ونەر جانە نامىس
بارشاعا ايان, باعدات ەل-جۇرتىنا ەڭ الدىمەن ۇلتتىق جاۋھارىمىز – حالىق اندەرىمەن تانىلعان ءانشى. ال حالىق اندەرى عاسىرلار بويى قازاق دەگەن اتاۋمەن بىرگە كەلەدى. حالىق اندەرىنىڭ ومىرشەڭدىگى, قۇندىلىعى نەدە دەگەنگە كەلسەك, وندا قازاقتىڭ مىنەزى, رۋحى, بولمىسى, ارمانى, مۇڭى, شەرى, «شىركىن-ايى» جاتىر ەمەس پە. مىنە, باعدات قىزىمىز سول حالىق اندەرىنە قاشاندا ادالدىق تانىتىپ, كيەلى ساحنادا ءوزىنىڭ داۋىس بوياۋىمەن سول ونەردىڭ ناسيحاتتاۋشىسى, جاناشىرى بولىپ كەلە جاتىر. سونىمەن قاتار كەشەگى رابيعا ەسىمجانوۆا, جامال وماروۆالاردىڭ سارقىتى, كوزى. بۇگىنگى تاڭدا سول كوشتىڭ باسىندا تۇرعان ءورشىل, جىگەرلى, نامىستى ءانشىمىز.
«جاقسى ءان ورىنداۋشىسىن تاپسا, يەسىن تورگە سۇيرەيدى» دەگەن, بىردە نۇرعيسا تىلەنديەۆ اعامىز باعداتتى شاقىرىپ الىپ: «قاراعىم, وسى سەنى ء«وز ەلىمدى» جاقسى ورىندايدى دەپ ەستيمىن. تىڭداپ كورەيىنشى», دەيدى عوي. تىڭدايدى. باعداتتىڭ ساحنادا سايگۇلىك اتتاي تىقىرشىپ, شابىتىنا قامشى ۇرىپ, ءاننىڭ بولمىسىن بەرۋدەگى ەنەرگياسىنا, كۇش-قۋاتىنا ريزا بولادى. ءاندى جاي عانا ء«وز ەلىم» دەپ ەمەس, «بۇل – مەنىڭ ەلىم, بۇل – مەنىڭ جەرىم» دەگەن رۋحپەن, جىگەرمەن, جان دۇنيەسىمەن جەتكىزەدى. ۇناعانى سونشا, وركەسترگە شاقىرىپ, وزىنە قايتا وركەستروۆكا جاساپ, ايتقىزادى. سوندا نۇراعا: «باعداتتىڭ ءاندى ايتۋ تراكتوۆكاسى بولەك قوي, شىركىن! اسىرەسە حالىق اندەرىن وزىندىك وزگەشە ستيلمەن بەرەدى. ءارى ءاندى نوتامەن ەمەس, جۇرەكپەن, قازاقى جان بەرىپ ورىندايدى», دەپ باعا بەرگەن. وسىلايشا, نۇراعاسى وزىنە عانا ارنايى رەپەرتۋار جاسايدى. قازىر ساناسا, ون جىلدا بارلىعى جيىرماعا جۋىق ءاندى وركەسترگە ارناپ جازىپ بەرىپتى. سوندا عوي, «وتىرار سازى» وركەسترىندەگى مۋزىكانتتار نۇراعاڭنىڭ ۇجىمدا ۇزاق جىلدار ءان سالعان انشىلەردىڭ وزىنە وسىنشاما ءاندى جازباعانىن تاڭدانىسپەن ايتادى ەكەن. بۇل ارينە ءانشىنىڭ باعى ءارى جەتىستىگى ەدى.
