ىرگەلى سۋرەتكەر, بەلگىلى دراماتۋرگ رەتىندە ول قازاق ادەبيەتىنە وراسان زور ۇلەس قوستى. عابيت مۇسىرەپوۆتەن باستاپ, وزىمەن قاتارلاس-قاناتتاس اعا-ءىنى قالامگەرلەردىڭ كوپشىلىگى ساكەڭنىڭ تالانتىن مويىنداپ, ونىڭ كوركەم تۋىندىلارى تۋرالى جاقسى, جىلى پىكىرلەرىن ايتتى جانە جازدى.
«اقىن عافۋ قايىربەكوۆ ساكەن ىنىسىنە:
مەرگەنسىڭ, اتقان وعى كەتپەس عاپىل,
ءبىر ءوزىڭ جەتى سەرى, جەتى باتىر.
تۋعان جەر – سارىارقانى ساعىنعاندا,
مەن سەنى ءبىر يىسكەسەم, جەتىپ جاتىر», دەپ تەگىن ايتپاعان.
ساكەن ءجۇنىسوۆتىڭ ەسىمىمەن ءبىز وتكەن عاسىردىڭ جەتپىسىنشى جىلدارىنان تانىسپىز. وندا مەكتەپ وقۋشىسىمىز. ادەبيەتشى ۇستازىمىز سەيسەك جاقىپجانوۆ ءسابيت مۇقانوۆتىڭ «اققان جۇلدىز», ساكەن ءجۇنىسوۆتىڭ «جاپانداعى جالعىز ءۇي», «اقان سەرى» ديلوگياسىنىڭ ءمان-مازمۇنىن ناقىشتاپ, مولدىرەتە ايتقاندا قۇلاعىمىز قالقايىپ, اۋزىمىز اشىلا ءۇنسىز وتىرىپ تىڭداعانبىز.
ول كەزدە كىتاپ دۇكەندەرىندە الماتىدان شىققان سۋ جاڭا جيناقتار تولىپ تۇرادى. «جاپانداعى جالعىز ءۇي» رومانىن ساتىپ العانداعى قۋانىشىم ەرەكشە بولدى. ەرتەڭگى ساباققا دايىندالۋدى ىسىرىپ قويىپ, رومان وقۋعا كىرىستىم.
«كۇن بەسىندىگە تايانا تاڭەرتەڭنەن بەرى جاپالاقتاپ جاۋعان قاردىڭ ارتى بورانعا اينالدى. مانا ءبىر كەزدە قوپ-قويۋ قارلى بۇلت بۇركەنگەن زەڭگىر اسپان از ۋاقىت كوگىلدىر تۇسكە بويانىپ ىسقاياقتانا اشىلعاندا, ەندىگى كەزەكتى ارقانىڭ جەلىنەن كۇتىپ تىم-تىرىس مونتانسي قالعان.
ءدال وسى مەزەتتى اڭدىعانداي كەشەدەن بەرى دەمىن ىشىنە تارتقان ىزعىرىق وتكىر جەل دە باياۋ كوتەرىلىپ, ۇرتىن تومپايتا قويدى. العاشقىدا س ۇلىق جاتقان جالپاق ءوڭىردىڭ اق كورپەسىن قاي جاعىنان تۇرەرىن بىلمەي, مىڭ قۇبىلىپ تۇردى دا, تەرىستىككە قاراي ءبىرجولاتا جونىن بەرە بۇرىلىپ العان سوڭ, ءىشىن تارتىپ, زور ۋىلگە باستى. جاڭا تۇسكەن ۇلپا قار ەن دالانىڭ بەتىندە جىلانشا يرەلەڭدەپ, جەر باۋىرلاي تىمىسكىلەپ كەزىپ ءجۇر. جەل گۋلەگەن سايىن قارلى جىلاندار باستارىن قايتا-قايتا كوتەرىپ الىپ, ەستەرى شىعا ويناقشىپ ميداي ارالاسا جونەلەدى. كوككە شاپشىپ شانشىلىپ, ءبىر-بىرىنە ايبات شەگىپ ىسىلداپ, ارباسىپ تۇرادى دا, جەرگە سىلق ەتىپ قۇلاپ, مىڭ بۇراتىلىپ, ۇمار-جۇمار دومالانعان كۇيى قايتا جوعارى شيىرشىق اتىلادى. بوران كوتەرىلىپ كەتتى...»
