فوتو: turkystan.kz
پرەزيدەنت «2024 جىلدى قالاي قارسى الدىڭىز؟» دەگەن سۇراققا: «جاڭا جىل – ارينە, كۇنتىزبەنىڭ جاڭا پاراعىن اشاتىن ماڭىزدى مەجە. وسى ساتتە وتكەن جىلدى قورىتىندىلاپ, كەلەشەككە جوسپار قۇرۋ ادەتكە اينالعان. ءبىر جاعىنان, جاڭا جىل مەن ءۇشىن قاستەرلى مەرەكە ەمەس. ونىڭ ۇستىنە, ءوزىمىزدىڭ ءتول جاڭا جىلىمىز – ءاز ناۋرىزدى ەستەن شىعارماعان ءجون. بۇل مەيرام – تىرشىلىكتەگى ناعىز تابيعي جىل باسى», دەپ جاۋاپ بەرگەن ەكەن.
مەملەكەت باسشىسىنىڭ ناۋرىز تۋرالى ايتقان پىكىرى بۇل مەرەكەنى مازمۇندى اتاپ وتۋگە جاڭاشا سەرپىن بەرەدى دەپ سانايمىن. جالپى, 31 جەلتوقساندا جاڭا جىلدى تويلاۋعا قارسى ەمەسپىز. ءبىز گريگوريان كۇنتىزبەسىمەن ءومىر سۇرەمىز. بۇل كۇنتىزبەنىڭ ەسەبىنشە, جىل 1 قاڭتاردا باستالىپ, 31 جەلتوقساندا اياقتالادى. جالپاق الەم وسى تارتىپپەن جۇرەدى. بۇدان ءبىز كەتە المايمىز. سوندىقتان جاڭا جىلدى تويلاعان دۇرىس, بىراق: «مەن ءبىر جىلدا نە ىستەدىم, نە ءبىتىردىم, قانداي ناتيجەگە قول جەتكىزدىم, ءوزىم ءۇشىن قانشا ەڭبەك ىستەدىم, حالقىم ءۇشىن قانداي يگىلىكتى ءىس جاسادىم؟», دەپ ءار ادام جىل سوڭىندا ءوز-وزىنە ەسەپ بەرىپ, قورىتىندى جاساسا, ونىڭ سالماعى ارتا تۇسەرى انىق.
ۇلىستىڭ ۇلى كۇنى – ءاز ناۋرىز مەركەسىنىڭ ماڭىزى دا, ءجونى دە بولەك. تاريحقا تەرەڭ بويلاعاندا, ادامزات بالاسىنىڭ جاڭا جىلدى – ناۋرىزدان باستاعانىن بايقايمىز. بۇعان كوپ مىسال كەلتىرۋگە بولادى. بابالارىمىز بۇل مەيرامدى – كۇن مەن ءتۇننىڭ تەڭەلۋى دەپ ەرەكشە اتاپ وتكەن. جەتى ءتۇرلى دامنەن ءنارلى كوجە جاساپ, جاتتىڭ دا, جاقىننىڭ دا ءبىر-بىرىنە ءدام تاتقىزىپ, اق داستارحان باسىندا القا قوتان وتىرىپ, بىرگە اس ىشەتىن ىنتىماق پەن بىرلىكتىڭ مەرەكەسى دەپ بىلگەن. كۇن مەن ءتۇننىڭ تەڭەلگەنىنەن باستاپ, تىرشىلىك ويانىپ, بار دۇنيە جاڭعىرىپ, جاندانادى دەگەن. الايدا ءبىز ناۋرىزدى قالاي اتاپ ءوتىپ ءجۇرمىز؟ مەرەكەدە كوبىنە شىلدەحانا, بەسىككە سالۋ, تۇساۋكەسەر, كەلىن ءتۇسىرۋ سەكىلدى تۇرمىستىق سالت-داستۇرلەردى كورسەتۋمەن عانا شەكتەلەمىز. شىن مانىندە, بۇل مەيرامدى عىلىمي تۇردە تولىق زەرتتەگەن جوقپىز. ماسەلەن, كۇن مەن ءتۇننىڭ تەڭەلۋىنە بايلانىستى كۇن مەن ءتۇننىڭ, قىس پەن جاز مەزگىلدەرىنىڭ ايتىسىن ۇيىمداستىرۋعا بولادى. بۇل اقىنداردان ينتەللەكتۋالدى دايىندىقتى تالاپ ەتەرى انىق. بىراق قىزىقتى بولىپ شىعۋى دا عاجاپ ەمەس. ءبىر سوزبەن ايتقاندا, ناۋرىز – تۇركى حالىقتارىن ءبىر-بىرىمەن جاقىنداستىرىپ, بايلانىستىراتىن التىن كوپىر. سوندىقتان ۇلىستىڭ ۇلى كۇنىنىڭ ماڭىزى دا, سالماعى دا زور ەكەنىن بىلگەنىمىز ابزال.
جامبىل ارتىقباەۆ,
تاريح عىلىمدارىنىڭ دوكتورى, پروفەسسور
