44 جاستاعى پرەمەر-مينيستر ولجاس بەكتەنوۆ بۇل ماسەلەنى شەشە الا ما دەگەن الاڭ كوڭىل بار. مەن ساياساتتانۋشى رەتىندە ماسەلە جاستا ەمەس, تاباندىلىقتا دەر ەدىم. تاريحقا كوز سالساق, تۇرار رىسقۇلوۆ جيىرمادان اسقان شاعىندا ماسكەۋدە حالىق كوميسسارياتى توراعاسىنىڭ ورىنباسارى بولدى.
كوپ نارسە پرەمەر-ءمينيستردىڭ عانا ەمەس, ۇكىمەت قۇرامىنىڭ تاباندىلىعىنا دا بايلانىستى. قاي جەرگە قاراساڭ دا پروبلەمالار بار.
ءتىپتى مەملەكەت باسشىسى قاسىم-جومارت توقاەۆ شەنەۋنىكتەردە باستاما جەتىسپەيتىنىن, جاۋاپكەرشىلىكتى ءوز موينىنا الىپ, شەشىم قابىلداۋدان قورقاتىنىن ايتتى. الدا شەشىمىن كۇتىپ تۇرعان ماسەلە كوپ. پرەزيدەنت سوزدەن ىسكە كوشۋ كەرەكتىگىن بۇل جولى تاعى دا ەسكەرتتى.
ال مەن كاسىپكەر رەتىندە ۇكىمەت قۇرامىنداعى وزگەرىستەرگە نازار اۋداردىم. قارجى جانە ۇلتتىق ەكونوميكا مينيسترلىگى باسىنا بۇرىن وسى سالادان وتكەن, تاجىريبە جيناعان بىلىكتى ماماندار كەلدى. بيلىك پەن قوعام اراسىندا سىنداردى سۇحبات بولعان كەزدە عانا قوعام العا جىلجيدى. ءدال قازىر سالىق دەڭگەيىنە قاتىستى وزگەرىستەرگە كوڭىلى تولمايتىندار كوپ. بۇل ماسەلە جاڭا ۇكىمەت قۇرامىندا وڭ شەشىمىن تابادى دەپ ۇمىتتەنەمىن. سەبەبى ەلدىڭ قازىناسىن تەك سالىقپەن ەمەس, باسقا جولدارمەن دە تولتىرۋعا بولادى. زاڭ تۇزۋلەنسە, نارىق دەلدالداردان تازا بولادى, بيزنەس وسەدى, قاناتىن جايادى, كەڭەيەدى. ءبىز بيۋدجەت ءتۇسىمىن سالىقپەن ەمەس, شوب قاتارىن كوبەيتۋ ارقىلى ارتتىرۋعا دا باسىمدىق بەرۋىمىز كەرەك.
مەملەكەت باسشىسى كولەڭكەلى ەكونوميكانى ازايتۋ جۇيەسىن جەتىلدىرۋ بويىنشا جۇمىس ىستەۋىمىز كەرەكتىگىن, ەگەر دۇرىس باسقارۋ قۇرىلماسا, ەڭ وزىق سالىق ساياساتى دا ءتيىمسىز بولاتىنىن ايتتى. بيزنەس سەگمەنتىندە كوشتىڭ باعىتى ءتۇزۋ بولسا, كولەڭكەلى ەكونوميكانىڭ دا ۇلەسى ازايادى.
ۇكىمەت باسىنا كەلگەن پرەمەر-مينيستر ولجاس بەكتەنوۆتىڭ نەگىزگى مىندەتتەرى بارلىق مينيسترلىك پەن مەملەكەتتىك ورگاننىڭ قىزمەتىنە قاتاڭ باقىلاۋدى جۇزەگە اسىرۋ, سونداي-اق مەملەكەتتىك اپپاراتتاعى سىبايلاس جەمقورلىقپەن كۇرەس جۇمىسىن كۇشەيتۋ, ءىرى بيزنەستىڭ ءوزارا ارەكەتتەسۋىمەن بايلانىستى بولادى دەپ ويلايمىز.
ەكونوميكالىق ۇدەرىستەردى باسقارۋ رەفورمالاردىڭ بارىسىنا جاۋاپ بەرەتىن ۆيتسە-پرەمەرلەر ينستيتۋتىن قالىپتاستىراتىن كەز كەلدى دەپ سانايمىن. وسى ينستيتۋتقا مەملەكەتتىك باعدارلامالارعا بولىنگەن قارجى ەمەس, ءتۇرلى جوبالارعا بولىنگەن قارجىنى باقىلاۋ قۇزىرەتى بەرىلۋى كەرەك.
ماحامبەت اساباەۆ,
كاسىپكەر
الماتى