نە دەگەن سۋرەت! نە دەگەن بەينەلەر!
پروزا – تىلمەنەن, ءسوز ونەرىمەن سۋرەت سالۋ. ونسىز كەيىپكەردىڭ مىنەزى, زاماننىڭ بولمىسى, ۋاقىتتىڭ لەبىزى اشىلمايدى. كوز الدىڭا ەلەستەيتىن, كەيىپكەردىڭ مىنەزىن اشاتىن, وقۋشىنى تامساندىراتىن نارسە سۋرەت قوي.
قالىڭ روماندى ءبىر اپتادا وقىپ شىقتىم. سۇلۋمۇرت, حالەل مەن جالەل, رايحان مەن كۇرگەرەيدىڭ تاعدىر تالايى, ءجۇرىپ وتكەن جولدارى ەلەستەدى. «جاپانداعى جالعىز ءۇي» قازاق دالاسىنا جاسالعان كەڭەس داۋىرىندەگى جاعىمسىز ارەكەتتەردى اشكەرەلەۋ بولاتىن.
كەڭەس وكىمەتى ورناپ, قازاق دالاسى بوداندىق قامىتىن موينىنا ىلگەندەگى كەزەڭ تۋرالى اقيقاتتى مەيلىنشە اشىپ كورسەتكەن كوركەم شىعارماداعى تىڭ جانە تىڭايعان جەرلەردى يگەرۋ دەگەن سىلتاۋمەن قازاق دالاسىنىڭ استاڭ-كەستەڭ, اپىر-توپىرىن شىعارعانى شىندىق. قازاقتىڭ اتام زاماننان بەرى قالىپتاسقان تۇرمىس-تىرشىلىگىن تىزەگە باسا وتىرىپ وزگەرتىپ, وتارلاۋشى ەلدىڭ ءوز دەگەنىن ىستەگەن جىلدار. وزدەرىن وسى ەلدىڭ قوجايىنى سەزىنگەن باسقىنشىلار. ولارعا جارامساقتانعان, ايار, ەكىجۇزدى ءوز ىشىمىزدەن شىققان شولاق بەلسەندىلەردىڭ قۋلىق-سۇمدىعى, قىرىق ايلالى ءىس-ارەكەتتەرى جاعامدى ۇستاتىپ, جۇرەك شانشىعان.
«جاپانداعى جالعىز ءۇي» رومانىن كوتەرىپ تۇرعان قاراساي بەينەسى كەزىندە تالاي-تالاي اڭگىمەگە ارقاۋ بولدى, – دەيدى جازۋشى رامازان توقتاروۆ. – وتە كۇشتى, جان-جاقتى شىققان بەينە, كەز كەلگەن قازاق شارۋاسى ودان ءوزىن كوردى. سول ءۇشىن دە عوي اۆتورعا تۇرتپەكتىڭ كوبەيىپ كەتكەنى. سوڭىنا كولەڭكەلى بىرەۋلەر ءتۇستى. «ول ادام ومىردە بار ما؟ ءپروتوتيپى كىم؟ ونىڭ ايتقان سوزدەرىن كىمنەن ەستىدىڭ؟» دەگەن قيتۇرقى سۇراقتار كوبەيىپ كەتتى. ول ازداي, سوتسياليستىك رەاليزم ادىسىمەن قارۋلانعان ءبىزدىڭ كەيبىر سىنشىلارىمىز دا قاراسايدىڭ بەينەسىنەن ەلدە-كۇندە جوق قۇبىجىق كورە باستادى. سول سەبەپتى دە جارىق كورىسىمەن مەملەكەتتىك سىيلىققا ۇسىنىلعان, تالقىلاۋ تۇسىندا بارلىق مەجەدەن وتكەن بۇل رومان: «جاعىمسىز كەيىپكەرىن باستى قاھارمان ەتكەن» دەگەن جەلەۋمەن سىيلىققا دا ىلىنبەي قالدى...» («ساكەن سەرى – ەل جايىندا, ەل – ساكەن سەرى جايىندا», الماتى, «جازۋشى تويى», 355-بەت).
