وعان دۇنيەگە كەلگەندە جانىبەك دەگەن ەسىم بەرىلگەن. الايدا, قازىر ەددي جان ءوزىن مۇرات دەپ اتاپ ءجۇر. مۇرات ءبىراز ۋاقىت ءوزى تۋعان جەردى ارالاپ, اناسىن ىزدەدى. ەندى ول اناسىن كورمەيىنشە قايتپايتىنىن ايتادى.
بەلگىلى تەلەجۇرگىزۋشى, جۋرناليست قىمبات دوسجان الەۋمەتتىك جەلىدە مۇراتتىڭ وقيعاسىنا قاتىستى جاڭا دەرەك جاريالادى. ونىڭ سوزىنە قاراعاندا, مۇراتتىڭ اناسىن ىزدەۋ كۇن وتكەن سايىن قيىنداپ بارادى. ويتكەنى قۇجات كۇيىندە دە كوپ نارسە بەلگىسىز. جۋرناليست "بارمىسىڭ, باۋىرىم؟" رەداكتسياسى بۇل ماسەلەنى جان-جاقتى زەرتتەپ جاتقانىن جەتكىزدى.
- جەكەگە تۇسكەن حات-قوڭىراۋدا سان جوق. سوڭعى 2 كۇندە ۇندەمەي وتىرعانىمىزعا الاڭداعان جاندار دا كوپ, اراسىندا ءبىزدى جامانداعاندار دا جوق ەمەس. ءبىز, "بارمىسىڭ, باۋىرىم؟" حابارىنىڭ رەداكتسياسى ءوز جۇمىسىمىزدى بىلەمىز. بىرنەشە مەملەكەتتىك مەكەمەگە حات جازىپ, رەسمي مالىمەتتەر الدىق. اقپارات تاپقان سايىن ونى جاقسىلاپ زەرتتەمەي, جالاۋلاتىپ جاريالاي سالۋعا تاعى بولمايدى. بىلسىزدەر مە, بۇل جۇمباقتى شەشكەن سايىن تۇيىنشەگى كەرىسىنشە تاستاي ءتۇيىلىپ بارا جاتىر... پەرزەنتحاناعا جەدەل جاردەم ارقىلى كەلگەن, قابىلدانعان, بوسانعان, ءتورت كۇن توسەگىندە تۇنەگەن كەلىنشەكتىڭ جەكە قۇجات كوشىرمەسى ءالى تابىلعان جوق. بار قۇجاتتىڭ قالاي تولتىرىلعانىن مىنە, ادەيى كورسەتىپ وتىرمىز. نارەستە ومىرگە كەلگەندەگى مالىمەتتى, ياعني 2002 جىلدىڭ قاڭتارىندا دارىگەر سوۆەت وداعىنان قالعان "پۋتەۆوي ليست گرۋزوۆوگو اۆتوموبيليا, تالون زاكازچيكا" دەگەن 1983 جىلى ازىرلەنگەن بلانكىگە تۇسىنىكسىز جازۋمەن جازا سالعان... قاي جاعىنان كەلسەك تە, رەسمي قۇجاتتاردا جازىلعان كەلىنشەكتىڭ اتى-ءجونى وتىرىك سياقتى... - دەلىنگەن ءجۋرناليستىڭ جازباسىندا.
قىمبات دوسجان بالانىڭ اناسى بولۋى مۇمكىن دەگەن كۇدىكپەن ءۇش ايەلدىڭ ءبىرى دنق سىناماسىن تاپسىرعانىن مالىمدەدى.
- ءۇش اپتالىق زەرتتەۋ جۇمىسىنان شىققان ناتيجە: قازىر ءۇش كەلىنشەككە كۇدىك باسىم. كەشە "بارمىسىڭ, باۋىرىم؟" حابارىنىڭ رەداكتورى اسەل اسقارقىزى سول ءۇش كەلىنشەكتىڭ ءبىرىن دنق تەست جاسايتىن لابوراتورياعا ەرتىپ باردى. ەندى ناتيجەسىن كۇتىپ وتىرمىز. لابوراتورياعا جانىبەك (مۇرات) تە باردى. يسپانياعا قايتقان جوق, ازىرگە قازاقستاندا. بىراق بىردەن ايتايىق, كوپتىڭ تىلەۋى, ءبىزدىڭ باستى ماقسات - سوناۋ جەردەن مەيىرىمگە شولدەپ كەلگەن بالانىڭ اناسىن تاۋىپ بەرۋ. كەي ايەلدىڭ الەمىن بىلەسىزدەر, قيىندىققا تولى. بالاسىنان باس تارتقاندا, باسقا جول كورمەي, جاقىننان قولداۋ تاپپاي, سونداي شەشىمگە بارۋعا ءماجبۇر بولعان. سوندىقتان تۋعان اناسىنا قاتىستى اۋىر ءسوز جازباڭىزدار. ءيا, قاتەلەسكەن شىعار, بىراق ول دا ادام. ونىڭ دا قۇقىعى بار, - دەگەن اۆتور.
سوندىقتان ەگەر دنك تەست ناتيجەسى بويىنشا كەلىنشەك بالانىڭ تۋعان اناسى بولىپ شىقسا, رەداكتسيا ول كەلىنشەكتىڭ فوتوسىن الەۋمەتتىك جەلىدەن دە, ەفيردەن دە كورسەتپەيتىنىن مالىمدەدى. اتى-ءجونىن دە اتاماي, قۇپيا ساقتاماق.
- بالاسىمەن عانا تابىسادى, تانىسادى. ءبىز و باستان قۇپيا بولادى دەپ ۋادە بەردىك, سول سوزىمىزدە تۇرامىز. ەگەر بۇل كەلىنشەك بالانىڭ تۋعان اناسى بولماي شىقسا, زەرتتەۋ جۇمىسى جالعاسادى, - دەيدى قىمبىت دوسجان.
