ينۆاتاكسي: سانى مەن ساپاسى قانداي؟

استاناداعى ەرەكشە قاجەتتىلىگى بار تۇرعىندار پارتياعا جۇگىنىپ, ينۆاتاكسي تاپشىلىعى ماسەلەسىن شەشۋگە كومەك كورسەتۋدى وتىنگەن. وسىعان وراي پارتيانىڭ رەسپۋبليكالىق قوعامدىق قابىلداۋ بولمەسى كولىك, ەڭبەك جانە حالىقتى الەۋمەتتىك قورعاۋ, دەن­ساۋلىق ساقتاۋ مينيسترلىكتەرى جانە استانا قالاسى اكىمدىگى وكىلدەرىنىڭ قاتىسۋىمەن دوڭگەلەك ۇستەل ۇيىم­داستىردى.

جوعارى سۇرانىسقا قاراماستان, قالادا تەك 6 ينۆاتاكسي بار. ول – گيدراۆليكالىق كوتەرگىشى بار ارنايى كولىكتەر. سارىارقا اۋدانى اكىمىنىڭ ينكليۋزيا جونىندەگى شتاتتان تىس كەڭەسشىسى جانات قابدوللانىڭ ايتۋىنشا, ينۆاتاكسيلەر تاڭعى ساعات 9-دان كەشكى ساعات 6-عا دەيىن عانا جۇمىس ىستەيدى. بۇل ەرەكشە قاجەتتىلىگى بار ادامداردىڭ ءجۇرىپ-تۇرۋىن ايتارلىقتاي شەكتەيدى.

«مۇنداي كەستەمەن تۇنگى كورسە­تىلىمگە كينوعا دا بارا المايسىڭ. سونىمەن قاتار ەرەكشە قاجەتتىلىگى بار ادامدار كولىككە ءوز كۇشىمەن وتىرا المايدى. ماسەلەن, ەلەكتر ارباعا تاڭىلعان ادامداردى ايتۋعا بولادى. مەنىڭ اربامنىڭ سالماعى 120 كيلو ءارى جينالمايدى. بۇل جىل سايىن قايتالانىپ جاتقان ماسەلە, سەبەبى ءبىز قىستا سىرتقا شىعا المايمىز. ويتكەنى بوراندا ايالدا­ما­عا جەتە المايسىڭ, ال ماماندان­دى­رىل­عان ارنايى تاكسي بارلىعىنا بىردەي جەتە بەرمەيدى», دەدى جانات
قابدوللا.

استانا قالاسىنىڭ تۇرعىنى اسەم­گۇل ءابدىراحمانوۆا ەرەكشە قاجەت­تىلىگى بار ادامداردىڭ قوعامدىق كولىكتى كەڭىنەن پايدالانۋى ءۇشىن كوممۋنالدىق قىزمەتتەردىڭ جۇمىسىن جاقسارتۋ قاجەت دەپ سانايدى. ومبى قار ءجۇرىپ-تۇرۋىندا اقاۋى بار مۇگە­دەكتەرگە كەدەرگى كەلتىرەدى.

«كولىكتەر 2010 جىلدان بەرى جا­ڭارتىلماعان. جولاي بۇزىلىپ قالاتىن كەزدەر دە بولادى. امال جوق, ءوز ەسەبىڭنەن قاراپايىم تاكسيگە اۋىسىپ وتىرۋعا تۋرا كەلەدى. كەيدە ديسپەتچەرگە حابارلاسۋ دا قيىن. قوعامدىق كولىكتەرگە كەلەتىن بولساق, 10 جىلدا ايتارلىقتاي وزگەرىس بولعانىن بايقادىم. قازىر جۇرگىزۋشىلەر پاندۋستى ءتۇسىرىپ, جاعداي جاسايدى. ياعني وڭ وزگەرىس بار», دەدى ول.

ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتىنا سايكەس, بىلتىر استانا جانە الماتى قالالارىندا ەرەكشە قاجەتتىلىگى بار ادامدار ءۇشىن ينۆاتاكسي قىزمەتىن كورسەتۋ كەزىندە تاكسي اگرەگاتورلارىن پايدالانۋدىڭ قاناتقاقتى جو­باسى سىناقتان وتكىزىلدى. بۇل قىز­مەت ءبىر جىلدا 53,9 مىڭ رەت پاي­دالانىلعان. ەكى قالادا اتالعان قانات­قاقتى جوباعا 639 ادام قاتىستى. جوبا اياسىندا ازاماتتار «ياندەكس Go» ءموبيلدى قوسىمشاسى ارقىلى ينۆاتاكسي نەگىزىندە جەڭىل اۆتوكولىكتەرگە تاپسىرىس بەرە الادى.

