ويىن تاريحى XVI عاسىردا شوتلانديادان باستاۋ العان. بىردە دانبلەين توعانى تۇبىنەن كەرلينگ سناريادى تابىلادى. ونداعى «1511 جىل» دەپ قاشالعان جازۋ بۇل سپورتتىڭ راسىندا ەرتە زاماننان كەلە جاتقانىن بارشاعا دالەلدەدى. وسىلايشا, بۇقارالىق سپورت رەتىندە عانا تانىلعان كەرلينگ 1959 جىلى ەدينبۋرگتە الەم چەمپيوناتى دەڭگەيىندە دۇركىرەپ وتەدى. ال 1998 جىلدان باستاپ وليمپيا ويىندارىنىڭ قاتارىنا قوسىلادى.
قازاقستان كەرلينگ فەدەراتسياسى 20 جىلدان بەرى جۇمىس ىستەپ كەلەدى. وسى ۋاقىت ارالىعىندا 16 قۇراما كوماندا جاساقتالىپ ۇلگەرگەن. ەرلەر, ايەلدەر, جاسوسپىرىمدەر مەن پاراليمپيادالىق كوماندا سپورتشىلارى الماتىداعى ۇلتتىق كەرلينگ ورتالىعىندا باس قوسىپ تۇرادى.
كەرلينگ – ەڭ دەموكراتيالى ويىن ءتۇرى. كوماندا قۇرامىندا 16 جاس پەن 60 جاس ارالىعىنداعى سپورتشىلار دا قاتار ويناي الادى. ال جاتتىعۋعا 5 جاسىنان كىرىسە بەرۋگە بولادى. وسىنداي تالاپتى جاستىڭ ءبىرى – 16 جاستاعى مەرەي تاستەمىر كەرلينگپەن 6 جاسىنان باستاپ شۇعىلدانعان.
– مەن كەرلينگ سەكتسياسى اشىلعانىن ەستي سالا قىزىعۋشىلىق تانىتتىم. ءبىرىنشى جاتتىعۋ كۇنىمىز ەرەكشە اسەر قالدىرعان سوڭ, ناقتى وسى سپورتپەن شۇعىلدانامىن دەپ شەشتىم. دايىندىقتىڭ ناتيجەسىندە ەكى جىل بۇرىن قازاقستاننىڭ جاسوسپىرىمدەر قۇراماسىنا قابىلداندىم, – دەيدى ول.
مەرەيدىڭ ىزىمەن تۋعان باۋىرى يبراگيم دە كەرلينگپەن اينالىسادى. اعايىندىلار كانۆوندا ءوتىپ جاتقان جاسوسپىرىمدەر اراسىنداعى وليمپيادادا ەل نامىسىن قورعاۋعا دايىندالىپ جاتىر.
كەرلينگ قاۋىمداستىعىنىڭ باس حاتشىسى ۆيكتور كيمنىڭ ايتۋىنشا, كەرلينگتە مۇمكىندىگى شەكتەۋلى جاندار ءۇشىن دە ءبىرشاما جاعداي جاسالىپ جاتىر.
– قازىر بىزدە ەستۋ قابىلەتى ناشار جانە اربادا وتىراتىن سپورتشىلار كومانداسى جاساقتالعان. وسىعان وراي استانادا كەرلينگشى-پاراليمپياداشىلارعا ارنالعان ستاديون جۇمىس ىستەپ تۇر. كۇرمەۋى كوپ ماسەلەلەر اقىرىنداپ وڭ شەشىمىن تاۋىپ كەلەدى. قازىر ۇلتتىق وليمپيادا كوميتەتىنەن باستاپ, مينيسترلىكتىڭ سپورت جانە دەنە شىنىقتىرۋ ىستەرى كوميتەتى ءتيىستى جابدىقتارمەن قامتاماسىز ەتىپ جاتىر. ەندىگى كەزەكتە ينفراقۇرىلىم ماسەلەسى رەتتەلسە, نۇر ۇستىنە نۇر, – دەيدى ۆ.كيم.
ويىن ەرەجەسى – قاراپايىم. ءتورت ادامنان تۇراتىن ەكى كوماندا جارىسقا تۇسەدى. مۇزايدىنىنىڭ ورتاسىندا ارنايى سىزىلعان شەڭبەر نىسانى بولادى. ءار كوماندادا – سەگىز تاس. قاتىسۋشىلار كەزەك-كەزەك سناريادتاردى قولىنداعى ىسقىش ارقىلى نىساناعا جاقىنداتۋعا تىرىسادى. سولايشا ويىن جەكە سپورتشىنىڭ ەمەس, تۇتاس كوماندانىڭ كومبيناتسيالىق ۇيلەسىمى ارقىلى قىزا تۇسەدى.
ءيا, كەرلينگ – ءوز الدىنا ەرەكشە سپورت. جوعارعى ينتەللەكتى مەن مىقتى دەنساۋلىقتى تالاپ ەتەتىن ويىندا ءبىزدىڭ دە ۇلەسىمىز بار. قازاق سپورتشىلارى كەرلينگتەن دە كەرەمەت ناتيجە كورسەتەتىنە سەنىمىمىز مول. سوندىقتان كانۆون قالاسىنا ەل اماناتىن ارقالاپ كەتكەن مۇز ۇستىندەگى مۇزبالاقتارعا ساتتىلىك تىلەيمىز!
