فوتو: اۆتوردان
ال, بۇگىندە ەلىمىزدەگى ءاربىر قۇرىلىمدا دا, ىنتىماقتاستىق پەن باۋىرمالدىلىق قاسيەتتەرى ساقتالعان. سولاردىڭ ءبىرى قازاقستان رەسپۋبليكاسىنىڭ ۇلتتىق ۇلانىنىڭ «باتىس» وڭىرلىك قولباسشىلىعىنا قاراستى 5517 اسكەري ءبولىمى. ەلىمىزدىڭ قورعانى بولا بىلگەن ۇلتتىق ۇلاننىڭ 5517 اسكەري بولىمىندە بۇگىندە وزگە ۇلت وكىلدەرى وتان الدىنداعى بورىشتارىن وتەۋدە. اتاپ ايتار بولساق, قازاق, ورىس, تاتار, ازەربايجان, قىرعىز, وزبەك, ۇيعىر ۇلت وكىلدەرى. ەل قورعانى بولا بىلگەن بۇل اسكەري بولىمدە دە العىس ايتۋ كۇنى ەرەكشە اتالىپ وتەدى. وسى ورايدا ءبىز 5517 اسكەري بولىمىندە وتان الدىنداعى بورىشىن وتەپ جۇرگەن جاس ساربازداردىڭ كىمدەرگە العىس ايتاتىنىن ءبىلىپ كەلدىك.
ەڭ العاشقى بولىپ ءوزىنىڭ ىستىق ءىلتيپاتىن بىلدىرگەن ۇيعىر ۇلتىنىڭ وكىلى 5517 اسكەري ءبولىمىنىڭ اتقىشتار روتاسىنىڭ ساربازى قاتارداعى ارمەدينوۆ سايد ساۆەردين ۇلى
- بارلىعىمىز بىلەتىندەي قازاقستان حالقىنىڭ اسىعا كۇتەتىن مەرەكەلەرىنىڭ ءبىرى بۇل العىس ايتۋ كۇنى. توعىزىنشى رەت اتالىپ ءوتىلىپ جاتقان بۇل مەرەكە ەلىمىز ءۇشىن جارقىن مەيرامداردىڭ ءبىرى بولىپ ەسەپتەلەدى. بۇل كۇن قازاقتاردىڭ ىنتىماقشىلدىلىعى مەن دوستاستىعىنىڭ سيمۆولى, قوناقجايلىلىعىنىڭ كورسەتكىشى دەسەم ارتىق ايتقانىم ەمەس. كوكتەمنىڭ جايما شۋاق جىلۋىمەن تۇسپا تۇس كەلگەن بۇل مەرەكە قارساڭىندا مەن ءوز العىسىمدى ارقاشان مەنىڭ جانىمدا دەمەۋ بەرىپ قولداپ جۇرگەن اتا-اناما, دوستارىما ايتقىم كەلەدى. قيىن ۋاقىتتا تىڭداپ كومەكتەسىپ, قولداۋ مەن قامقورلىق كورسەتكەنىنە شىن جۇرەكتەن العىس ايتامىن. ءاردايىم مەنىڭ جاعدايىمدى ويلاپ, ەشبىر جەردە جالعىز تاستاماي وسى كۇنگە جەتكىزگەن اتا-اناما شىن جۇرەگىمنەن ءوز العىسىمدى بىلدىرەمىن.
كەزەكتە «باتىس» وڭىرلىك قولباسشىلىعىنىڭ 5517 اسكەري ءبولىمىنىڭ ساربازى, تاجىك ۇلتىنىڭ وكىلى قاتارداعى تۋعالوۆ فارۋح عاسىرجان ۇلى
- وسىدان توعىز جىل بۇرىن ەلىمىزگە جاڭادان ءبىر ەرەكشە مەرەكە پايدا بولعان. ول حالقىمىزدىڭ ىنتىماق-بىرلىگىن ايعاقتايتىن ەرەكشە كۇن − العىس ايتۋ مەرەكەسى. جىل سايىن 1 ناۋرىز كۇنى اتالىپ وتەتىن بۇل مەيرام قيىن قىستاۋ كەزەڭدەردە قۋانىش پەن قايعىنى ءبولىسىپ, پانا بولا بىلگەن قازاق حالقىنا وزگە ۇلت وكىلدەرىنىڭ العىس ايتۋ كۇنى. العىس ايتۋ - بۇل ادامنىڭ جۇرەگىنە ەرەكشە جىلۋلىق سىيلايتىن كەرەمەت قاسيەت, ادامگەرشىلىكتىڭ جوعارعى كورسەتكىشى. جىل سايىن بۇل مەرەكەنىڭ تاريحى جاڭا وقيعالارمەن تولىقتىرىلادى. سوندىقتان دا ۋاقىت وتە كەلە بۇل مەرەكە حالقىمىزدىڭ اسىعا كۇتەتىن سۇيىكتى مەرەكەلەرىنىڭ ءبىرى بولدى. بۇل كۇنى كوپتەگەن ادامدار, ەل تاريحىن ەسىنە الىپ, تاۋەلسىزدىگىمىزدى قاسىق قانى قالعانشا بەرمەگەن اتا-بابالارىنا العىس ايتادى. سونىمەن قاتار ادامدار ءبىر-بىرىنە, اتا-انالارىنا, بالالارىنا العىس ايتىپ جىلى ەستەلىكتەرىن ەستەرىنە الىپ, ءبىر شاڭىراق اياسىندا جينالىپ ۋاقىت وتكىزەدى. مەن دە وسى مەرەكە قارساڭىندا ءوزىمنىڭ جىلى لەبىزدەرىمدى بالالىق شاعىمدى بىرگە وتكىزگەن دوستارىما, سىنىپتاستارىما ايتقىم كەلەدى.
