جوبانىڭ مىندەتى – «اۋىل شارۋاشىلىعى جانۋارلارىن بىردەيلەندىرۋ» اج-دا جانە بىرىڭعاي اۆتوماتتاندىرىلعان باسقارۋ جۇيەسى اج-نىڭ ۆەتەرينارلىق قاۋىپسىزدىك مودۋلىندە «Vet Monitoring» ءمودۋلىن سىناپ, ىسكە قوسۋ.
جوبا اياسىندا ەكى تسيفرلىق ۇدەرىس سىناقتان وتكىزىلەدى: «مەملەكەتتىك شەكارادان – مەجەلى پۋنكتىگە دەيىن» جانە «تۋعاننان باستاپ – ونىمگە دەيىن». اقپاراتتىق جۇيەلەردىڭ جۇمىسى «جايلاۋ» فەرمەرلەر بازارىنىڭ اۋماعىندا تانىستىرىلدى. سورەلەردەن ەت ساتىپ الىپ, QR كودى ارقىلى ونىڭ قايدان شىققانى تۋرالى اقپاراتتى بىلە الاسىز.
«مەملەكەتتىك شەكارا – مەجەلى پۋنكت» ۇدەرىسىنىڭ ارەكەت ەتۋ ءپرينتسيپى: شارباقتى ۆەتەرينارلىق باقىلاۋ بەكەتىندە الماتىعا باراتىن ەت, ءسۇت نەمەسە باسقا دا مال شارۋاشىلىعى ونىمدەرى تەكسەرىستەن وتەدى. مەملەكەتتىك ۆەتەرينارلىق ينسپەكتور اقپاراتتىق جۇيەگە تەكسەرىس بويىنشا مالىمەتتەردى ەنگىزىپ, ۆەتەرينارلىق سەرتيفيكاتتىڭ زاڭدىلىعىن راستايتىن QR-كودى بار تەكسەرۋ اكتىلەرىن جاساپ, جۇكتىڭ تەكسەرىستەن وتكەنى تۋرالى اۋماقتىق ينسپەكتسيالارعا حابارلاما جىبەرەدى.
«ۆەتەرينارلىق تەكسەرىس كەزىندە سىناما الىنسا, زەرتحاناعا ءتيىستى حابارلاما جىبەرىلەدى. سىناما الىنعان جۇگى بار كولىك ساراپتاما ناتيجەلەرىن كۇتپەستەن ءارى قاراي جۇرە بەرەدى, ول بىرنەشە كۇننەن كەيىن كەلۋى مۇمكىن. زەرتحانالىق زەرتتەۋ ناتيجەسىن QR-كودتى سكانەرلەۋ ارقىلى سىناما اكتىسىنەن, كورۋگە بولادى. سىنامالاردان نورمادان اۋىتقۋلار تابىلسا, ءارى قاراي وتكىزۋگە شەكتەۋ قويىلادى», دەپ ءتۇسىندىردى اۋىل شارۋاشىلىعى ۆيتسە-ءمينيسترى امانعالي بەردالين.
«تۋعاننان – ونىمگە دەيىن» ۇدەرىسى ۆەتەرينارلىق-سانيتارلىق ساراپتامانىڭ بارلىق فۋنكتسيونالىن تسيفرلاندىرادى: مالدى سويۋدان جانە ساراپتاما جۇرگىزۋدەن باستاپ, نارىقتا ساتۋعا دەيىن. ول سونداي-اق قاجەتتى انىقتامالاردى بەرۋدى, ساراپتاما جۇرگىزۋدى جانە وتكىزۋ ورىندارىندا QR-كود جاساۋدى قامتيدى.
«Vet Monitoring» مودۋلىندە ۇسىنىلعان ۇدەرىستەر اشىقتىقتى قامتاماسىز ەتەدى, راسىمدەر سانىن ەداۋىر قىسقارتادى, ۆەتەرينارلىق تەكسەرۋ مەن ساراپتاما جۇرگىزبەي, مال سويۋدىڭ الدىن الادى. سونداي-اق مال باسىنىڭ تولىق ءارى ناقتى ەسەبىن جۇرگىزىپ, ولاردى تسيفرلىق باقىلاۋعا مۇمكىندىك بەرەدى. قاناتقاقتى جوبا 2024 جىلعى 31 ناۋرىزعا دەيىن جالعاسادى.
بۇگىنگى تاڭدا بىرىڭعاي اۆتوماتتاندىرىلعان باسقارۋ جۇيەسى اج-دا بورداقىلاۋ الاڭدارىنا, سويۋ پۋنكتتەرىنە, ەتتى ساقتاۋ, وڭدەۋ جانە مالدى, ونىمدەر مەن شيكىزاتتى وتكىزۋ ورىندارىنا, سونداي-اق ۆەتەرينارلىق پرەپاراتتاردى, جەم-ءشوپ پەن جەم-ءشوپ قوسپالارىن ءوندىرۋ, ساقتاۋ جانە وتكىزۋ جونىندەگى ۇيىمدارعا ەسەپتىك نومىرلەر بەرەتىن مەملەكەتتىك قىزمەتتەر قولجەتىمدى.
انىقتاما: بۇگىنگى تاڭدا ەل اۋماعىندا 851 سويۋ نىسانى بار (68 ەت وڭدەۋ كاسىپورنى, 251 سويۋ پۋنكتى, 532 سويۋ الاڭى). ۆەتەرينارلىق تالاپتارعا سايكەس كەلمەگەندىكتەن, 106 سويۋ نىسانى جۇمىس ىستەمەيدى (ونىڭ ىشىندە 27-ءسى – ەت وڭدەۋ كاسىپورىنى, 77-ءسى – سويۋ پۋنكتى جانە ەكەۋى – سويۋ الاڭى), 661 سويۋ الاڭىنىڭ ەسەپتىك نومىرلەرى قايتىپ الىندى.