بۇگىندە ءانشىنىڭ تولقۇجاتىنا اينالعان «سارىارقا» شە! «قازاقستان» شە! ءاندى وزىنە عانا ءتان داۋسىمەن قۇبىلتىپ, كەڭ تىنىستى ۇنىمەن, جۇرەكپەن شارىقتاتا ايتقاندا, شىنىندا دا سارىارقانىڭ سايىن دالاسىن كوز الدىڭىزعا اكەلەدى. «قازاقكونتسەرتتە» باعدات ۇزاق جىلدار ءان سالعان «سامال» حالىق اسپاپتار وركەسترىنىڭ جەتەكشىسى بولعان بەلگىلى كومپوزيتور ۆلاديمير پيتەرتسەۆ: «باعدات ءان سالعاندا بۇكىل قازاقتىڭ ەن دالاسىن قۇشاعىنا سىيدىرىپ ايتادى» دەپ, ول دا ۇلكەن باعا بەرگەن. ال باعداتتىڭ ونەردەگى قۇربىسى, قازاقتىڭ روزاسى (رىمباەۆا) ءبىر سۇحباتىندا: «قازىرگى زاماندا نە كوپ, ءانشى كوپ. بىراق سونىڭ ىشىندە ءانشىنىڭ دە ءانشىسى بار. باعداتتىڭ انشىلىك ونەرىندە قازاقى بوياۋ جاتىر. بۇگىندە ۇلكەن اپالارىمىز ومىردەن ءوتىپ كەتتى. باعدات ءوزى كەزىندە سول اپالارىنان ءتالىم-تاربيە العان. قازىر ءوزى ۇستاز رەتىندە جاستارعا ءدارىس بەرىپ ءجۇر. قازاقتىڭ حالىق اندەرى قالاي بولۋى كەرەك دەگەندە, بۇگىنگى جاستارىمىز ەسترادا ەمەس, حالىق اندەرىندەگى يىرىمدەردى تابۋ, تابيعاتىن اشۋ, ونىڭ بۇكىل ءداستۇرىن, كەڭدىگىن كورسەتۋ جاعىنان باعدات اپالارىنان كوپ تاربيە الۋى, ۇيرەنۋى كەرەك», دەگەن ەدى.
باعداتتىڭ بۇگىنگى تىڭدارماندارى, اسىرەسە جاستار بىلە بەرمەيتىن ەرەكشەلىگى – ول تەك قازاقتىڭ عانا ەمەس, كەزىندە ورىستىڭ, قىرعىزدىڭ دا حالىق اندەرىن ولاردان اسىرماسا, كەم ايتپادى. ءبىر عانا مىسال. وندا كەڭەس وداعىنىڭ كەزى. ءنوۆوسىبىر قالاسىندا وتەتىن بۇكىلوداقتىق كورمەدە قازاقستان پاۆيليونىنا كەلۋشى قوناقتارعا ورىسشا ءان سالۋعا باعداتتى اتتاي قالاپ اپارادى. ويتكەنى ونىڭ رەپەرتۋارىندا ورىستىڭ التىن داۋىستى ءانشىسى ليۋدميلا زىكينانىڭ «مات زەمليا مويا», حالىق اندەرى «كوروبەينيكي», ت.ب. ءبىراز ءان بار ەدى. داۋسىنىڭ كەڭدىگى, كومەيدەن كەۋلەگەن سىڭعىرى, ءاننىڭ تابيعاتىن ءتۇسىنىپ, جۇرەگىنەن وتكىزىپ ايتاتىنى زىكينادان ءبىر كەم ەمەس. مىنە, سول جولعى كورمەدە باعدات ورىستىڭ حالىق اندەرىنەن پوپۋرري ورىنداپ جاتقاندا ءنوۆوسىبىر قالاسىنىڭ مەرى توقتاپ, ءان بىتكەنشە اسقان ريزاشىلىقپەن تىڭداپ تۇرادى. ول كەزدە ۇيالى تەلەفون جوق, كەشكە قاراي دۇكەن ارالاپ كەتكەن باعداتتى شارق ۇرىپ ىزدەسىن. سويتسە, گۋبەرناتور مىرزا كەشكى قوناقاسىنا قازاقستاندىق ورىسشا ءان ايتقان سول قىزدارىڭىز كەلسە دەپ قولقا سالسا كەرەك. ءسويتىپ, ءبىر كەش بويى ورىسشا ءان سالدىرعان عوي. بىراق باعدات 1986 جىلعى جەلتوقسان كوتەرىلىسىنەن كەيىن ورىسشا ءان ايتۋدى قويادى. مىنە, باعداتتى نامىستى ءانشى دەگەنىمىز سول.
