سولاردىڭ قاتارىندا اتا زاڭنىڭ ۇستەمدىگىن قامتاماسىز ەتەتىن, كونستيتۋتسيالىق باقىلاۋدى جۇزەگە اسىراتىن جوعارى ورگان – كونستيتۋتسيالىق سوتتى قايتا قالپىنا كەلتىرۋدى اتاپ وتكەن ءجون. ونىڭ مودەلىن انىقتاۋ كەزىندە ەكى ءجۇز جىلدان استام تاريحى بار حالىقارالىق تاجىريبە ەسكەرىلدى.
ازاماتتارعا بۇل ورگانعا تىكەلەي جۇگىنۋ قۇقىعى بەرىلىپ, ولار ءوز قۇقىقتارى مەن بوستاندىقتارىن تىكەلەي قوزعايتىن زاڭدار مەن وزگە دە نورماتيۆتىك-قۇقىقتىق اكتىلەردى داۋلاۋعا مۇمكىندىك الدى. ازاماتتاردىڭ ءوز قۇقىقتارىن قورعاۋدىڭ بۇل قۇرالىن پايدالانۋ ءتارتىبى بارىنشا جەڭىلدەتىلدى, قازاقستاندا كوپ ەلدە قالىپتاسقان بارلىق سوت ينستانتسياسىنان ءوتۋ تالابى جوق. سونداي-اق زاڭداردىڭ كونستيتۋتسيالىعىن تەكسەرۋگە باستاماشىلىق جاساۋ قۇقىعى باس پروكۋرور مەن ادام قۇقىقتارى جونىندەگى ۋاكىلگە دە بەرىلدى.
2023 جىلدىڭ باسىنان قىزمەتىنە كىرىسكەن كونستيتۋتسيالىق سوتقا وسى ۋاقىتقا دەيىن بەس مىڭنان استام ادام ءوتىنىشىن جولداپ ۇلگەردى. ولاردى قاراۋ ناتيجەلەرى بويىنشا بىرقاتار زاڭنىڭ نورمالارى كونستيتۋتسياعا قايشى دەپ تانىلدى. كەيبىر زاڭداردىڭ داۋلى ەرەجەلەرىنە كونستيتۋتسيالىق تۇرعىدان تۇسىندىرمەلەر بەرىلدى. كونستيتۋتسيالىق سوتتىڭ قۇقىقتىق ۇستانىمدارى مەن ۇسىنىستارىن جۇزەگە اسىرۋ ماقساتىندا بىرنەشە زاڭ جوباسى ازىرلەنىپ, ولاردىڭ العاشقىلارى قابىلدانىپ دا ۇلگەردى. وسىلايشا, ازاماتتىق قوعام وكىلدەرىنىڭ تىكەلەي قاتىسۋىمەن كونستيتۋتسيا قاعيداتتارىنىڭ اياسىندا ۇلتتىق زاڭنامانى جانە قۇقىق قولدانۋ تاجىريبەسىن ودان ءارى جەتىلدىرۋ, ولاردى حالىقارالىق مىندەتتەمەلەرگە سايكەستەندىرۋ قارقىنى ارتتى.
مەملەكەت باسشىسىنىڭ كونستيتۋتسيالىق سوتتى قايتا قۇرۋ يدەياسىنىڭ جۇزەگە اسۋى قۇقىقتىق جۇيەنى ەۆوليۋتسيالىق جولمەن دامىتۋعا, ازاماتتاردىڭ كونستيتۋتسيالىق قۇقىقتارىن قورعاۋ كەپىلدىكتەرىن جانە ەلدەگى زاڭدىلىق رەجىمىن نىعايتۋعا, حالىقتىڭ مەملەكەتتىك ينستيتۋتتارعا دەگەن سەنىمىن ارتتىرۋعا زور ىقپالىن تيگىزىپ وتىرعانى انىق.
باقىت نۇرمۇحانوۆ,
كونستيتۋتسيالىق سوت توراعاسىنىڭ ورىنباسارى
