فوتو: parlam.kz
دەپۋتاتتىڭ ايتۋىنشا قاراعاندىدا ايدىڭ-كۇننىڭ امانىندا ءوز قىزمەتىن ادال اتقارىپ جۇرگەن جەدەل جاردەم جۇرگىزۋشىسىن قانجوسا ەتىپ سوققىعا جىعۋ – بارىپ تۇرعان باسسىزدىق.
«قۇقىقبۇزۋشى نۇربولات داكەباەۆتىڭ ارەكەتى – ءجاي عانا قىلمىس ەمەس, بۇكىل قوعامعا, زاڭ مەن تارتىپكە اشىق قارسىلىق, نە ىستەي الاسىڭ دەگەن ءدوڭايبات. ءوزىن بەينەتاسپاعا ءتۇسىرىپ جاتقانىن ءبىلىپ تۇرسا دا, ەشقانداي ايىلىن جيماي جۇدىرىق سىلتەپ, قىزمەتتەگى ادامدى قانعا بوكتىرۋى – ابدەن شەكتەن شىققاندىق, ناعىز قانىپەزەرلىك», دەدى دەپۋتات.
ونىڭ ايتۋىنشا, ونداي وقيعالار ەلىمىزدە جەتەرلىك. وسى كۇنگە دەيىن دەپۋتاتتىق كورپۋس بىرنەشە رەت مەديتسينا جۇيەسىنىڭ قىزمەتكەرلەرىن قورعاۋ ءۇشىن ارنايى ستاتۋس بەكىتۋدى ۇسىنسا دا, ۇكىمەت ءالى كۇنگە دەيىن شەشىم قابىلداماي كەلەدى.
دەپۋتات الماتىدا اۆتوبۋس جۇرگىزۋشىسىمەن بولعان قايعىلى وقيعانى دا مىسالعا كەلتىردى.
ماجىلىسمەن ونداي وقيعالارعا سەبەپ بولىپ وتىرعان بىرنەشە فاكتورعا توقتالدى.
ەلنۇر بەيسەنباەۆتىڭ سوزىنشە اتالعان جاعدايلار ەڭ الدىمەن, ءتيىستى ورگانداردىڭ ءوز جۇمىسىنا سالعىرت قاراپ, قۇقىق بۇزۋشىلىقتاردىڭ الدىن الۋ شارالارىن دۇرىس ۇيىمداستىرماعانىن كورسەتەدى. ەكىنشىدەن, كوپشىلىك قاراپايىم عانا قۇقىقتىق قاعيدالاردى بىلمەيتىنىن بايقاتادى. ولار ءوز قۇقىعىن بىلاي قويعاندا, زاڭ الدىنداعى مىندەتتەرى مەن جاۋاپكەرشىلىگىنەن دە بەيحابار. زاڭ مەن ءتارتىپ بارىنە بىردەي قاعيداتىن ۇستانۋ – ءاربىرىمىزدىڭ مىندەتىمىز. ۇشىنشىدەن, ۇلتتىق قۇندىلىقتاردان ادا, ادەپ پەن ار-ۇياتتى ارتتا قالۋشىلىق دەپ سانايتىن, ادامشىلىققا جات ويلارمەن ساناسى ۋلانعان ازاماتتار قالىپتاسىپ كەلەدى.
«ەشقانداي جاقسىلىققا اپارمايدى. سالدارىن كورىپ وتىرمىز. زاڭ مەن ءتارتىپ ۇستەمدىك ەتەتىن, ءاربىر ازاماتتىڭ قۇقىعى قورعالعان, ءوز ءومىرى مەن دەنساۋلىعىنا قاۋىپتەنبەيتىن ادىلەتتى قازاقستاندى قالايمىز جانە ونى قۇرامىز. پرەزيدەنتىمىز ايتقانداي: «بىزدە زاڭ مەن ءتارتىپ بۇزۋشىلىققا توزبەيتىن جاعداي قالىپتاسۋى كەرەك», دەپ اتاپ ءوتتى ول.
دەپۋتات ۋاكىلەتتى ورگاندارعا مىناداي شارالاردى قولعا الۋدى ۇسىندى:
«قۇقىق قورعاۋ ورگاندارى قىلمىس جاساعان داكەباەۆتى تەز ارادا تابۋى ءتيىس. وعان قاتىستى سوتتى اشىق جۇرگىزىپ, قاتاڭ جازا تاعايىنداۋ جانە ونىڭ بارىسى مەن قورىتىندىسى تۋرالى بۇقارالىق اقپارات قۇرالدارى ارقىلى حالىقتى تۇگەل حاباردار ەتۋ كەرەك. سوڭعى ۋاقىتتارى ادامنىڭ جەكە باسىنا قاۋىپ توندىرەتىن, ءتىپتى ونىڭ ءومىرىن قياتىن قىلمىستار قوعامدىق سيپات الىپ وتىر. سول سەبەپتى, تەز ارادا كەز كەلگەن قىلمىستارعا قوعامدا مۇلدەم توزبەۋشىلىك مادەنيەتىن جاپپاي قالىپتاستىرۋىمىز قاجەت», دەدى ءماجىلىس دەپۋتاتى ەلنۇر بەيسەنباەۆ.