قىرعىز اعايىندار دا باعداتتى وتە جاقسى كورىپ, سىيلايدى, قۇرمەت-تەيدى. قىرعىزدىڭ حالىق اندەرى «جال جالىم», «نارىندان جازعان سالەم حاتتى» قىرعىزدان ارتىق ورىندايتىنى سونشا, قاشاندا قىرعىزستاندا وتەتىن ۇكىمەتتىك كونتسەرتتەرگە ارنايى شاقىرتاتىن. ءتىپتى ماناستىڭ مىڭ جىلدىق تويىندا دا «قۇدا ءتۇسىپ», وسى «جال جالىمدى» ورىنداتقان.
بىردە 90-جىلدارى الماتىداعى رەسپۋبليكا سارايىندا ەكى ەلدىڭ – قىرعىز اعايىنداردىڭ «مىسقىل», قازاقتاردىڭ «تاماشا» ويىن-ساۋىق وتاۋىنىڭ بىرلەسكەن كونتسەرتى وتەدى. سول كونتسەرتتە باعدات قازاقشا دا, قىرعىزشا دا ءان سالادى. سوندا عوي, قازاقتىڭ بەلگىلى ساتيريك جازۋشىسى سادىقبەك ادامبەكوۆ اعامىز ىنىلەرى جاراسقان ابدىراشەۆ پەن كوپەن امىربەككە: «مىنا كىتابىمدى قازاقشا كەرەمەت ءان سالعان قىرعىزدىڭ باعدات دەگەن قىزىنا بەرسەم دەپ ەدىم. كەلەشەكتە قازاقستانعا اكەلىپ ءان سالدىرتۋعا كۇش سالايىق», دەسە كەرەك. كوپەكەڭ بولسا: «باعداتتى بىلمەگەنىڭىز ۇيات قوي, اعا. ءوزىمىزدىڭ قىزىمىز عوي», دەپ قاتتىراق ايتىپتى. ال سول جولى قىرعىزستاننىڭ قازاقستانداعى ەلشىسى اكبار رىسقۇلوۆ «باعدات ەكى ەلدىڭ اراسىنداعى التىن بەلدىك قوي» دەپ قىزىمىزعا ارناپ «قازاق – قىرعىز اراسى» دەگەن ولەڭ جازادى. وعان التىنبەك قورازباەۆ اعاسى ءان جازىپ, ونى ءبىراز جىلدان بەرى ورىنداپ ءجۇر.
كەيىننەن الماتىدا تاعى ءبىر ەلارالىق ۇكىمەتتىك جيىنعا سول كەزدەگى قىرعىزستاننىڭ تۇڭعىش پرەزيدەنتى اسقار اقاەۆ كەلىپ قاتىسىپ, كونتسەرتتىڭ سوڭىندا ساحناعا كوتەرىلىپ, فينالعا شىققان ارتىستەرگە بارىپ: «قازاق – قىرعىز اراسى» ءانىن ورىنداعان قىز قايدا؟» دەپ ءبىر قۇشاق گۇل سىيلايدى.
«انامدى وزگەشە ساعىنامىن...»
