشىلىك ەتەتىن ارىپتەسىمىز 2012 جىلدان بەرى «بولاشاق» ۋنيۆەرسيتەتىنەن جۋرناليستيكا ماماندىعىن 200-دەن استام جاس ءبىتىرىپ شىققانىن اتاپ ءوتتى. ولاردىڭ الدى قازىر ەلىمىزدىڭ بەدەلدى اقپارات قۇرالدارىندا قىزمەت ەتەدى.
جيىندا «بولاشاق» ۋنيۆەرسيتەتىنىڭ وقىتۋشىسى, ارداگەر-جۋرناليست ايتكۇل شالعىنباەۆا جۋرناليستيكا مەنەدجمەنتى, مەملەكەتتىك تاپسىرىس, باق پەن بيلىك قارىم-قاتىناسى جايىندا وي ءوربىتتى.
– مەملەكەتتىك تاپسىرىس ەكى جاققا دا ءتيىمدى بولۋى كەرەك. بۇل جەردە باق ەركىندىگى, وقىرمان قۇقى دا ەسكەرىلۋى كەرەك, – دەدى ول.
ورتاق تاقىرىپ اياسىندا قازاقستان جۋرناليستەر وداعى وبلىستىق فيليالىنىڭ جەتەكشىسى, وبلىستىق «سىر بويى» گازەتىنىڭ باس رەداكتورى قۋات شارابيدينوۆ تە پىكىر-پايىمىن جەتكىزدى.
– كەزىندە مەملەكەتتىك تاپسىرىس ۇلتتىق ءباسپاسوزدى داعدارىستان امان الىپ قالعانىمەن, ءالى كۇنگە قازاق جۋرناليستەرىنىڭ مۇڭ-مۇقتاجى تولىق شەشىلە قويمادى. دەگەنمەن ءۇمىت ۇزىلگەن جوق. قوعامداعى وزگەرىستەر اقپاراتتىق سالاعا سونى لەپ اكەلەدى دەپ سەنەمىز. اسىرەسە جازىلىم, جارناما جانە مەملەكەتتىك تاپسىرىس اياسىندا جۇمىس ىستەپ كەلە جاتقان ءداستۇرلى باق-قا جاڭاشا قولداۋ اسا قاجەت, – دەدى ول.
باسقوسۋ سوڭىندا جۋرناليستيكا كافەدراسىنىڭ ستۋدەنتتەرى ءتۇرلى ساۋال قويىپ, ماماندارمەن پىكىر الماستى. دوڭگەلەك ۇستەلگە قاتىسقان قوناقتار وقۋ عيماراتىن ارالاپ, مۇنداعى جاڭالىقتارمەن, ءبىلىم بەرۋدىڭ ادىستەمەلەرىمەن تانىستى.
قىزىلوردا