* * *
«اقان سەرى» ديلوگياسى قازاق ادەبيەتىنە ۇلكەن ولجا سالعان, قۇندى دۇنيە. رومان تۋرالى كەزىندە تالاي سىنشى, تالاي جازۋشى ءوز پىكىرىن جەرىنە جەتكىزە ايتىپ, ءباسپاسوز بەتىندە جاريالاعانىن كوزىقاراقتى وقىرمان جاقسى بىلەدى. ساكەن ءجۇنىسوۆ 50 جاسقا تولعاندا ءسوز شەبەرى, كورنەكتى سۋرەتكەر عابيت مۇسىرەپوۆ:
«...ءبىزدىڭ ساكەن وسى جاسىندا ءبىراز ىرگەلى, اتاۋلى تۋىندىلار بەردى. ول – قازىر وتىز جىلدىق مەرەكەسىن اتاپ وتكەلى وتىرعان تىڭ ەپوپەياسىنا وراي سوناۋ كەزدە جازىلعان «جاپانداعى جالعىز ءۇي» رومانى جانە باسقا اڭگىمە, پوۆەستەرى ەدى. وعان قوسا اقان جايلى ەكى تومدىق شىعارما جانە جازىلدى. ارينە, تۆورچەستۆودا اركىمنىڭ وزىندىك كوزى بولۋى قاجەت. سول اقاندى مەن دە جازعانمىن. ايتارىم, ساكەن ءوز كەيىپكەرىن وزىنشە قادىر-قاسيەتىمەن, اقىندىق, سەرىلىك جارقىندىعىمەن, حالىقتىڭ سۇلۋ ءتىلىنىڭ قۋاتىمەن ءمىنسىز سۋرەتتەگەن. ەسكى سۇرلەۋگە دە, دايىن داڭعىل جولعا دا تۇسپەگەن, باسقانىڭ ءىزىن قۋىپ شيىرلاماعان. سونىسىمەن ماعان قادىرلى كورىنەتىنىن, ادەبيەتىمىزدىڭ اسىل قورىنا قوسىلعانىن ايتا الامىن...» («سوتسياليستىك قازاقستان» گازەتى, 1984 جىل).
قازاق حالقىنىڭ مادەنيەتىندە ايرىقشا ورىن الاتىن اقان سەرى سىندى تۇلعانىڭ ادەبيەتتەگى, ساحناداعى, ەكرانداعى جارقىن بەينەسى ءالى دە سان ۇرپاق وكىلدەرىنە تاربيەلىك ونەگە بەرمەك.
س.ءجۇنىسوۆ پروزامەن قوسا دراماتۋرگيا سالاسىندا دا ءونىمدى ەڭبەك ەتكەن. وعان ونىڭ وتكەن عاسىردىڭ جەتپىسىنشى, سەكسەنىنشى جىلدارى جازعان, ساحنالانعان پەسالارى ايعاق.
2003 جىلى مادەنيەت مينيسترلىگى وتكىزگەن «استانا-بايتەرەك» اتتى رەسپۋبليكالىق كونكۋرستا دراماتۋرگ ساكەن ءجۇنىسوۆتىڭ ەكى بىردەي پەساسى ءبىرىنشى ورىنعا يە بولدى.
