فوتو: top-news.kz
براكونەرلەر جەكە بايۋ ماقساتىندا تابيعاتقا عانا ەمەس, جالپى ادامزاتقا زيان كەلتىرەتىندەرىن ءبىر ءسات ويلاي ما ەكەن؟
قۇقىق قورعاۋ ورگاندارى ۇسىنعان ستاتيستيكالىق دەرەكتەرگە كوز سالساق, 2023 جىلى تابيعاتتى قورعاۋ پوليتسياسىنىڭ قىزمەتكەرلەرى 1 845 رەيدتىك ءىس-شارا وتكىزىپ, تابيعاتتى قورعاۋ زاڭناماسىنا سايكەس 1300-دەن استام قۇقىق بۇزۋشىلىقتى انىقتاپتى. ونىڭ ەلۋگە جۋىعى قىلمىستىق قۇقىق بۇزۋشىلىق ەكەن. از ەمەس.
پوليتسيا قىزمەتكەرلەرى بالىق رەسۋرستارىن, زاڭسىز اڭشىلىقتى جانە «قىزىل كىتاپقا» ەنگەن جانۋارلار مەن وسىمدىكتەردىڭ سيرەك كەزدەسەتىن تۇرلەرىنىڭ اينالىمى سالاسىنداعى قۇقىق بۇزۋشىلىقتاردىڭ جولىن كەسۋ ماقساتىندا جۇيەلى جۇمىس جۇرگىزىپ وتىر. تەرگەلىپ, نۇكتەسى قويىلعان قىلمىستىق ىستەر سوتقا جولدانىپ, كەيبىر براكونەرلەر ءتيىستى جازاسىن الىپ تا ۇلگەردى.
ماسەلەن, التاي اۋدانىنىڭ 57 جاستاعى تۇرعىنى 3 بۇلعىندى زاڭسىز اۋلاعانى ءۇشىن ءبىر جىلعا باس بوستاندىعىنان شەكتەۋ جازاسى كەسىلدى. سونىمەن قاتار وسى اۋداننىڭ 30 جاستاعى تۇرعىنى ەكى جىلعا باس بوستاندىعىنان ايىرىلدى. ول بوگاتىرەۆو اۋلىنداعى بۇقتىرما وزەنىنىڭ ارناسىندا «قىزىل كىتاپقا» ەنگەن تايمەن بالىعىن اۋلاعان ەكەن. گلۋبوكوە اۋدانىنىڭ چەرەمشانكا اۋىلىندا سيرەك كەزدەسەتىن جابايى سارىمساق وسىمدىگىنىڭ 4000-عا جۋىق داناسىن جيناپ, ريددەر قالاسىنا ساتۋ ءۇشىن بارعان وبلىستىڭ ءتورت تۇرعىنى باس بوستاندىعىن شەكتەۋدىڭ ءتۇرلى مەرزىمىنە (1 جىل جانە 3 جىل) سوتتالعانى جانە بار. كەلتىرىپ وتىرعان بۇل فاكتىلەر باسقالارعا ساباق بولسا ەكەن.
وسى ورايدا پوليتسەيلەر ازاماتتارعا زاڭسىز اڭ اۋلاۋ ءۇشىن جاۋاپكەرشىلىك كوزدەلگەنىن قاتاڭ ەسكەرتەدى. ەسكەرتىپ قانا قويماي, ەكولوگيانى ساقتاۋعا, تابيعات پەن جانۋارلار الەمىن قورعاۋعا شاقىرادى.
شىعىس قازاقستان وبلىسى
