فوتو: gov.kz
ە.نىسانباەۆ ءوز سوزىندە جاپونيا قورشاعان ورتانى قورعاۋ جانە ەكولوگيالىق يننوۆاتسيالاردى ەنگىزۋ سالاسىندا ۇلكەن تاجىريبەسى بار قازاقستاننىڭ ءىرى ەكونوميكالىق ارىپتەستەرىنىڭ ءبىرى ەكەنىن اتاپ ءوتتى.
سونداي-اق قازاقستان تاراپىنىڭ ەكولوگيا جانە تابيعي رەسۋرستار مينيسترلىگى مەن جاپونيانىڭ قورشاعان ورتانى قورعاۋ مينيسترلىگى اراسىنداعى قورشاعان ورتانى قورعاۋ سالاسىنداعى ىنتىماقتاستىق تۋرالى ءوزارا تۇسىنىستىك تۋرالى مەموراندۋم جوباسىن ازىرلەۋى تۋرالى ايتىلدى. بۇل قۇجات جاپون تاراپىنىڭ قاراۋىنا جىبەرىلدى. اتالعان مەموراندۋم كليماتتىڭ وزگەرۋى, قالدىقتاردى باسقارۋ, جاسىل تەحنولوگيالاردى دامىتۋ جانە بيوارتۇرلىلىكتى ساقتاۋ ماسەلەلەرى بويىنشا ىنتىماقتاستىقتى كوزدەيدى.
وسى ورايدا وتكەن جىلدىڭ سوڭىندا ءباا دۋباي قالاسىندا وتكەن سور-28 حالىقارالىق كليماتتىق فورۋمىنىڭ الاڭدارىندا «ميتسۋبيشي» كومپانياسىمەن كەزدەسۋ وتكىزىلگەنىن ايتا كەتكەن ءجون. سول كەزدەسۋ بارىسىندا كومپانيا پارنيكتىك گازدار شىعارىندىلارىن ازايتۋ جانە ءسىڭىرۋ ماقساتىندا جاساندى ورمان ءوسىرۋ جوباسىن تانىستىردى. وندا كومىرتەكتى الۋ جانە لاستاۋشى زاتتاردىڭ دەڭگەيىن تومەندەتۋ جونىندەگى تەحنولوگيالار قامتىلعان.
«وسىعان بايلانىستى ءبىز اتالعان باعىتتار بويىنشا «ميتسۋبيشيمەن» بىرلەسىپ جوبالاردى ىسكە اسىرۋعا دايىنبىز جانە مۇددەلىمىز. ىنتىماقتاستىعىمىزدىڭ الەۋەتىن نازارعا الا وتىرىپ, ءبىز وتىن تۇيىرشىكتەرىنەن, دسپ, دۆپ قۇرىلىس تاقتالارىنان باستاپ تسەلليۋلوزا وندىرىسىنە دەيىن ءوندىرىستىڭ ءارتۇرلى تۇرلەرىن ىسكە قوسا وتىرىپ, اعاش پەن ونىڭ قالدىقتارىن قايتا وڭدەۋ بويىنشا ءىرى ينۆەستورلاردى تارتۋعا مۇددەلىمىز», دەدى ە.نىسانباەۆ ر.كودزۋكي مىرزاعا سويلەگەن سوزىندە.
سونداي-اق تاراپتار جانۋارلار دۇنيەسى سالاسىنداعى عىلىمي جوبالاردى, ونىڭ ىشىندە جابايى جانۋارلاردى جاساندى ءوسىرۋ جونىندەگى جوبالاردى ىسكە اسىرۋ ماسەلەلەرىن تالقىلادى. كەزدەسۋ سوڭىندا تاراپتار ءبىر-بىرىنە العىس ايتىپ, ەكى ەلدىڭ يگىلىگى ءۇشىن ودان ءارى ءوزارا ىنتىماقتاستىقتى نىعايتۋعا سەنىم ءبىلدىردى.
