ەڭ الدىمەن, ەلىمىزدىڭ ساپالى ەكونوميكالىق دامۋىن جانە ازاماتتاردىڭ ناقتى تابىسىنىڭ ءوسۋىن قامتاماسىز ەتۋ قاجەت. پرەزيدەنتىمىز اتاپ وتكەندەي, ول ءۇشىن مەملەكەتتىك اپپاراتتىڭ جۇمىسى ناقتى ناتيجەگە باعىتتالۋعا ءتيىس. سونداي-اق ەكونوميكادا مۇقيات زەردەلەنگەن, باتىل ارەكەت كەرەك.
وسىعان وراي ۇكىمەتكە بيۋدجەت جانە سالىق ساياساتىنىڭ تيىمدىلىگىن بارىنشا ارتتىرۋ مىندەتى جۇكتەلىپ وتىر. مەملەكەت باسشىسى جاڭا سالىق كودەكسىن ازىرلەۋ بارىسىندا ينۆەستورلارعا جانە كاسىپكەرلەرگە قولايلى جاعداي جاساۋ مەن بيۋدجەتكە قاجەتتى كولەمدە قارجى ءتۇسىرۋدىڭ اراسىندا تەڭگەرىم بولۋ كەرەكتىگىن اتاپ ءوتتى.
سونداي-اق پرەزيدەنت ءتيىمدى دامۋ ءۇشىن ەكونوميكانى كەشەندى تۇردە ىرىقتاندىرۋدىڭ ماڭىزى زور ەكەنىن ايتتى. مەملەكەتتىڭ ەكونوميكالىق ۇدەرىستەرگە شامادان تىس ارالاسۋىنان باس تارتۋ قاجەت. باقىلاۋسىز مونوپوليانى, رەسۋرستاردى ادىلەتسىز ءبولۋدى, باسەكەنىڭ زاڭسىز تاسىلدەرىن قولدانۋدى دا جويۋ قاجەت.
مەملەكەت باسشىسى اگروونەركاسىپ كەشەنىن دامىتۋ جانە سۋ رەسۋرستارىن ۇنەمدەپ پايدالانۋ ماسەلەسىنە دە باسا ءمان بەردى. الداعى ۋاقىتتا اۋىل شارۋاشىلىعىن قارجىلاندىرۋ دايەكتى تۇردە ارتادى. جەردى بارىنشا ءتيىمدى پايدالانىپ, زاماناۋي اگروتەحنولوگيالاردى ەنگىزەمىن دەگەن شارۋالارعا مەملەكەت تاراپىنان جان-جاقتى قولداۋ كورسەتىلەدى. بۇل رەتتە ءۇش جىل ىشىندە اگروونەركاسىپ سالاسىنداعى وڭدەلگەن ءونىمنىڭ ۇلەسىن 70 پايىزعا جەتكىزۋ باستى مىندەت ەكەنىن اتاپ وتكەن ءجون.
اگرارلىق سالا ءۇشىن سۋ اسا ماڭىزدى رەسۋرس ەكەنى بەلگىلى. ەلىمىزدىڭ وڭتۇستىك وڭىرلەرىندە سۋ تاپشىلىعى وتە وزەكتى ماسەلە. سوندىقتان سۋ ۇنەمدەۋ تەحنولوگياسىن ەنگىزۋ جانە سۋدى كوپ قاجەت ەتەتىن داقىلداردى ازايتۋ باعىتىندا جۇيەلى جۇمىس جۇرگىزۋ قاجەت. بۇل رەتتە شەت مەملەكەتتەردىڭ وزىق تاجىريبەلەرىن زەردەلەپ, ەلىمىزدە سۋدى ۇنەمدەپ پايدالانۋ مادەنيەتىن قالىپتاستىرۋ جولىندا ىرگەلى ىستەردى قولعا الۋ قاجەت ەكەنى ايتىلدى.
سونىمەن قاتار پرەزيدەنت ينفراقۇرىلىمدى دامىتۋ سالاسىندا شۇعىل شارالار قابىلداۋ كەرەكتىگىنە نازار اۋداردى. بۇل باعىتتا ۇكىمەتتىڭ الدىندا, ءبىرىنشى كەزەكتە, بۇعان دەيىن باستالعان جىلۋ ورتالىقتارىن جاڭعىرتۋ جۇمىستارىن اياقتاۋ جانە قوسىمشا قۋات كوزىمەن قامتاماسىز ەتۋ مىندەتى تۇر.
ەلىمىزدە رەسپۋبليكالىق ماڭىزى بار جولداردى جوندەۋ جۇمىستارىن اياقتاۋ جانە تەمىرجول سالاسىنداعى وزەكتى ماسەلەلەردى شەشۋ دە ەرەكشە مانگە يە. مۇنداي كەشەندى قادام قازاقستاندى ەۋرازيانىڭ تولىققاندى كولىك-لوگيستيكالىق حابىنا اينالدىرۋعا مۇمكىندىك بەرەدى.
قاسىم-جومارت توقاەۆ ماڭىزدى باعىتتاردىڭ ءبىرى سانالاتىن الەۋمەتتىك سالانى رەفورمالاۋعا دا ايرىقشا توقتالدى. قازىرگى تاڭدا رەسپۋبليكالىق بيۋدجەتتىڭ جارتىسىنا جۋىعى اتالعان سالاعا ءبولىنىپ جاتىر. سوندىقتان مەملەكەت قاراجاتىن جۇمساۋدىڭ تيىمدىلىگى ەرەكشە باقىلاۋدا بولۋى كەرەك. مىندەتتى الەۋمەتتىك مەديتسينالىق ساقتاندىرۋ جۇيەسىنىڭ جۇمىسىن باقىلاۋ, حالىققا كورسەتىلەتىن مەديتسينالىق قىزمەتتەردىڭ ساپاسىن ارتتىرۋ جونىندە دە ناقتى تاپسىرمالار بەرىلدى.
كەڭەيتىلگەن وتىرىستا پرەزيدەنت مەملەكەتتىك ساتىپ الۋ, مەملەكەت پەن جەكەمەنشىك سەرىكتەستىگى, قۇرىلىس سالاسىن رەتتەۋ جۇيەسىن رەفورمالاۋعا ارنالعان ماڭىزدى زاڭدار قابىلداۋ كەرەكتىگىن دە اتاپ ءوتتى. سەنات دەپۋتاتتارى بۇل باعىتتاعى ءتيىستى زاڭ جوبالارىن پىسىقتاۋعا جانە قالا قۇرىلىسى كودەكسىن ازىرلەۋگە بەلسەندى قاتىسادى.
بۇل ىستە سەنات ۇكىمەتپەن كونسترۋكتيۆتى ءوزارا ءىس-قيمىلدى ءارى قاراي جالعاستىرىپ, پرەزيدەنت جۇكتەگەن مىندەتتەردىڭ ورىندالۋىن زاڭنامالىق تۇرعىدان قامتاماسىز ەتۋ ءۇشىن ءتيىستى جۇمىستى ساپالى ءارى ۋاقتىلى اتقاراتىن بولادى.
ماۋلەن اشىمباەۆ,
سەنات توراعاسى