2024 جىلى ەلوردادا ينۆاتاكسي قىزمەتىنە شامامەن 1,2 ملرد تەڭگە قاراستىرىلعان. بۇل تۋرالى استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب مالىمدەدى. «ەگەر «ياندەكس Go»-مەن كووپەراتسيا ءسات­تى جالعاساتىن بولسا, مەملەكەت قاراجاتتى قالاي ءتيىمدى ءبولۋ كەرەك ەكەنىن انىقتاۋ ءۇشىن بەلگىلى ءبىر ساپار سانىن كۇنىنە 3-4 رەت بەلگىلەۋدى ۇسىنامىز. تاكسي باعاسى ماۋسىم سايىن وزگەرەتىنىن ەسكەرسەك, قىستا تاريف باعاسى قىمباتتايدى», دەدى ول.

پارتيانىڭ رەسپۋبليكالىق قوعام­دىق قابىلداۋ بولمەسىنىڭ مەڭگەرۋ­شى­سى ءاليا سادىرباەۆانىڭ ايتۋىنشا, ەلوردادا ينۆاتاكسي تاپشىلىعىن شەشۋ – وزەكتى ماسەلەنىڭ ءبىر پاراسى عانا. «پارتيانىڭ قوعامدىق قابىل­داۋ بولمەلەرىنە جۇگىنگەن ەرەكشە قاجەتتىلىگى بار ادامداردىڭ ءوتىنىشى ولار­دىڭ ءال-اۋقاتىن جاقسارتۋعا ەرەكشە نازار اۋدارۋدى قاجەت ەتەتىنىن كورسەتەدى. بىلتىردىڭ وزىندە 4,2 مىڭعا جۋىق ءوتىنىش كەلىپ ءتۇستى. مىن­دەتىمىز – بارلىق ازاماتقا, اسى­رەسە ءجۇرىپ-تۇرۋىندا اقاۋى بار ادام­دارعا قولجەتىمدى, قولايلى ورتا قالىپ­تاستىرۋ», دەدى ول.

ايتا كەتەيىك, ەرەكشە قاجەتتىلىگى بار ادامداردى قولداۋ – «Amanat» جۇمىسىنداعى باستى باسىمدىقتىڭ ءبىرى. ماسەلەن, پارتيانىڭ «حالىقپەن بىرگە» سايلاۋالدى باعدارلاماسىن جۇزەگە اسىرۋ اياسىندا بىلتىر مەدي­تسينالىق مەكەمەلەردىڭ ەلەك­تروندىق قۇجاتى نەگىزىندە مۇگەدەكتىكتى بەلگى­لەۋ ۇدەرىسى زاڭنامالىق تۇردە بەكى­تىلدى. سونىمەن قاتار 5 مىڭعا جۋىق الەۋمەتتىك نىسان بەيىمدەلۋ, دامۋ كەمىستىگى جانە ولاردىڭ تۋىنداۋ قاۋپى بار جاس بالالارعا ارنالعان 8 ەر­تە ارالاسۋ ورتالىعى اشىلدى. سون­داي-اق مەكتەپتەردە ينكليۋزيا­نى قولداۋدىڭ 61 كابينەتى اشىلدى. بۇ­دان بولەك, بيىل 1 قاڭتاردان باس­تاپ I توپتاعى مۇگەدەكتىگى بار ادام­دار­عا ارنالعان جاردەماقى 89 248 تەڭ­گەدەن 95 496 تەڭگەگە دەيىن, II توپ­تاعى ادامداردىڭ جاردەماقىسى 71 398 تەڭ­گەدەن 76 397 تەڭگەگە دەيىن, III توپتاعى ازاماتتاردىڭ جاردەماقىسى 48 681 تەڭگەدەن 52 089 تەڭگەگە دەيىن ءوستى.

تالقىلاۋ قورىتىندىسى بويىنشا, ءىس-شاراعا قاتىسۋشىلار پارتياعا جۇگىنگەن استانا تۇرعىندارىن كولىك مينيسترلىگى جانىنداعى جۇمىس توبىنا مۇشەلىككە كىرگىزۋ تۋرالى كەلىسىمگە كەلدى. جۇمىس توبى مۇگەدەك ادامداردى تاسىمالداۋ قىزمەتىنە قاتىستى قولدانىستاعى ەرەجەلەرگە بىرقاتار تۇزەتۋ ازىرلەيدى.