جاڭا تسيفرلىق سەرۆيستەر

وتكەن جىلى پرەزيدەنتتىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» اتتى سايلاۋالدى باعدارلاماسىنا سايكەس ازاماتتار ومىرىندە جانە بيزنەس جۇ­مىسىندا كەزدەسەتىن جاعدايلاردى كەشەن­دى تسيفرلاندىرۋ باستالدى. بىرقا­تار باستامالار وڭ ناتيجە بەرىپ ۇلگەردى.

مىسالى, 2023 جىلى اۆتوكولىكتى قايتا تىركەۋ بويىنشا مامىلەلەردىڭ شامامەن 55%-ى (شامامەن 2,3 ملن) ونلاين فورماتتا جۇرگىزىلدى. جۇرگىزۋشى كۋالىگىن قايتا جاساۋ ءراسىمى تسيفرلاندىرىلدى جانە كولىكتىڭ تەحنيكالىق تەكسەرىستەن وتكەنى تۋرالى دەرەكتەر eGov-قا شىعارىلدى. e-Salyq Azamat جانە ە-نوتاريات ءموبيلدى قوسىمشالارى ارقىلى ازاماتتار ءۇشىن كەدەندىك دەكلاراتسيا تاپسىرىپ, ونلاين سەنىمحات راسىمدەۋ جانە نوتاريۋستاردان ۆيدەو ارقىلى كونسۋلتاتسيا الۋ مۇمكىندىگى تۋدى.

سونىمەن قاتار 17 جاستاعى 150 مىڭعا جۋىق ەر بالا ءۇشىن اسكەري ەسەپكە الۋ ناۋقانىنىڭ فورماتى جەڭىلدە­تىلدى: ەندى قۇجاتتاردى جيناپ, اسكەري كوميسسارياتتارعا بارۋ جانە مەديتسينالىق كوميسسيادان ءوتۋ قاجەت بولمايدى. 1,3 ملن-عا جۋىق ازامات حقكو نەمەسە اسكەري كوميسسارياتتارعا بارماي-اق مەكەنجايى بويىنشا پرواكتيۆتى فورماتتا ەسەپكە تۇرا الادى.

وعان قوسا تەحنيكالىق جانە كاسىپ­تىك ءبىلىم تۋرالى ديپلومداردىڭ تۇپنۇسقا ەكەنىن تەكسەرۋ ءۇشىن QR-كودتار ەنگىزىلدى, تالاپكەرلەر نەمەسە ولاردىڭ وكىلدەرى ءبىلىم بەرۋ گرانتى تابىستالعانى تۋرالى SMS الا الادى. سونداي-اق Enbek.kz پورتالى ارقىلى ونلاين رەجىمدە ەڭبەك شارتتارىن جاسايتىن سەرۆيس ىسكە قوسىلدى. جالپى, 2023 جىلدىڭ قورىتىندىسى بويىنشا قاناتقاقتى نەمەسە تولىق رەجىمدە 146 تسيفرلىق باستاما ىسكە اسىرىلدى.

اتقارىلعان جۇمىستىڭ ناتيجەلەرى تۋرالى بۇعان دەيىن وسى باعىتتا تاپسىرما العان ورتالىق مەملەكەتتىك ورگانداردىڭ «تسيفرلىق» ۆيتسە-مي­نيستر­لەرى بايانداما جاسادى.

ءوز كەزەگىندە سالالىق ۆەدومستۆو باسشىسى باعدات مۋسين مەملەكەتتىك ورگاندار ىسكە اسىرعان باستامالاردى باعالاۋ ناتيجەلەرىن مالىمدەدى. تالداۋ اياسىندا حالىق تاراپىنان جوبالارعا دەگەن سۇرانىس, ولاردىڭ تيىمدىلىگى, سىبايلاس جەمقورلىق تاۋەكەلدەرىن تومەندەتۋگە قانشالىقتى باعىتتالعانى جانە ت.ب. ەسكەرىلدى. مينيستر 2023 جىلى 9 ومىرلىك جاعداي بويىنشا 365 بيزنەس-ۇدەرىسكە رەينجينيرينگ جۇرگىزىلگەنىن, بۇل ءتيىستى مەملەكەتتىك قىزمەتتەردى كورسەتۋ جىلدامدىعى مەن ولاردىڭ ساپاسىنىڭ ارتۋىنا سەپتىگىن تيگىزەتىنىن ايتتى.

ايتا كەتۋ كەرەك, بيۋروكراتيادان ارىلتۋ جانە تسيفرلاندىرۋ بويىنشا جۇمىسقا «سامۇرىق-قازىنا» اق جانە «بايتەرەك» حولدينگى دە تارتىلعان.

عالىمجان قويشىباەۆ الداعى جىلى قويىلعان مىندەتتەردى بارىنشا بەلسەندى جۇزەگە اسىرۋ كەرەكتىگىن اتاپ ءوتتى. سونداي-اق كۇردەلى مىندەتتەردى ۆەدومستۆوارالىق جۇمىس توپتارى ارقىلى مۇمكىندىگىنشە قىسقا مەرزىمدە بىرلەسىپ شەشۋدى كوزدەيتىن «Agile» جانە «اكسەلەراتسيا» سياقتى باسقارۋ قۇرالدارىن قولدانۋ قاجەت.

«مەملەكەت باسشىسى الدىمىزعا ماڭىزدى ستراتەگيالىق مىندەت قويدى – قازاق­ستاندى IT-ەلگە اينالدىرۋ. تسيفر­لان­دىرۋ سالاسىندا جەتىستىكتەرىمىز بار: «ەلەك­تروندىق ۇكىمەتتى» دامىتۋ يندەك­سى بويىنشا الەمدىك كوشباسشىلار قاتارىن­دامىز. الايدا بىزگە مۇنىمەن توقتاپ قالماۋ كەرەك, جاساندى ينتەللەكت پەن يننوۆاتسيانى قولدانۋ جانە ەنگىزۋدى قامتاماسىز ەتۋ قاجەت», دەدى  ۇكىمەت اپپاراتىنىڭ باسشىسى.

كەڭەس قورىتىندىسى بويىنشا مەم­­لەكەتتىك ورگاندارعا ەسكەرتۋلەر مەن ۇسى­نىس­تاردى ەسكەرە وتىرىپ, ونلاينسەرۆيس­تەردى جاقسارتۋ, سونداي-اق حالىق­قا ناقتى جانە ەلەۋلى ناتيجەلەر بەرەتىن جاڭا باستامالاردى ازىرلەۋ جونىندە بىرقاتار ءتيىستى تاپسىرمالار بەرىلدى.