كەلەسى كەزەكتە 5517 اسكەري ءبولىمىنىڭ اتقىشتار روتاسىنىڭ ساربازى ۇيعىر ۇلتىنىڭ وكىلى قاتارداعى كامالوۆ يۋسۋف نۇرلان ۇلى
- 1 ناۋرىز – العىس ايتۋ كۇنى ءتۇرلى ۇلت وكىلدەرىنىڭ اراسىنداعى ادامگەرشىلىك قارىم-قاتىناستىڭ ۇلگى ونەگەسىنە اينالدى. سونداي-اق بۇل كۇن ەلىمىزدىڭ تاريحىنداعى ەلەۋلى كۇن بولىپ ەسەپتەلەتىنى بارىمىزگە ءمالىم. سەبەبى وسىنداي ايتۋلى مەرەكەنىڭ ارقاسىندا ەلىمىزدىڭ بىرلىگى بەكەمدەنۋى مەن قاتار تۇعىرلى تاتۋلىعىمىز بەن ىرىستى ىنتىماعىمىز جاڭا بەلەسكە جەتەدى. بۇل كۇن جاقسىلىقتى باعالاۋعا, كوپتەگەن ۇلت وكىلدەرى اراسىندا سىيلاستىق پەن تاتۋلىقتى ارتتىرادى. ەندەشە مەن, ءوزىمنىڭ وتان الدىنداعى بورىشىمدى وتەپ جاتقان قازاقستان رەسپۋبليكاسى ۇلتتىق ۇلانىنىڭ «باتىس» وڭىرلىك قولباسشىلىعى مەن 5517 اسكەري ءبولىمىنىڭ جەكە قۇرامىنا العىسىمدى بىلدىرگىم كەلەدى. مەنىڭ جاۋىنگەرلىك قىزمەتىمدى ارتىرىپ, وتان الدىنداعى بورىشىمدى وتەۋگە ءوز سەپتىگىن تيگىزگەندەرى ءۇشىن بار جاقسىلىقتى تىلەيمىن. ەلىمىزدەگى تىنىشتىق پەن ۇندەستىكتى, ءوزارا سەنىم مەن قاۋىپسىزدىكتى قامتاماسىز ەتۋ جولىندا ايانباي ەڭبەك ەتىپ جۇرگەندەرى ءۇشىن شىن جۇرەكتەن العىس ايتقىم كەلەدى.
وسىنداي ىزگى تىلەكتەردىڭ ارقاسىندا, ادامدار ءبىر-بىرىنە مەيىرىمدىلىك ءبىلدىرىپ, قادام جاساعان سايىن ەلىمىزدەگى ىنتىماقتاستىق كۇشەيە بەرەدى. وسىلايشا العىس ايتۋ كۇنى ەل تاريحىندا ءوزىنىڭ ەرەكشە جىلۋلىعىن قالدىرىپ جۇرگەن كەرەمەت مەرەكەلەردىڭ ءبىرى بولادى. بىزدە بۇگىنگى جاس ساربازداردىڭ ىزگى تىلەكتەرىن قابىل الۋشى اتا-انا, تۋعان-تۋىس, دوستارى قۋانىشتى ەكەنىنە كامىل سەنەمىز. وسى ورايدا ءبىز «باتىس» وڭىرلىك قولباسشىلىعىنىڭ قۇرامى, ەل تىنىشتىعىنىڭ قالقانى بولىپ جۇرگەن ۇلتتىق ۇلاننىڭ ءاربىر قىزمەتكەرىنە ءوز العىسىمىزدى ايتا وتىرىپ, وتباسىلارىنا باقىت, شاڭىراقتارىنا شاتتىق, اتا-انالارىنا زور دەنساۋلىق, ەل يگىلىگى ءۇشىن اتقارىپ وتىرعان قىزمەتتەرىنە تابىس تىلەيمىز.
ماناربەك باقداۋلەت,
لەيتەنانت
ورال قالاسى
