وبلىستىق مادەنيەت باسقارماسى ۇيىمداستىرعان ءداستۇرلى ونەر بايقاۋىنا ەلىمىزدىڭ ءار وڭىرىنەن كەلگەن ونەرپازدار قاتىستى. كىلەڭ كۇمىس كومەي انشىلەر باس قوسقان ءداستۇرلى ءان مەرەكەسىندە نۇرجاننىڭ بۇرىن كوپ ايتىلماي كەلگەن «كوكەن-اي», «باتيماعا», «ارا-اي», «اسىل-اي», «جان ساۋلەم», «نازىم», «زامان قالپى», «مۇقيداش-اي», «ۇلاعات», «نەشە سافل, نەشە باپ» اتتى شىعارمالارى اۋەلەدى. بايقاۋعا قاتىسقان جىرشى-تەرمەشىلەر نۇرجاننىڭ نازىمدارى مەن اندەرىن ورىنداۋمەن قاتار, بۇرىننان وزدەرىنىڭ ءان قورجىنىندا جۇرگەن مۋزىكالىق شىعارمالارىن شىرقاپ, كورەرمەن قاۋىمنىڭ قۇلاق قۇرىشىن قاندىردى.
ءداستۇرلى جىرشى-تەرمەشىلەردىڭ ونەرىن ايگىلى جىرشى, فولكلور زەرتتەۋشى الماسبەك الماتوۆ باستاعان قازىلار القاسى تارازىلاپ وتىردى.
توپجارعان اقىن نۇرحان احمەتبەكوۆ ءدوپ باسىپ باعا بەرىپ:
قازاقتا ناۋشابايدىڭ نۇرجانى وتكەن,
ارقاعا ءان تۇقىمىن سول ەدى ەككەن.
توبىلدان كوتەرىلگەن ءبىر زور ايقاي
ءسىبىر مەن سىر سۋىنا بالىن توككەن, دەپ جىرىنا ارقاۋ ەتكەن نۇرجان اندەرى – ارقانىڭ پاڭ دالاسىنداي مىنەزدى, ىرعاعى اساۋ, ىشكى يىرىمگە باي, شوقتىعى بيىك تۋىندىلار.
ءداستۇرلى ونەر مەرەكەسى مارەسىنە جەتكەندە الىس-جاقىننان ارنايى كەلگەن ونەرپازداردىڭ بارىنە قۇرمەت كورسەتىلىپ, نۇرجان اندەرى بايقاۋىنىڭ ارنايى مۇسىنشەسى مەن اقشالاي سىيلىقتار تابىس ەتىلدى.
قوستاناي وبلىسى
