جاڭا وقۋ جىلىندا ۋنيۆەرسيتەت بارلىق پەداگوگيكالىق باعىت بويىنشا باكالاۆريات دەڭگەيىنە ارنالعان «Minor» باعدارلاماسىن ەنگىزەدى. ستۋدەنتتەر ينكليۋزيۆتى ءبىلىم بەرۋدىڭ ءۇش قوسىمشا ءپانىن وقيدى: «ينكليۋزيۆتى سىنىپتا وقىتۋدىڭ امبەباپ ديزاينى», «ەرەكشە ءبىلىم بەرۋدى قاجەت ەتەتىن بالانىڭ وتباسىنا پسيحولوگيالىق-پەداگوگيكالىق قولداۋ كورسەتۋ» جانە «ەرەكشە ءبىلىم بەرۋدى قاجەت ەتەتىن تۇلعالاردى تيۋتورلىق قولداۋ». وسى باعىتتا ۋنيۆەرسيتەت قىزمەتكەرلەرى ەرەكشە ءبىلىم بەرۋ قاجەتتىلىكتەرى بار ستۋدەنتتەرمەن جۇمىس ىستەۋ باعىتىنداعى وقىتۋشىلارعا ارنالعان ادىستەمەلىك ۇسىنىمدار ازىرلەدى.
– جىل سايىن تەحنيكالىق, ينجەنەرلىك جانە پەداگوگيكالىق ماماندىقتاردى مەڭگەرۋگە نيەت بىلدىرگەندەر سانى ارتىپ كەلەدى. ءبىزدىڭ ۋنيۆەرسيتەت ەڭبەك نارىعىنىڭ قاجەتتىلىكتەرىنە جانە تەحنولوگيانىڭ دامۋىنا سايكەس ءبىلىم بەرۋ باعدارلامالارىن ۇنەمى جەتىلدىرەدى ءارى جاڭالارىن ازىرلەيدى. جۇمىس بەرۋشىلەرمەن, شەتەلدىك ۋنيۆەرسيتەتتەرمەن, ءىرى كومپانيالارمەن بىرلەسىپ, ەڭبەك نارىعىنىڭ سۇرانىسى بويىنشا جاڭا يننوۆاتسيالىق ءبىلىم بەرۋ باعدارلامالارىن ازىرلەپ جاتىرمىز. قازىر 40-قا جۋىق يننوۆاتسيالىق باعدارلاما بار. ولاردىڭ 18-ءى پەداگوگيكالىق, ينجەنەرلىك جانە تەحنيكالىق باعىتتاردى قامتيدى. وقۋ ورنىندا وقىتۋ ۇدەرىسى ءۇش تىلدە جۇرگىزىلەدى جانە 45 ءبىلىم بەرۋ باعدارلاماسى اعىلشىن تىلىندە قاراستىرىلعان. سونداي-اق ۋنيۆەرسيتەتىمىز قىسقارتىلعان ءبىلىم بەرۋ باعدارلاماسى بويىنشا ءۇش جىل ماتەماتيكا ءپانى مۇعالىمدەرىن دايارلاسا, بيىل «عارىشتىق تەحنيكا جانە تەحنولوگيالار» ءبىلىم بەرۋ باعدارلاماسى بويىنشا دوكتورانتۋرا اشىلدى, – دەدى ۋنيۆەرسيتەتتىڭ اكادەميالىق ماسەلەلەر دەپارتامەنتىنىڭ ديرەكتورى بايجۇمان قاشقىنباي.
ۇلتتىق ۋنيۆەرسيتەتتە پەداگوگيكالىق, ينجەنەرلىك, تەحنيكالىق باعىتتاعى جوعارى بىلىكتى كادرلاردى دايارلاۋعا كوپ كوڭىل بولىنەدى. قازىرگى تاڭدا وقۋ ورداسىندا وسى سالالاردا ءۇش دەڭگەي بويىنشا 12 مىڭنان استام ستۋدەنت ءبىلىم الىپ جاتىر. 244 ءبىلىم بەرۋ باعدارلاماسىنىڭ 100-ءى پەداگوگيكالىق, ينجەنەرلىك-تەحنيكالىق باعىتتار بويىنشا قاراستىرىلعان.
دارىندى جاستاردى عىلىمعا تارتۋ ماقساتىندا 2024-2025 وقۋ جىلىنان باستاپ باكالاۆريات باعدارلامالارىنا ەكى جاڭا مودۋل ەنگىزىلەدى. ولاردىڭ ءبىرى عىلىمي كومپونەنتتى قاراستىرادى. ستۋدەنتتەر وقۋدىڭ ءبىرىنشى جىلىنان زەرتتەۋ جۇمىستارىمەن اينالىسادى. ەكىنشىسى – مودۋل جاساندى ينتەللەكتىنى زەرتتەۋگە باعىتتالعان. ستۋدەنتتەر وسى باعىتتا ءبىلىمىن كەڭەيتىپ, وزىق تسيفرلىق تەحنولوگيالاردى مەڭگەرەدى دەپ كۇتىلىپ وتىر.
نۇرداۋلەت كارىباي,
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 2-كۋرس ستۋدەنتى