«ساكەن ءجۇنىسوۆ ەسىمى قازاق وقىرماندارىنا كەڭىنەن تانىس. توكپە ءتىل, ورالىمدى وتكىر ويلاردى, تۇتاس تا جۇيەلى پروبلەمالىق ماسەلەلەر مەن قوعام قاجەتىنە اۋاداي كەرەكتى ومىرشەڭ ماتەريالداردى ءتۇپ ەتەكتەن قالاي ۇستاۋدى جاقسى بىلەتىن دراماتۋرگ ەڭبەگىنىڭ قاي-قايسىسى بولسىن وقىرمان, كورەرمەن كوڭىلىن سەلت ەتكىزبەي قويمايدى», دەپ جازادى تانىمال تەاتر سىنشىسى, قازاقستانعا ەڭبەك سىڭىرگەن ونەر قايراتكەرى, مەملەكەتتىك سىيلىقتىڭ لاۋرەاتى اشىربەك سىعاي. ساكەن ۇلتتىق ساحنامىزدىڭ ءسانى بولارلىقتاي تالاي ءبىر تاماشا پەسالاردى ومىرگە كەلتىردى. «اجار مەن اجال», «تۇتقىندار», «جارالى گۇلدەر», ء«ار ءۇيدىڭ ەركەسى», «قىزىم, ساعان ايتام», «كروسسۆورد», ء«ولىارا», «قىسىلعاننان قىز بولدىق», «قوس انار», «كەمەڭگەرلەر مەن كولەڭكەلەر» دەپ اتالاتىن كوپجانرلى دۇنيەلەر كوپتەگەن تەاترىمىزدىڭ شىعارماشىلىق شىرايىن كىرگىزىپ, بىرنەشە رەجيسسەر, اكتەرلەرىمىزدىڭ شەبەرلىك مۇمكىندىكتەرىن كورەرمەن قاۋىمعا ايگىلەپ بەردى. اۆتوردىڭ قالامىنان تۋعان جوعارىداعى ونعا جۋىق ساحنالىق شىعارمالاردىڭ كوركەمدىك دەڭگەيى جونىندە سولعىن شىققاندارى كەمدە-كەم دەسەك, ونىڭ ءتورت تۋىندىسى بۇرىنعى وداقتىق جانە رەسپۋبليكالىق كونكۋرستاردىڭ جۇلدەسىن جەڭىپ الدى, ولار: «اجار مەن اجال», ء«ار ءۇيدىڭ ەركەسى», ء«ولىارا». باسقا دۇنيەلەرى دە قازاقستاننىڭ پروفەسسيونال تەاترلارىنىڭ ساحنالارىن تۇگەل ارالاپ شىققان. دراماتۋرگ شىعارمالارىنا رەسپۋبليكامىزدىڭ حالىق تەاترلارى دا ۇلكەن ىقىلاس قويعانى ءمالىم...» (س.ءجۇنىسوۆ شىعارمالارى, 5-توم, «ساكەن سەرى دراماتۋرگياسى حاقىندا», الماتى: «تايماس» باسپا ءۇيى, 2013 جىل).