باعدات – تاعدىرلى ءانشى. ءومىر ونى ماڭدايىنان سيپاي قويمادى. جەتى جاسىندا اناسىنان, سەگىز جاسىندا اكەدەن ايىرىلىپ, اعايىندى ءۇش قىز, ءبىر ۇل اجەسى ءدىلدابالا مەن كىشى اكەسى ءحاميدىننىڭ تاربيەسىندە وسەدى. اناسى جىرعاش جيىن-تويلاردا ءان سالىپ, جارقىلداپ وتىراتىن, ءازىل-قالجىڭعا جاقىن كوپشىل ادام بولعان. قاشاندا سول جيىندارعا كەنجە قىزى باعداتىن ىلەستىرىپ, قاسىنان تاستامايتىن. اكەسى ءساميدىن – اۋىلدا بريگادير. بىردە ورىس, شەشەن مەن قازاقتار سوزگە كەلىپ, ارتى توبەلەسكە ۇلاسادى. ۋشىققانى سونشا, ارقايسىسى قولدارىنا تۇسكەن ايىر, بالتا الىپ جۇگىرىسەدى. ءبىرىن-ءبىرى قۋىپ, جۇگەرىنىڭ ىشىنە كىرگەندە, تاسادا تۇرعان ورىس جىگىتى باعداتتىڭ اكەسىنىڭ باسىنان كەتپەنمەن شاۋىپ جىبەرەدى. سودان ول كىسى ءولىم اۋزىنان قالعانىمەن, سويلەگەندە ءتىلى كۇرمەلىپ, ءبىر اياق, ءبىر قولى كەم بولىپ قالادى. اناسى دۇنيەدەن وتكەن سوڭ, اكەسىنىڭ دەنساۋلىعى كۇرت ناشارلاپ, اراعا جىل سالىپ باقيلىق بولادى.
اتا-اناسى قايتىس بولعان سوڭ, قىرعىزستاندا تۇراتىن اكەسىنىڭ تۋعان ءىنىسى ءحاميدىن قارا شاڭىراقتى ويسىراتىپ المايىق دەپ, ۇلكەن قىزمەتىن تاستاپ, اۋىلعا كوشىپ كەلەدى. ول كىسىنىڭ پەرزەنتى بولماعاندىقتان, اعاسىنىڭ بالالارىن باۋرىنا باسىپ, ءوز پەرزەنتىندەي باعىپ-قاعادى. كىشى اكەلەرى اقىلدى, ەل اراسىندا بەدەلدى, ارتىق سويلەمەيتىن, وتە اقكوڭىل, دومبىرا, ماندالينا تارتىپ, ولەڭ جازاتىن اۋىلدىڭ زيالىسى ەدى. ءسوزدى ورنىمەن قولدانباسا: «نە, پالە, قالاي بولسا سولاي, قيقى-جيقى سويلەيسىڭدەر», دەپ رەنجيتىن كورىنەدى. وسىلايشا, تازالىققا, جىگەرلىلىك, قۇلشىنىسقا ۇيرەتكەن كىشى اكەسى «وسى قىزىم ءبىر جەردەن شىعادى» دەپ بەتىنە ەشكىمدى قاراتپايدى. اجەسى بولسا: «اتتەڭ, ۇل بولىپ تۋماعانىڭ-اي سەنىڭ», دەيدى ەكەن. ونىسى – نەمەرەسىنىڭ ءۇيدىڭ دە, ءتۇزدىڭ دە شارۋاسىن تياناقتى ءارى شاپشاڭ قيمىلداپ, دوڭگەلەتىپ اكەتەتىنىنە ريزا بولعانى. مالدىڭ استىن تازالاپ, ءشوبىن سالىپ, سۋاردى. سيىر دا ساۋدى. كەشكىلىك بار جۇمىستى ءبىتىرىپ, مالدى كىرگىزگەن سوڭ-اق سولاردىڭ الدىندا تۇرىپ «بۇلبۇلدى», «القوڭىردى» بار داۋسىمەن ايتاتىن. كەيدە تۇندە اجەسى ەكەۋى مالدى قاراۋعا شىققاندا دا, قاي جاعىنان ءانى تاسىپ تۇراتىنىن, شىرقاي جونەلگەندە: «اينالايىن, جارىم تۇندە قاقساماي قويساڭشى», دەپ اپاسى ويبايىن سالادى ەكەن. اجەسى 1975, اعاسى 1986 جىلى دۇنيەدەن ءوتتى. مىنە, وسىنداي جاناشىر جانداردان ومىردە كوپ نارسە ۇيرەنگەن باعدات ءانشى بۇگىنگى جەتكەن جەتىستىگىنە وسى كىسىلەردىڭ ەڭبەگى زور بولعانىن, ولاردىڭ سەنىمدەرىن اقتاۋعا تىرىسقانىن ەرەكشە ساعىنىشپەن ەسكە الادى.
