مينيستر باس بولىپ, تاجىريبەلى ديپلوماتتار, اتتاشەلەر ستۋدەنتتەرگە ءدارىس وقىدى. جاستار ساياسي ماسەلەلەرگە بايلانىستى سۇراقتارىن قوياتىن. ولار مينيسترگە ءتۇرلى تىلدە (قازاق, ورىس, اعىلشىن, قىتاي) سۇراق قويسا, ولار جاۋاپتى سول تىلدە الاتىن.
بولاشاق حالىقارالىق دارەجەدەگى مامانداردىڭ, ديپلوماتتاردىڭ ءوز ەلىمىزدە ءبىلىم الىپ, جەتىلىپ, شىڭدالىپ شىعۋى – بۇكىل حالىقتىڭ مۇددەسى ەدى. قازاقستاننىڭ كوپتەگەن دۇنيەجۇزىلىك ۇيىمعا مۇشە بولۋى كەزىندە كاسىبي دەڭگەيى جوعارى, ساياسي-ەكونوميكالىق جانە رۋحاني داعدارىستاردى جەڭە الاتىن ىسكەر, ءبىلىمدى, مادەنيەتتى تۇلعانى قالىپتاستىرۋعا فاكۋلتەت زور ۇلەس قوستى.
فاكۋلتەتتەگى جەتەكشى كافەدرالاردىڭ ءبىرى – شەت تىلدەر كافەدراسى. جوعارى دارەجەلى, زاماناۋي تالاپتارعا ساي فاكۋلتەت تۇلەكتەرى باسەكەلەستىككە ساي. ولاردىڭ ديپلومى الەمدە باعالانادى.
1996 جىلى باستالعان ينۆەستيتسيا ساياساتى ەلىمىزدە اعىلشىن ءتىلىن ۇيرەنۋگە بەتبۇرىس جاسادى. قازىرگى زاماناۋي عىلىمنىڭ, مادەنيەتتىڭ, ساياساتتىڭ عالامدانۋ داۋىرىندە, شەت ءتىلىنىڭ قۇندىلىعى مەن ديپلوماتيالىق قارىم-قاتىناس جاساۋعا, ساۋدا مەن بيزنەس سالالارىن دامىتۋعا زور مۇمكىندىكتەر تۋدى. فاكۋلتەت تۇلەكتەرىنىڭ بىلىكتىلىگى حالىقارالىق ستاندارتتارعا ساي ەكەنىن ۋاقىت تا, زامان تالابى دا كورسەتىپ وتىر. ولار بۇگىندە حالىقارالىق دەڭگەيدەگى ماسەلەلەرمەن اينالىساتىن ءتۇرلى مەملەكەتتىك جانە شەتەلدىك مينيسترلىكتەردە, پرەزيدەنت پەن ۇكىمەت اپپاراتتارىنىڭ حالىقارالىق بولىمدەرىندە جانە تاعى دا باسقا مارتەبەلى ورىنداردا تابىستى قىزمەت اتقارىپ كەلەدى. ەلىمىز شامامەن 182 مەملەكەتپەن قارىم-قاتىناس ورناتتى جانە شەتەلدەردە 67 وكىلدىگى بار. تۇلەكتەرىمىزدىڭ بىرقاتارى ەلىمىزدىڭ ىشكى-سىرتقى ديپلوماتيالىق سالالارىندا ابىرويمەن قىزمەت اتقارىپ ءجۇر.
مەن قازۇۋ-دا 51 جىل بويى شەت تىلىنەن (نەمىس, اعىلشىن) ءدارىس وقىدىم. ونىڭ 20-عا جۋىق جىلىندا كافەدرا مەڭگەردىم. فاكۋلتەتتىڭ دە, كافەدرانىڭ دا كوش باستاۋىنا ىنتا-جىگەرىممەن كىرىستىم. قازىر دە قازۇۋ-دان قول ۇزگەنىم جوق. شاقىرعان كەزدە ءبىلىم الۋشىلارعا ءدارىس وقيمىن, كەزدەسۋلەرگە تۇراقتى بارىپ تۇرامىن.
روزا قايىرباەۆا,
ءال-فارابي اتىنداعى قازۇۋ پروفەسسورى
