ونەر يەسىنىڭ جارى ارمان دۇيسەنوۆتىڭ الەۋمەتتىك جەلىدەگى پاراقشاسىن قايتا جالعاستىراتىنىن ايتقان.
كومپوزيتور دۇنيەدەن وتكەننەن كەيىن ونىڭ جەلىدەگى پاراقشاسى دا ءبىر جىلدان استام ۋاقىتتان بەرى وزگەرىسسىز قالعان ەدى. ال مارقۇمنىڭ پاراقشاسىنا 595 مىڭ ادام جازىلعان.
«ارداقتى اعايىن! ءبىزدىڭ اۋلەتىمىزدىڭ عانا ەمەس, تۇتاس ەلدىڭ سۇيىكتى پەرزەنتىنە اينالعان ارمان دۇيسەنوۆتەي ازاماتتىڭ دۇنيەدەن كوشكەنىنە جىلعا تولۋعا اينالدى. وسى ءبىر جىلدىڭ ءبىزدىڭ وتباسىمىز ءۇشىن قانشالىقتى مۇڭلى, قانشالىقتى اۋىر بولعانىن ايتىپ جەتكىزۋ قيىن. اكەسىن ىزدەگەن ۇل-قىزىڭنىڭ جاۋدىرەگەن جانارىنا شاراسىز كۇيدە قاراۋدان اۋىر نە بار؟ وسى قايعىنى جان جۇرەگىمەن سەزىنىپ, ءبىزدىڭ قايعىمىزدى بولىسكەن قالىڭ جۇرتقا اللا رازى بولسىن!
مۇنداي سىناقتى ەندى ەشكىمنىڭ باسىنا بەرمەسىن. ارماننىڭ اسىل بەينەسى, اڭقىلداعان اق جۇرەگى, اسەم اندەرى تالايدىڭ جانىن باۋراعانى ءسوزسىز, ونى ەلدىڭ ىزدەيتىنى دە سودان بولسا كەرەك. ونىڭ الەۋمەتتىك جەلىدەگى پاراقشاسىن وشىرمەۋىمىزدى, قايتا ونى تۇراقتى جۇرگىزۋىمىزدى ءوتىنىپ سۇراۋشىلاردىڭ دا قاراسى قالىڭ. ارماننىڭ ەكىنشى ءومىرى جالعاسقانىن, ونىڭ ەلىمەن بىرگە جاساعانىن ءبىز دە قالايمىز. سوندىقتان ارماننىڭ الەۋمەتتىك پاراقشاسىن قايتا جاڭعىرتۋدى ءجون سانادىق.
مۇندا ارماننىڭ اندەرى, كومپوزيتسيالىق شىعارمالارى, جاساعان باعدارلامالارى جاريالانادى. بۇل جۇمىستارعا سىزدەردىڭ دە كومەكتەرىڭىز تيەرىنە سەنەمىز. وسىلايشا ارماننىڭ اسىل بەينەسى بارىمىزبەن بىرگە جاسايتىن بولادى. بارشاڭىزدىڭ وتباسىلارىڭىزعا اماندىق, باق-بەرەكە تىلەيمىن», دەلىنگەن جازبادا.
جەلى قولدانۋشىلارى كومپوزيتوردىڭ ومىردەن وتكەنىنە جىل تولۋىنا وراي ەسكە الىپ, ەستەلىكتەرى مەن تىلەكتەرىن ءبىلدىردى.
