پرەزيدەنت ەلىمىزدە اتقارىلىپ جاتقان جاڭا رەفورمالارعا شولۋ جاساپ, الداعى باعىت-باعدارلارىمەن ءبولىستى. قازىرگى ۋاقىتتا مەملەكەتىمىزدىڭ بارلىق سالاسىندا ەلەۋلى وزگەرىستەر بولىپ جاتىر. قايعىلى قاڭتار وقيعاسىنان كەيىن كونستيتۋتسيامىزعا زامان تالابىنا ساي وزگەرىستەر ەنگىزىلىپ, بيلىك پەن حالىقتىڭ اراسىندا اشىق ديالوگ ورنادى. جاڭا قۇرامدا «ەستيتىن ۇكىمەت» جاساقتالىپ, الەۋمەتتىك سالادا قوردالانىپ قالعان ءتۇيىندى ماسەلەلەر جۇيەلى شەشىمىن تابا باستادى. ۇلتتىق قوردان بالالارعا قارجى بەرۋ ماسەلەسىن رەتتەيتىن زاڭ كۇشىنە ەندى.
ەلىمىزدىڭ ءار وڭىرىندە جايلى مەكتەپتەر بوي كوتەرىپ, مادەنيەت وشاقتارى جاڭارىپ كەلەدى. بۇل رەتتە «ەسىك» مەملەكەتتىك تاريحي-مادەني مۋزەي-قورىعى جانىنان ۇلكەن ۆيزيت-ورتالىق سالىنىپ جاتقانىن ايتا كەتكىم كەلەدى.
پرەزيدەنت سۇحباتىندا بۇعان دەيىنگى حالىققا ارناعان جولداۋلارى مەن ۇلتتىق قۇرىلتاي وتىرىسىندا كوتەرىلگەن ماسەلەلەر ءالى دە وزەكتى بولىپ وتىرعانىن ايتتى. مەملەكەت باسشىسى جاڭا قازاقستان قوعامىن قالىپتاستىرۋ باعىتىنداعى اۋقىمدى جۇمىستاردى ىسكە اسىرۋ جالعاسا بەرەتىنىنە باسا نازار اۋداردى.
بيىل ەلىمىز سىرتقى ساياساتتى دامىتۋعا قاتىستى ماڭىزدى ءىس-شارالاردى ۇيلەستىرمەك. اتاپ ايتقاندا, ەلىمىز شانحاي ىنتىماقتاستىق ۇيىمىنا, ۇجىمدىق قاۋىپسىزدىك تۋرالى شارت ۇيىمىنا, ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە, تۇركى مەملەكەتتەرى ۇيىمىنا, ارالدى قۇتقارۋ حالىقارالىق قورىنا, ازىق-تۇلىك قاۋىپسىزدىگى جونىندەگى يسلام ۇيىمىنا توراعالىق ەتەدى.
بيىل ەلىمىزدە دۇنيەجۇزىلىك كوشپەلىلەر ويىنى وتەدى. بۇل – تۇركى الەمىن جاقىنداستىراتىن, تامىرلاس ەلدەردىڭ رۋحاني ىنتىماقتاستىعىن جانداندىراتىن ۇلكەن باستاما. ۇلى دالاداعى كوشپەلىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ارتتىرۋ وتە ماڭىزدى.
تاۋەلسىز ەلىمىز ءۇشىن ماڭىزدى وقيعانىڭ ءبىرى – جوشى ۇلىسىنىڭ ىرگەسى قالانعانىنا بيىل 800 جىل تولادى. وسى تاريحي داتاعا وراي پرەزيدەنت مەملەكەتتىلىگىمىزدىڭ تامىرى تىم تەرەڭدە جاتقانىن ايتىپ, تاريحتى عالىمدارعا كەڭ اۋقىمدى زەرتتەۋلەردى قولعا الۋدى تاپسىردى. بۇل زەرتتەۋ جۇمىستارىنا «ەسىك» مەملەكەتتىك تاريحي-مادەني مۋزەي-قورىعى تاريحشى, ارحەولوگ ماماندارى دا اتسالىسادى.
پرەزيدەنت: «تاريح – ءبىزدىڭ جالپىۇلتتىق بىرەگەيلىگىمىزدىڭ ماڭىزدى بولىگى. سوندىقتان مەملەكەت ءدال قازىر بۇل باعىتتا جۇيەلى جۇمىس جۇرگىزىپ وتىر» دەي كەلە, «سان عاسىرلىق تاريحىمىزدى زەرتتەۋ, تاريحي ادىلدىكتى قالپىنا كەلتىرۋ ءبىزدىڭ نەگىزگى مىندەتىمىزدىڭ ءبىرى بولىپ قالا بەرەدى», دەپ اتاپ ءوتتى.
سۇحبات بارىسىندا قاسىم-جومارت توقاەۆ: ء«بىز وزىق ويلى ۇلت رەتىندە حالقىمىزدى ىدىراتاتىن ەمەس, بىرىكتىرەتىن جولدى تاڭداپ, تەك العا قاراۋىمىز كەرەك. جالپىۇلتتىق قۇندىلىقتار بارىنەن جوعارى تۇرۋعا ءتيىس» دەگەن پىكىر ايتتى. شىنىندا دا, مەملەكەت باسشىسىنىڭ بۇل ءسوزى بارشا وتانداستارىمىز ۇستاناتىن باستى قاعيداعا اينالۋى كەرەك. بۇل باعىتتا «ەسىك» مەملەكەتتىك تاريحي-مادەني مۋزەي-قورىعى مەملەكەتتىڭ تاريحي-مادەني قۇندىلىقتارىن زەرتتەپ, ساقتاۋدا جۇيەلى جۇمىس اتقارا بەرەدى.
گۇلميرا مۇحتاروۆا,
«ەسىك» مەملەكەتتىك تاريحي-مادەني مۋزەي-قورىعىنىڭ ديرەكتورى