«اناڭىزدى قانداي كەزدە ەسىڭىزگە الاسىز؟» دەگەن ساۋالىمىزعا: «شەشەمنىڭ كوزى ك ۇلىپ تۇراتىن. حاديشا اپكەم ەكەۋمىز «اپاما مەن تارتقانمىن» دەپ تالاساتىنبىز. اۋىلداعىلار «سەن تارتقانسىڭ» دەيدى. اپكەمنىڭ كوڭىلىنە قاراپ, «سەن-اق تارتا بەرشى» دەپ قوياتىنمىن. اكەمدى ويلاپ قويامىن دا, انامدى ەت جۇرەگىم ەزىلە وزگەشە ساعىنامىن. مەن اتا-ەنەممەن 16 جىل بىرگە تۇردىم. العاش تۇرمىسقا شىعىپ, قاتتى قينالعان شاعىمدا, بولماسا ادىلەتسىزدىككە تاپ بولعاندا وڭاشادا اپا دەپ ايعايلاپ, وكىرىپ جىلاپ الاتىنمىن», دەدى كوزدەرىنە جاس تۇنعان ءانشى.
ۇستاز ءتالىمى
باعدات جامبىل وبلىسى مەركى اۋدانىندا ون جىلدىقتى تامامداعان سوڭ, الماتىداعى رەسپۋبليكالىق ەسترادا-تسيرك ونەر ستۋدياسىنا وقۋعا تۇسەدى. اۋىلدان ءانشى بولسام دەپ ارمان ارقالاپ كەلگەن بويجەتكەننىڭ باعى شىعار, كەرەمەتتەي پەداگوگتىڭ قولىنا تۇسەدى. قانشاما اتاقتى انشىلەردىڭ ۇستازى بولعان ناديا شاريپوۆا ونەردە عانا ەمەس, ومىردە دە شاكىرتىنە جول سىلتەپ وتىردى. باعداتتى قىزىنداي وتە جاقسى كورگەنى سونشا, جانىنان تاستاماي, كەيدە ساباق بىتكەن سوڭ ۇيىنە الىپ كەتەتىن. ونىڭ دالەلى, بىردە قازاقتىڭ الەمدىك دەڭگەيدەگى ءانشى قىزى مايرا مۇحامەدقىزىنىڭ جاڭادان ەلگە كەلىپ جاتقان كەزى, ۇستازى ناديا اپايىنىڭ ۇيىنە دايىندالۋعا بارادى. سوندا قابىرعادا ءىلىنىپ تۇرعان باعداتتىڭ فوتوسىن كورىپ, «مىناۋ ءانشى اپاي عوي», دەسە كەرەك. سوندا ول كىسى: «مەنىڭ الدىمنان قانشاما ستۋدەنت ءدارىس الىپ, ءبىتىرىپ شىقتى. بىراق سونىڭ ىشىندە باعداتتى جاقسى كورگەنىم سونشا, قىزىمداي بولدى», دەگەن عوي.
