سۋرەتتى تۇسىرگەن – ەرلان ومار, «EQ»
قازىرگى قوعامدى مەملەكەتتىك قىزمەتشىلەردىڭ ۇستىنى, ءىس-ارەكەتى ويلاندىرادى. مەملەكەت باسشىسى وسى ورايدا: «ولار ءبىلىمدى, بىلىكتى عانا ەمەس, ءسوزى مەن ءىسى ۇيلەسەتىن, تياناقتى, ءتارتىپتى ارلى ادام بولۋى شارت», دەگەن ۇستانىمىن ءبىلدىرىپ وتىر. ال جاس مەملەكەتتىك قىزمەتشىلەر تۋرالى «جاس باسشىلارعا كوبىنە تاجىريبە جەتىسپەيدى. مەنمەندىگى جانە وزىنە دەگەن سىني كوزقاراستىڭ السىزدىگى, كەيدە ولاردىڭ ءوز قارىم-قابىلەتىن جوعارى دەڭگەيدە كورسەتۋىنە كەدەرگى كەلتىرەدى», دەپ ءادىل باعاسىن بەردى. سوندىقتان بۇگىنگى جاس باسشىلار «تەورياسىز پراكتيكا سوقىر, ال پراكتيكاسىز تەوريا اقساق» دەگەن عۇلامالار قاعيداسىن ۇستانعانى ءجون.
سۇحباتتا ء«بىزدىڭ حالىق اسا دانىشپان» دەپ جالعان كەۋدە سوعاتىنداردىڭ بار ەكەنىنە وتكىر سىن ايتىلدى. شىندىعىندا, وتكەن تاريحتاعى جەتىستىكتەرىمىزدى سانامالاي بەرمەي, بۇگىنگى كرەاتيۆتى تەحنولوگياعا ىلەسە ءبىلۋىمىز قاجەت. پرەزيدەنتتىڭ «جاڭا جىل مەن ءۇشىن قاستەرلى مەرەكە ەمەس. ءوزىمىزدىڭ ءتول جاڭا جىلىمىز – ءاز ناۋرىزدى ەستەن شىعارماعان ءجون», دەگەنى وتانشىل, پاتريوت ەكەنىن بايقاتادى.
مەملەكەت باسشىسىنىڭ ەل باسقارۋعا قاتىستى ايتقانىن تۇيىندەر بولساق, قازاق حالقىندا «حان ازسا, حالىق اداسادى. حالىق ازسا, حاندىققا تالاسادى» دەگەن قاناتتى ءسوز بار. وسى تۇرعىدان ايتقاندا, مەملەكەت باسقارۋ وڭاي ەمەس, جاۋاپتى ءىس دەگەنگە توقتاعىمىز كەلەدى. ال ءىس باسىنداعى پرەزيدەنت مەملەكەتتىك بيلىكتى دە ازدىرماي, بۇقارانى دا تۋرا جولدان اداستىرماي, ادىلەتتى قوعام مەن ادال ادامدى قالىپتاستىرۋعا ۇندەپ وتىر. بۇل – بۇگىنگى قوعام ءۇشىن قاجەتتى قادام.
ايدار سابىروۆ,
ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ دوتسەنتى
اتىراۋ وبلىسى
