فوتو: ت.تانىباەۆ
ەرلان قوشانوۆ قازاقستاننىڭ 2024 جىلى ۇجىمدىق قاۋىپسىزدىك تۋرالى شارتى ۇيىمىندا توراعالىعى كەزەڭىندەگى باسىمدىقتارى جايلى ايتتى.
«وزدەرىڭىزگە بەلگىلى, 2024 جىلدىڭ 1 قاڭتارىندا قازاقستان ۇجىمدىق قاۋىپسىزدىك تۋرالى شارتى ۇيىمىنا توراعالىقتى قابىلدايدى. مينسكىدە وتكەن ۇجىمدىق قاۋىپسىزدىك كەڭەسىنىڭ قاراشاداعى سەسسياسىندا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ قازاقستان توراعالىعىنىڭ باسىم باعىتتارىن اتاپ ءوتتى», دەدى ءماجىلىس سپيكەرى.
باسىمدىقتاردىڭ قاتارىندا ۇقشۇ-نىڭ مۇددەلى ەلدەرمەن جانە قاۋىپسىزدىك سالاسىندا جۇمىس ىستەيتىن حالىقارالىق قۇرىلىمدارمەن, سونىڭ ىشىندە بۇۇ, تمد جانە شانحاي ىنتىماقتاستىق ۇيىمىمەن سەرىكتەستىكتى تەرەڭدەتۋ ماسەلەلەرى بار. اسكەري كادرلاردى دايارلاۋ جۇيەسىن, ۇيىمنىڭ اسكەري-عىلىمي جانە بىتىمگەرشىلىك الەۋەتىن دامىتۋ بولىگىندە نورماتيۆتىك-قۇقىقتىق بازانى جەتىلدىرۋدىڭ ماڭىزى زور.
سونداي-اق قارۋ-جاراقتىڭ, وق-دارىلەردىڭ, ەسىرتكىنىڭ زاڭسىز اينالىمىنا قارسى بىرلەسكەن جۇمىستى كۇشەيتۋ جوسپارلانىپ وتىر. ۇقشۇ جاۋاپكەرشىلىگى ايماعىنداعى توتەنشە جاعدايلاردىڭ, كيبەرقىلمىستىڭ الدىن الۋ جانە ولاردىڭ سالدارىن جويۋ جونىندەگى پراكتيكالىق ىنتىماقتاستىقتى دامىتۋعا ەرەكشە نازار اۋدارىلادى.
ەرلان قوشانوۆ ۇقشۇ پارلامەنتتىك اسسامبلەياسىنىڭ ۇيىمعا مۇشە مەملەكەتتەردىڭ مۇددەلەرىن ەسكەرە وتىرىپ, ۇلتتىق زاڭناماسىن دامىتۋ مەن ۇيلەستىرۋگە قوسقان ۇلەسىن اتاپ ءوتتى. سونداي-اق ءماجىلىس توراعاسى قاتىسۋشى ەلدەردىڭ پارلامەنتتەرى اراسىنداعى ءتيىمدى ىنتىماقتاستىقتىڭ ايقىن مىسالى رەتىندە پارلامەنتتىك اسسامبلەيانىڭ تۇراقتى كوميسسيالارىنىڭ قىزمەتىنە توقتالدى.
ە.قوشانوۆ قازاقستاننىڭ توراعالىعى كەزەڭىندە بىرلەسكەن كۇش-جىگەرمەن جانە ۇقشۇ مەن ونىڭ پارلامەنتتىك اسسامبلەياسىنىڭ جۇمىس ورگاندارىنىڭ ساراپتامالىق قولداۋىنىڭ ارقاسىندا ۇجىمدىق قاۋىپسىزدىك جۇيەسىن نىعايتۋ ىسىندە جەمىستى جۇمىس اتقارىلاتىنىنا سەنىم ءبىلدىردى.