«ومىرىمدە ونداي زيالى, مەيىرىمدى, انامنىڭ ورنىن تولتىرعانداي بولعان پاراساتتى جاندى كورمەدىم. ال وقۋدى بىتىرىسىمەن «قازاقكونتسەرتكە» جۇمىسقا كىردىم. ونەردە ناديا اپايعا, سوسىن ىستىق-سۋىعىما ورتاقتاسىپ, جاقسى-جامانىمدى كوتەرە بىلگەن قاسيەتتى قارا شاڭىراققا قارىزدارمىن. التىنبەك اعا دا قاشاندا قولداۋ كورسەتەتىن. بۇگىنگى تاڭدا بۇل ۇجىمدى بەلگىلى ازامات تايىر قاراتاەۆ قولىنا الدى», دەيدى ءانشى قىزىمىز.
ساحنادا جارتى عاسىرعا جۋىق ءان سالىپ, حالقىنا بىرنەشە رەت ەسەپ بەرگەن كونتسەرتتەرىندە «ەلگە سالەم», «مەن دالانىڭ قىزىمىن...», «حالقىم – بارىم, ونەرىم – ارىم, ءومىر – باعىم», ء«ان – جۇرەگىم» دەگەن تاقىرىپتارىنىڭ ءوزى ونىڭ ەلىن, جەرىن, قازاعىن قانشالىقتى جاقسى كورەتىنىنەن حابار بەرسە كەرەك.
«راسىندا دا, مەن دالانىڭ قىزىمىن, – دەيدى ءانشىمىز اعىنان جارىلا. – دالا – ول مەنىڭ تامىرىم, تۇعىرىم, بەت-بەينەم, بولمىسىم, ارىم. سول دالانىڭ بۇكىل قاسيەتىن بىلەمىن, سول دالانىڭ ءتۇتىنىن, سول دالانىڭ جۋسانىن يىسكەپ ءوستىم. سول دالادا قازاقتىڭ بارلىق سالت-ءداستۇرىن تولىق بولماسا دا, ءبىر كىسىدەي ءبىلىپ ءوستىم. ەگەر بۇگىن ءبىر نارسەگە قولىم جەتىپ جاتسا, سول دالادان ءنار, ءتالىم-تاربيە العانىم. سول ءۇشىن دە قازاق ەكەنىمە وسى جەردە ماقتانا الامىن. ونىڭ ۇستىنە تىڭدارماندارىمنىڭ, مەنى جاقسى كورەتىن كورەرمەنىمنىڭ دەنى اۋىلدا.
اسىل قازىنا – فولكلوردا
«بۇگىندە قازاقتىڭ حالىق اندەرىنە دەگەن ەلدىڭ, جۇرتتىڭ ىقىلاسى كەمىپ بارا جاتقانداي. باياعىداعىداي «وي, شىركىن دۇنيە, ىشتەگى ارمانىن ايتىپ تۇر عوي» دەپ ءوزىنىڭ جوعىن ىزدەپ وتىراتىن تىڭدارمانداردى جوعالتىپ الدىق. بىراق ويلى دا سانالى, سارابدال تىڭدارماندارىمىز دا بارشىلىق. دەگەنمەن جاستارعا وي سالۋىمىز كەرەك. ەسكىلىكتىڭ ءانى دەپ قارايدى. سول ەسكىلىكتىڭ انىنەن شەدەۆر جاساعان ديماشىمىز «دايديداۋمەن» بۇكىل الەمدى اۋزىنا قاراتىپ, تاڭعالدىرىپ وتىرعان جوق پا؟ ستۋدەنتتەرگە ءدارىس بەرگەندە, «نەگە حالىق اندەرىنە ءبىرتۇرلى, جەڭىل كوزقاراسپەن قارايسىڭدار. ءبىزدىڭ اسىل قازىنامىز فولكلوردا. ءبىز سول حالىق اندەرىنەن باستاۋ الامىز», دەيمىن. قازىر شەتەلدىڭ جەڭىل اۋەنىنە ەلىكتەۋشىلەر باسىم. كوپ ەلىكتەگەننەن دە ول ءان ومىرشەڭ بولا المايدى. سوندىقتان دا باردىم-كەلدىم اندەر بۇگىن ايتىلسا, ەرتەڭ ۇمىتىلىپ قالىپ جاتادى...»
