«اۋىل شارۋاشىلىعىنا بولىنەتىن قارجىنى بارىنشا, ءتىپتى مۇمكىندىك بولسا, ەكى ەسە ارتتىرۋ قاجەت. وعان بيۋدجەتتەن عانا ەمەس, باسقا دا قارجى كوزدەرىنەن, سونىڭ ىشىندە ەكىنشى دەڭگەيلى بانكتەردەن قاراجات تارتقان ءجون. كوكتەمگى ەگىس ناۋقانىنا جانە كۇزگى جيىن-تەرىنگە جەڭىلدىكپەن بەرىلەتىن نەسيەنى 1,5 تريلليون تەڭگەگە دەيىن ارتتىرۋ كەرەك. ال ينۆەستيتسيالىق جوبالارعا بولىنەتىن جەڭىلدەتىلگەن نەسيەنى 800 ميلليارد تەڭگەگە جەتكىزۋ قاجەت. جەڭىلدىكپەن ليزينگ بەرۋگە جىل سايىن كەمىندە 450 ميلليارد تەڭگە بولىنۋگە ءتيىس. سوندا ءار جىل سايىن اۋىل شارۋاشىلىعى تەحنيكاسىنىڭ 10 پايىزى جاڭارىپ وتىرادى», دەدى مەملەكەت باسشىسى.
بۇنى اۋىل شارۋاشىلىعى سالاسىنا ۇلكەن قولداۋ دەپ بىلەمىن. سونىمەن بىرگە, پرەزيدەنت سالاعا مەملەكەتتىك قولداۋدى ء«بىر تەرەزە» قاعيداسى ارقىلى جۇزەگە اسىرىپ, پروفيلدىك قارجى ينستيتۋتتارىنىڭ قىزمەتتەرىن بىرىكتىرۋ قاجەتتىگىن ايتتى. سول ماقساتتا جەڭىلدىكپەن نەسيەلەندىرۋ مەن سۋبسيديالاۋدى ءبىر تسيفرلىق پلاتفورمانىڭ شەڭبەرىندە بىرىكتىرۋ قاجەت ەكەندىگىن اتاپ ءوتتى. بۇل ۇسىنىس بۇگىندە وتە وزەكتى جانە «اۋىل» پارتياسى كوپتەن بەرى كوتەرىپ جۇرگەن «اگروبانك» قۇرۋ جونىندەگى ماسەلەمەن ۇندەس.
بۇگىندە ەلىمىزدە اگروونەركاسىپ كەشەنىن «بايتەرەك» حولدينگىنىڭ ەنشىلەس قۇرىلىمدارى «اگرارلىق نەسيە كورپوراتسياسى» مەن «قازاگروقارجى» قارجىلاندىرادى. شارۋالار كوبىنە وسى ۇيىمدار اراسىندا سابىلىپ, كوكتەمگى ەگىن جانە كۇزگى جيىن كەزىندەگى التىن ۋاقىتتارىن قارجىلاندىرۋ ماسەلەسىن شەشۋ ءۇشىن سارپ ەتەدى. ال وسى ماسەلەلەردى شەشۋدە «اگروبانك» سىندى ءبىر عانا مەكەمەنىڭ توڭىرەگىنە شوعىرلاندىرىلسا, پرەزيدەنت ايتقان ء«بىر تەرەزە» قاعيداتى وڭتايلى جۇزەگە اسقان بولار ەدى. ءبىز «اۋىل» پارتياسى «اگروبانك» قۇرۋ بويىنشا ۇستانىمىمىزدى بۇعان دەيىنگى ۇكىمەتكە اشىق جەتكىزگەن بولاتىنبىز. جاڭا ۇكىمەتكە دە ۇسىناتىن بولامىز. بۇل – تەك ءبىزدىڭ عانا ساياسي امبيتسيامىز ەمەس, مىڭداعان فەرمەردىڭ تىلەگى.
«اۋىل» پارتياسىنىڭ نەگىزگى ماقسات-مىندەتى – اۋىل شارۋاشىلىعى مەن اۋىلدىق ەلدى مەكەندەردى دامىتۋعا باعىتتالعان. سوندىقتان دا مەملەكەت باسشىسىنىڭ ۇكىمەت الدىنا قويعان تاپسىرمالارىن تولىق قولدايدى. ويتكەنى پرەزيدەنتتىڭ جاڭا ۇكىمەتكە بەلگىلەپ بەرگەن باعىتى ايقىن, باعدارى نىق, تالاپ-تاپسىرمالارى دا ناقتى بولىپ وتىر.
سەرىك ەگىزباەۆ,
«اۋىل» پارتياسىنىڭ توراعاسى, ءماجىلىس دەپۋتاتى, پارتيا فراكتسياسىنىڭ جەتەكشىسى
