اڭ ساناۋ جۇمىستارى جىلدىڭ قاي مەزگىلى بولماسىن, وڭاي ەمەس. قاماۋداعى مال سياقتى باس-باسىمەن ساناپ المايدى. التايدىڭ جىڭعىل-جىڭعىلىن, ساي-سالاسىن اتپەن, بولماسا جاياۋ ارالاپ, ىزىمەن سانايدى. ەلىك-مارال ۇيىرىمەن كەزدەسسە, سۋرەتكە ءتۇسىرىپ, تىركەپ الادى. فوتوتۇزاقتىڭ كومەگىنە دە جۇگىنەدى. بىراق ول قۇرىلعى اڭ بىتكەندى ءتۇسىرىپ ۇلگەرمەسى انىق.
– ۇلتتىق پارك اۋماعىنداعى اڭ-قۇستاردى جىل سايىن تىزىمدەپ, سانىن شىعارىپ وتىرامىز. سونىمەن قاتار تۇياقتى جانۋارلاردى ازىقتاندىرۋ جۇمىستارىن دا جۇرگىزىپ جاتىرمىز. سەبەبى قار جىلداعىدان قالىڭ, – دەيدى جانۋارلار الەمىن قورعاۋ جانە ءوندىرۋ ءبولىمىنىڭ باسشىسى ەرىك قاسىموۆ.
التايدا قىس ۇزاق ءارى قاتال. قاتال قىستا ءتۇز تاعىسى جۇرگەن سوقپاقپەن سوڭدارىنا تۇسە ءىز ساناپ جۇرگەن ينسپەكتورلاردىڭ ەڭبەگى ەڭبەك-اق. قىسقى ساناق ەسەپتەرىنە قاراساق, كاتونقاراعاي مەملەكەتتىك ۇلتتىق تابيعي پاركىنىڭ اۋماعىندا 120 بۇلان, 400 باستاي مارال, 2 200 مولشەرىندە ەلىك بار ەكەن.
ەستەرىڭىزگە سالا كەتەيىك, ۇلتتىق پارك اۋماعىندا اڭنىڭ قاي ءتۇرى بولماسىن, اۋلاۋعا قاتاڭ تىيىم سالىنعان. سوندىقتان دا شىعار, قاسقىر كوبەيگەن. اۋىل ماڭىن تورۋىلداپ جۇرەتىن يت-قۇس مالشىلاردىڭ مازاسىن قاشىرعانى دا جانە راس. مالمەن جان باققان اۋىل تۇرعىندارىنىڭ ايتۋىنشا, ودان قۇتىلۋدىڭ جالعىز جولى بار: زاڭ اياسىندا اڭشىلارعا قاسقىر اتۋعا رۇقسات بەرۋ قاجەت.
شىعىس قازاقستان وبلىسى,
كاتونقاراعاي اۋدانى