باقىتتى ءانشى
باعدات – دارا دارىنىمەن بىرگە اقىل-پاراساتى تەڭ ءانشى. ۋاقىتتىڭ تالابىنا ساي ىزدەنگىش قاسيەتى ۇنايدى. تىنىمسىز. قولعا العان ءىسىن بىتىرگەنشە تىنىم تاپپايدى. ەڭبەكقور. سۇلۋلىققا جانى قۇشتار. جالپى, ءومىر, قوعام جايلى ءوز ويى بار ءانشى. كوپ وقيدى. ءاندى الىپ شىعاتىن ءسوزى بولعاندىقتان, وعان اسا قاتتى ءمان بەرەدى. تۋعاننىڭ, باۋىردىڭ, دوستىقتىڭ پارقىن بىلەدى, باعالايدى. ومىردە اياۋلى انا, سۇيىكتى دە قامقور اجە, ادال دوس, جاناشىر باۋىر. باعداتتىڭ بار بايلىعى ەكى بالاسى بولسا, ولاردىڭ دا بايلىعى, قازىناسى – انالارى. قاشان كورسەڭ ءدان سۇيرەگەن قۇمىرسقاداي قوس قاراشىعىن شاماسى كەلگەنشە باعىپ-قاقتى, وقىتتى, تاربيە بەردى. بالالارىن بىرەۋدىڭ ارقاسىندا ەمەس, ءوز باسىن الىپ جۇرۋگە, ءوز ماسەلەلەرىن ءوزى شەشە الاتىنداي ەتىپ تاربيەلەۋگە كۇش سالدى. مەرۋەرت تە, مارال دا «حابار» تەلەارناسىنىڭ بەلدى قىزمەتكەرلەرى. شۇكىر, قازىر ءۇش نەمەرەسى بار. ال ءاربىر انانىڭ ارمانى – بالالارى امان-ەسەن بولىپ, نەمەرەلەرىنىڭ قىزىعىن كورۋ.
ىزدەنگىش ونەر يەسى كەيىننەن ءوز ۇلتىنىڭ ءتىلىن, ادەبيەتىن, رۋحانياتىن تەرەڭ ءبىلۋ ماقساتىندا قازۇۋ-نىڭ فيلولوگيا فاكۋلتەتىن دە ءتامامدادى. بۇگىندە استاناداعى قازاق ۇلتتىق ونەر ۋنيۆەرسيتەتىندە ەسترادا-ۆوكال كافەدراسىندا پروفەسسور, «قازاقكونتسەرتتە» دە ءان سالادى. شىعارماشىلىقپەن قاتار, شاكىرت تە تاربيەلەپ كەلەدى. ءوزىن باقىتتى ءانشىمىن, باقىتتى انامىن دەپ ەسەپتەيدى.
...قازىر ءومىر ىرعاعى وزگەردى, قاربالاس ۋاقىت. بۇگىندە قاي سالانىڭ ادامىندا بولماسىن, اسىعىس تىرلىك. باعدات كەشەگى كۇنى دە, بۇگىن دە وزىنە عانا سەندى, حالقىنا سەندى. سوندىقتان دا ونىڭ بار تىلەۋى – حالقى امان, سۇيىكتى كورەرمەنى كوپ بولسا. زادى, ءانشى ءۇشىن, ونەر ادامى ءۇشىن حالقى ارداقتاپ, قۇرمەتكە بولەگەننەن ارتىق اتاق تا, داڭق تا جوق. باعداتىمىز جاقسى اندەرىمەن ساعىندىرىپ جۇرسە دەيمىز... لايىم سولاي بولسا ەكەن...
گۇلزەينەپ سادىرقىزى,
«Egemen Qazaqstan» ارداگەرى