* * *
اللانىڭ قالاۋىمەن, ءدام جازىپ كوكشەتاۋ وبلىستىق تەلەۆيزياسىندا باس رەداكتور بولىپ قىزمەت ىستەگەن جىلدارى ساكەن جۇنىسوۆپەن جاقىن تانىسىپ, ارالاسقان جاعدايىم بار. 1994 جىلى الپىس جاسقا تولارىندا كوكشەتاۋعا كەلگەن ساپارىندا سۇحباتتاسىپ, تەلەحابار دايىنداۋ بارىسىندا بۋراباي كەنتىنە, وندا بىرنەشە جىلدان بەرى سالىنىپ, سول كەزدە قۇرىلىسى توقتاپ تۇرعان ءۇش قاباتتى كوتتەدجىنە دە بارعانبىز ء(«وزى جوقتىڭ كوزى جوق» دەمەي مە؟ سول كوتتەدج «ساقالدى كۇرىلىسقا» اينالىپ, كۇنى بۇگىنگە دەيىن قاڭىراپ بوس تۇر. مەن ول تۋرالى كەزىندە «انا ءتىلى» اپتالىعىنا جانە الەۋمەتتىك جەلىگە ماقالا جازعانمىن. وكىنىشكە قاراي, «بۇقپا» گازەتىنىڭ رەداكتورى, بەلگىلى قالامگەر تولەگەن قاجىباەۆ پەن ادەبيەت جاناشىرى مۇرات ىدىرىسوۆتان وزگە ەشكىم پىكىر بىلدىرمەدى. اسەم بۋراباي سەلوسىنىڭ شەتىندە, قالىڭ ورمانعا سۇعىنا ورنالاسقان ءۇش قاباتتى, ون ەكى بولمەلى كوتتەدج وسىلاي تۇرا بەرسە, ەندى جەتى-سەگىز جىلدا دالادا قالۋى ابدەن مۇمكىن...).
ساكەن اعامەن سۇحبات بارىسىندا مەن جازعان شىعارمالاردىڭ ىشىندە قايسىسى جۇرەگىڭىزگە جاقىن دەپ سۇراعان ەدىم.
– قايسىسى جاقىن دەگەن ساۋالعا كەسىمدى جاۋاپ ايتۋ قيىن, – دەگەن ەدى ساكەڭ. – مەن پروزامەن قوسا دراماتۋرگيالىق شىعارمالار دا جازىپ ءجۇرمىن. ماسەلە شىعارما جانرىندا ەمەس, جازىلۋىندا. جۇرتتىڭ ايتۋىنا قاراعاندا «اقان سەرى» بەلدى شىعارمام عوي. العاشقى رومانىم «جاپانداعى جالعىز ءۇي» دە وزىمە ىستىق. «زاماناي مەن اماناي» وزىمە ۇنايتىن سەكىلدى. كەزىندە «مولودايا گۆارديا» جۋرنالىندا باسىلىپ, جۇلدەگەر اتاندىم. «نوۆىي مير» جۋرنالى باسقالى جاتقاندا, 1986 جىلعى جەلتوقسان كوتەرىلىسىنە بايلانىستى جارىق كورگەن جوق. ول كەزدە قازاقتان بەزگەن ۋاقىت بولدى عوي. ول جەكە اڭگىمە... ارتىنان «نوۆىي مير» جۋرنالىنىڭ باس رەداكتورى سەرگەي زالىگين كەشىرىم سۇراعان...
«زاماناي مەن اماناي» پوۆەسىمدى ورىسشاعا اۋدارعان – بەلگىلى جازۋشى ۆلاديمير سولوۋحين. «قىزىم, ساعان ايتام», «جارالى گۇلدەر», «كەمەڭگەرلەر مەن كولەڭكەلەر» سىندى پەسالارىمدى دا كەمىتپەيمىن.
اتا-اناعا ون بالاسى دا بىردەي. ەشقايسىسىن الالامايدى. بىرەۋى ەركە, ەكىنشىسى تەنتەك دەگەندەي... ال وقىرمانعا جازۋشىنىڭ ءبىر شىعارماسى ۇناسا, كەلەسى بىرەۋى ۇنامايدى. ويتكەنى وقۋشى تالعامى ءارتۇرلى. جالپى, شىعارمانىڭ تاعدىرىن شەشەتىن پاراساتتى وقىرمان مەن ۋاقىت قوي. وسى تۇرعىدان كەلگەندە مەنىڭ شىعارمالارىما وقىرمانىمنىڭ ءبىرازى ريزا سەكىلدى. البەتتە, كوڭىلىڭ وسەدى. حالقىڭنىڭ الدىندا ۇياتقا قالساڭ, ماسقارا سول ەمەس پە؟ ال وقىرمان ء«اي, سونى قويشى؟» دەسە, وندا جازباعان ارتىق... وقىماي قويادى. ال ماقتاپ جاتسا, زورلاپ ماقتاتىپ جاتقان جوقسىڭ عوي... «اقان سەرىنى» اقان قىلعان ساكەن, ساكەندى ساكەن قىلعان – اقان» دەگەن سوزدەردى تالاي ەستىدىم. سوعان قاراعاندا حالىق «اقان سەرى» رومانىمدى جاقسى كورسە كەرەك...
