سەناتورلار «دەموگرافيالىق ەرەكشەلىكتەردى ەسكەرە وتىرىپ ەلىمىزدىڭ اۋىلدىق ايماقتارىن دامىتۋ» تاقىرىبىندا وتكەن كەزدەسۋ بارىسىندا اۋىل حالقى بارلىق ۋاقىتتا قالاعا قاراعاندا ەداۋىر كوپ بولعانىن اتاپ ءوتتى. الايدا بۇگىندە جاعداي وزگەرىپ كەلەدى. قازىر ەلىمىزدە قالا جانە اۋىل تۇرعىندارىنىڭ تابىسىنداعى ايىرماشىلىق جوعارى ەكەنى بايقالىپ وتىر.
«ايىرماشىلىقتىڭ نەگىزگى سەبەبى ەڭبەك سيپاتىنا بايلانىستى. ستاتيستيكالىق اقپاراتتاردى نەگىزگە الاتىن بولساق, ءوزىن-ءوزى جۇمىسپەن قامتۋدان تۇسەتىن تابىس ۇلەسىنىڭ سالماعى قالا تۇرعىندارىنا قاراعاندا اۋىلدىق جەرلەردە جوعارى. ءوزىن-ءوزى جۇمىسپەن قامتىعان ازاماتتاردىڭ باسىم بولىگى جەتكىلىكتى تابىس الا المايدى جانە ولاردىڭ 49,5 پايىزى ايىنا 100 مىڭ تەڭگەدەن از تابىس تابادى, ولاردىڭ ىشىندە 3,4 پايىزىنىڭ تابىسى ەڭ تومەنگى كۇنكورىس دەڭگەيىنەن دە تومەن. ءىرى قالالاردان شالعايداعى اۋىلدىق اۋماقتارداعى اۆتوموبيل جولدارىنىڭ جىل سايىنعى ساپاسىنىڭ تومەندەۋى, حالىقتىڭ ورتالىقتاندىرىلعان اۋىز سۋعا, ينتەرنەت-كوممۋنيكاتسياعا قول جەتكىزە الماۋى مەن مادەني ورىندار دەڭگەيى سەكىلدى ماسەلەلەر اۋىلدى اۋماقتارعا تارتىمدىلىقتى ودان سايىن تومەندەتىپ وتىر», دەدى رۋسلان رۇستەموۆ.
كەزدەسۋگە قاتىسۋشىلار اۋىلدى دامىتۋ, ءبىلىم بەرۋ, دەنساۋلىق ساقتاۋ, تۇرعىن ءۇي جانە كولىك ينفراقۇرىلىمى ماسەلەلەرىن تالقىلادى.
ۇلتتىق ەكونوميكا مينيسترلىگى وكىلىنىڭ ايتۋىنشا, مەملەكەت باسشىسىنىڭ تاپسىرماسىنا سايكەس, اۋىلدىق اۋماقتاردىڭ گەوگرافيالىق ەرەكشەلىكتەرى مەن باسەكەلەستىك ارتىقشىلىقتارىن ەسكەرە وتىرىپ, ولاردىڭ الەۋمەتتىك-ەكونوميكالىق الەۋەتىن اشۋعا باعىتتالعان اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسى ىسكە اسىپ كەلەدى. جالپى العاندا, تۇجىرىمداما الەۋمەتتىك, ينجەنەرلىك جانە كولىك ينفراقۇرىلىمىن دامىتۋعا, اۋىلدىق ەلدى مەكەندەردە كەڭ جولاقتى ينتەرنەتكە قول جەتكىزۋدىڭ تەحنيكالىق مۇمكىندىكتەرىن پايدالانۋعا باعىتتالعان.
كەزدەسۋ «دەموگرافيالىق ءوسۋ – ۇلتتىڭ باسەكەلەستىك ارتىقشىلىقتارىنىڭ نەگىزى» تاقىرىبىنا ارنالعان ۇكىمەت ساعاتىنا دايىندىق اياسىندا ۇيىمداستىرىلدى.
