مەملەكەت قاراجاتى قاتاڭ باقىلانسىن

بۇل مىندەتتى جۇزەگە اسىرۋدا مەم­لەكەتتىك اپپارات باتىل ارەكەت ەتۋى كەرەك. وسىعان بايلانىستى ۇكىمەتتىڭ جاڭا قۇرامىنا بيۋدجەت جانە سالىق مىندەتتەمەلەرىنىڭ تيىمدىلىگىن ارتتىرۋ جۇكتەلدى.

سونداي-اق مەملەكەت باسشىسى جاڭا سالىق كودەكسىن ازىرلەۋگە ءمان بەرىپ وتىر. ودان باسقا اگروونەركاسىپتى دامىتۋ جانە سۋ رەسۋرستارىن ۇنەمدەۋگە باسىمدىق بەرۋ قاجەتتىگىن ەرەكشە ايتىپ ءوتتى. الداعى ءۇش جىل ىشىن­دە اۋىل شارۋا­شىلىعىنا كوپ قارا­جات قاراس­تى­رىلادى, سايكەسىنشە اگرو­ونەر­كاسىپ سالاسىنداعى وڭدەلگەن ءونىمنىڭ ۇلەسى 70 پايىزعا ارتۋى باستى مىندەت. ال اگرارلىق سالا ءۇشىن سۋ – ەڭ باستى رەسۋرس. سوندىقتان سۋدى ۇنەمدەۋ تەحنولوگياسىن ەنگىزۋ جانە سۋدى كوپ قاجەت ەتەتىن داقىلداردى ازايتۋ باعىتىندا جۇيەلى جۇمىستى جۇزەگە اسىرۋ كەرەك.

پرەزيدەنتىمىز ينفراقۇرىلىمدى دامىتۋ سالاسىندا شۇعىل شارا­لار قابىل­داۋ قاجەتتىگىن ايتتى. بۇل ءۇشىن ۇكى­مەتتىڭ الدىندا, جىلۋ ورتا­لىقتارىن كۇردەلى جوندەۋدەن وتكىزۋ جانە قوسىمشا قۋات كوزىن تابۋ, ونى جۇزەگە اسىرۋ مىندەتى تۇر. سونىمەن بىرگە ەلىمىزدە رەسپۋبليكالىق ماڭىزى بار جولداردى جوندەۋدى تەزىرەك اياق­تاۋدى قولعا الۋ جانە تەمىرجول سالاسىندا قىزمەت ساپاسىنان باستاپ قوردالانعان بارلىق ماسەلەنى شەشۋ قاجەت. بۇل ەلىمىزدىڭ ەۋرازيانىڭ كولىك-لوگيستيكالىق حابىنا اينالۋى­نا مۇم­كىندىك بەرەدى.

مەملەكەت باسشىسى الەۋمەتتىك سالانى ودان ءارى جەتىلدىرۋگە, رە­فور­ما­لاۋعا دا ەرەكشە توقتالدى. بۇ­گىندە رەسپۋبلي­كا­لىق بيۋدجەتتىڭ 50 پايى­زىنان كوبى الەۋمەتتىك سا­لاعا قاراس­تىرىلعان. سون­دىق­تان مەملەكەت قاراجاتىنىڭ تيىم­دىلىگى ءار­دايىم ەرەكشە باقىلاۋدا بولۋى قاجەت. ءمامس جۇيەسىنىڭ جۇمىسى, حالىققا كورسەتىلەتىن مەديتسينالىق قىز­مەتتەردىڭ قولجەتىمدىلىگىمەن بىرگە ساپاسىن ارتتىرۋعا بايلانىستى ناقتى مىندەتتەر ايتىلدى.

پرەزيدەنت ۇكىمەتتىڭ كەڭەيتىلگەن وتىرىسىندا مەملەكەتتىك ساتىپ الۋ, مەملەكەت پەن جەكەمەنشىك سەرىك­تەستىگى, قۇرىلىس سالاسىن رەفور­ما­لاۋعا بايلانىستى زاڭدار قابىلداۋ قا­جەتتىگىن ايتتى. ءماجىلىس دەپۋتات­تارى رەتىندە بىرنەشە زاڭ جوباسىنا ءتيىستى نورمالاردى ەكسپەرتتىك قوعامداستىقپەن تالقىلاپ, ازىرلەۋگە كىرىسىپ كەتتىك. سونىمەن قاتار ءما­جىلىستىڭ پلە­نار­لىق وتىرىسىندا پرەزيدەنت VIII شاقىرىلىمداعى دەپۋتات­تار كور­پۋسىنىڭ جۇمىسىنا وڭ باعا بەردى. بۇل – ءبىز ءۇشىن ۇلكەن جاۋاپ­كەر­شىلىك. الداعى ۋاقىتتا دا وسى سەنىمدى اقتاۋعا, ەل يگىلىگى جو­لىنداعى قىز­مەتىمىزدى ساپالى ءارى ۋاق­تىلى اتقارۋعا جۇمىلامىز.

جۇلدىز سۇلەيمەنوۆا,

ءماجىلىس دەپۋتاتى