ودان سوڭعى اڭگىمەمىز «جاپانداعى جالعىز ءۇي» تۋرالى بولدى.
– تىڭ بىزگە ءبىر تىڭ دۇنيە, سەرپىلىس اكەلدى, – دەپ ساباقتادى جازۋشى جاۋابىن. – قالعىڭقىراپ وتىرعان ادامدى ءتۇرتىپ جىبەرگەندەي... تراكتورمەن كەلىپ: ء«اي, تۇر! تۇرماساڭ, مىناۋ ءۇيىڭنىڭ قابىرعاسىن سوگىپ الىپ كەتەمىن...» دەگەندەي...
بالكىم ءبىز تەحنيكانى كەيىندەۋ مەڭگەرەر ەدىك. تىڭ – تەزدەتتى. ءبىز ءوزى تۇرتپەسەڭ, ۇيىقتاپ جۇرە بەرەتىن, بەيبەرەكەتتەۋ ەلمىز عوي. مىرجاقىپ دۋلات ۇلىنىڭ: «ويان, قازاق!» دەپ جۇرگەنى بەكەر ەمەس. ءبىزدى وياتۋ كەرەك! كورپەمىزدى جۇلقىپ, جىلى جەردەن سۋىققا شىعارىپ, سەرگىتپەسە بولمايدى. سەبەبى كەڭ بايتاق جەرىمىزدىڭ جەراستى بايلىعىنا توقمەيىلمىز. ريزا بولۋ ءوز الدىنا, سول بايلىقتى يەمدەنىپ, ىسكە جاراتۋ كەرەك. جاپوندار جەرى از بولعاندىقتان, اۋلاسىنا ءجۇز ءتۇرلى گۇلدى ەگىپ قويىپ, سونى يىسكەپ وتىرادى. جەر كولەمى شاعىن بولعان سوڭ, تىربانىپ, ەڭبەك ەتپەي قايتسىن؟ اۋىزىڭدى اشىپ وتىرا بەرسەڭ, ۇلكەن جەرىڭنىڭ كۇنى ەرتەڭ ۇلتاراقتاي بولۋى وپ-وڭاي...
قىتايلار دا سولاي. قۇرت-قۇمىرسقانى جەيتىنى, كۇن كورۋ ءۇشىن. وعان كۇلۋگە بولمايدى. دۇرىس ىستەيدى. ءبىر ميللياردتان استام ادام, وسىلايشا تىرلىك ەتىپ جاتىر. بىزدە ءبىر كىسىگە 1,5-2 شارشى شاقىرىم جەردەن كەلەدى ەكەن. مالىمىز ءوزى جايىلىپ كەلەدى. راقات! جىلقىمىز قىس بويى تەبىندە. ءوز ازىعىن ءوزى تاۋىپ جەيدى. مىنە, وسى جاعىنان كەلگەندە تىڭ بىزگە – ويان, قالعي بەرمە! – دەپ ەسكەرتتى. تىڭنىڭ سوراقى جەرى – مال جايىلىمىن قالدىرماي جىرتىپ تاستادى. «جاپانداعى جالعىز ۇيدە» ول جازىلعان. ماعان سول ءۇشىن كەزىندە, پارتيانىڭ باعدارلاماسىنا قارسىمىسىڭ دەپ كىنا تاقتى. مەن: «جوق, قارسى ەمەسپىن. نيكيتا حرۋششەۆتىڭ قيعاشتىق جاساعانى, قازاق مەكتەپتەرىن جاۋىپ تاستاعانى, انا ءتىلىمىزدى جوعالتىپ جىبەرگەنى, ءبىزدى مەنسىنبەگەنى, قازاقتاردىڭ اراسىنان مىقتى كادرلار شىقپايدى دەگەنى, مىنە, وسىلارعا قارسىمىن دەپ جاۋاپ قايتاردىم.
