رەيتينگتىڭ جوعارىلاۋى «قتج» ۇك» اق وپەراتسيالىق جانە قارجىلىق كورسەتكىشتەرىنىڭ تۇراقتى جاقسارۋىن, سونداي-اق كرەديتتىك قابىلەتتىلىگىنىڭ نەعۇرلىم جوعارىلىعىن كورسەتەدى.
اگەنتتىكتىڭ باعالاۋىنشا, قتج تابىستىڭ ايتارلىقتاي ءوسۋىن جانە جاقسى رەنتابەلدىلىكتى كورسەتەدى. كىرىس 2021 جىلى – 13%, 2022 جىلى – 16% جانە 2023 جىلدىڭ العاشقى توعىز ايىندا 26% ءوستى جانە 2024 جىلى 15-18% ارالىعىندا ءوسۋى مۇمكىن. Moody's تۇزەتكەن EBITDA كىرىستىلىگى كەلەسى 12-18 اي ىشىندە 28-30% دەڭگەيىندە ساقتالادى.
ساراپشىلار قتج جۇك اينالىمىنىڭ (2022 جىلى – 5,1%, 2023 جىلدىڭ العاشقى توعىز ايىندا – 7,5%) وسكەنىن اتاپ ءوتتى جانە ول 2023-2024 جىلدارى نەگىزىنەن ترانزيتتىك جانە ەكسپورتتىق وپەراتسيالار ەسەبىنەن جىلىنا 7,0%-9,0% وسەدى دەپ سەنىم ارتىپ وتىر.
اگەنتتىك پىكىرىنشە, ترانسكاسپي حالىقارالىق كولىك مارشرۋتىنىڭ ءوسىپ كەلە جاتقان ءرولى اياسىندا تەمىرجول جۇك تاسىمالىنا سۇرانىس جوعارى دەڭگەيدە قالادى جانە وعان ينفراقۇرىلىمنىڭ تار جەرلەرى عانا كەدەرگى كەلتىرۋى مۇمكىن دەسەدى.
رەيتينگ تەمىرجول تاسىمالىنا دەگەن جوعارى سۇرانىستى قاناعاتتاندىرۋعا جانە اكتيۆتەر بازاسىن جاقسارتۋعا باعىتتالعان كومپانيانىڭ اۋقىمدى كاپيتالدى ينۆەستيتسيالاۋ باعدارلاماسىن كورسەتەدى. اگەنتتىك پىكىرىنشە, تەمىرجول ينفراقۇرىلىمىن دامىتۋعا جانە جىلجىمالى قۇرامدى جاڭارتۋعا ارنالعان كۇردەلى شىعىندار 2022 جىلى 33%-عا ۇلعايسا, 2023 جىلى ول ءۇش ەسەدەن استام وسەدى جانە 2024-2025 جىلدارى جوعارى دەڭگەيدە قالادى.
اگەنتتىك سونىمەن قاتار كومپانيانىڭ مەملەكەت ءۇشىن جوعارى ماڭىزدىلىعىن جانە ونىڭ كومىرسۋتەك سەكتورلارىنان باس تارتۋ ارقىلى ەكونوميكانى ءارتاراپتاندىرۋ جونىندەگى كۇش-جىگەرىن اتاپ وتەدى.