قازاق – دارىندى حالىق. مۇنى مەن قازاق بولعان سوڭ ايتىپ وتىرعام جوق. وزگە ۇلتتارمەن سالىستىرام عوي. تەك بىزگە ارەدىك-ارەدىك: «ەي, باسىڭدى كوتەر! ويان! قاتارىڭنان قالما! اناۋ ادەمى ءۇي سالىپ جاتىر. سەن نەگە سالمايسىڭ؟ – دەپ ءتۇرتىپ وتىرۋ كەرەك. ورىس, شەشەن, نەمىس, وزگە دە ۇلتتار ءۇي سالىپ جاتسا, «قولىنان كەلەدى عوي» دەيمىز, ال قازاق سالىپ جاتسا: ء«اي, بۇل اقشانى قايدان الدى ەكەن؟ قايتىپ سالىپ جاتىر؟» دەن كۇماندانامىز.
تىڭ ءبىزدى قامشىلادى...
* * *
ساكەن ءجۇنىسوۆ جان-جاقتى, پاراساتتى ونەردىڭ ءاربىر سالاسىنان ءوزىن تانىتقان تۇلعا ەكەندىگىن قازاق وقىرمانى جاقسى بىلەدى. اسقان تالانتى ءۇشىن قازاق زيالىلارى ونى ساكەن سەرى دەپ اتاعان. ول كاريكاتۋرالار سالعان, دومبىرا, پيانينو, ماندولين اسپاپتارىندا ويناپ, ءان ايتقان. مۇنىمەن قوسا ول قازاقشا كۇرەس سايىستارىنا قاتىسقان. 2014 جىلى مەملەكەتتىك تاپسىرىس بويىنشا قازاق زيالىلارىنىڭ قولداۋىمەن دەرەكتى فيلم شىعارىلدى. ءفيلمنىڭ تۇساۋكەسەرىندە قارىنداسى روزا ءجۇنىسوۆا اعاسىنىڭ ءومىرى مەن شىعارماشىلىعى تۋرالى ايتا كەلىپ, جازۋشى ءومىرىن اقان سەرى تاعدىرىمەن تەڭەستىردى.
«ساكەن سەرى» دەگەن اتتى كەزىندە كورنەكتى جازۋشى عابيت مۇسىرەپوۆ بەرگەن كورىنەدى. ول تۋرالى عابەڭنىڭ ايتقان ءسوزى بار.
ساكەڭ 60 جاسقا كەلگەندە, بەلگىلى اقىن وتەجان نۇرعاليەۆ «ساكەن» اتتى ۇزاق ولەڭىن:
«...جۇلدىز كوپ اركىمدەردىڭ جەتەگىندە,
بىرەۋلەر حوشەمەتكە ەتى ولۋدە.
اق تۋىن ابىلايدىڭ بىرگە قوسىپ,
ساكەندى اقان سەرى كوتەرۋدە!..», دەپ جازعان ەكەن.
ءان پاديشاسى, قازاقتىڭ ءبىرتۋار اقىنى اقان سەرى قورامسا ۇلى ايتىلعان جەردە ايگىلى جازۋشى, دارىندى دراماتۋرگ ساكەن ءجۇنىسوۆ ەرىكسىز ەسكە تۇسەرى حاق. قالامگەردىڭ ەل مەن رۋحانياتتى قورعاعان, قولداعان نامىسى – ادەبيەتتىڭ قاسيەتىندەي ەدى.
تولىمبەك ءابدىرايىم,
جازۋشى, حالىقارالىق «الاش» ادەبي سىيلىعىنىڭ لاۋرەاتى
