ەكى كەزەڭدە جۇرگىزىلگەن جاتتىعۋدا الدىمەن مۇزدىڭ ۇستىندە كولىگىمەن بارا جاتقان ادامدى قۇتقارۋ جۇمىستارى قالاي جۇرگىزىلەتىنى كورسەتىلدى. توتەنشە وقيعا اۋىزشا ەمەس, پەستروە كولىنىڭ ۇستىندە ءىس جۇزىندە جۇزەگە اسىرىلدى. كەلەسى كەزەڭدە قۇتقارۋشىلارعا شارتتى تۇردە جولدا سوعىسقان «گازەل» مەن جەڭىل كولىكتىڭ اپاتىندا بولۋى مۇمكىن قيىن جاعدايدى ەڭسەرۋ جۇكتەلدى. سىرتقا شىعا الماي قالعان جەڭىل كولىك جۇرگىزۋشىسىن قۇتقارۋ وڭاي بولعان جوق. جاعداي كولىكتىڭ وتقا ورانۋىمەن كۇردەلەنە ءتۇستى. اپات ورنىنا جەدەل جەتكەن تج قۇتقارۋشىلارى, ءورت سوندىرۋشىلەردىڭ كەزەكشى قاراۋىلى ءورتتى جىلدام ءسوندىردى. قامالىپ قالعان ادام سالوننىڭ ارتقى ەسىگىنەن شىعارىلىپ, وعان دارىگەرلىك كومەك كورسەتىلدى.
سونداي-اق پەستروە كولىنە جاقىن ورنالاسقان ورماندا جەدەل-قۇتقارۋ جاساعىنىڭ ماماندارى جەرگىلىكتى پوليتسيا قىزمەتى جانە ۇلتتىق ۇلاننىڭ 6637 اسكەري ءبولىمىنىڭ اسكەري قىزمەتشىلەرىمەن بىرلەسىپ, جوعارى ءوتىمدى ترەكول تەحنيكاسىنىڭ 3-ەۋىن پايدالانا وتىرىپ, اداسقان ادامدى ىزدەستىرۋ-قۇتقارۋ جۇمىستارىن جۇرگىزدى. كينولوگتىڭ جاردەمىمەن اداسقان ادام تەز تابىلىپ, وعان مەديتسينالىق كومەك كورسەتىلدى. جاتتىعۋ كەزىندە توتەنشە جاعداي سالدارىنان زارداپ شەككەندەردى كول جاعاسىنداعى شاتىرلى لاگەرگە ورنالاستىرۋ بويىنشا ءىس-شارالار دا پىسىقتالدى. ولاردى تىركەۋدەن جانە العاشقى مەديتسينالىق كومەك كورسەتۋدەن باستاپ, تاماقتانۋ مەن تۇنەۋدى ۇيىمداستىرۋعا دەيىنگى ءىس-شارالاردىڭ تولىق كەشەنى قامتاماسىز ەتىلدى. وسىنداي ماڭىزدى ىستە قىزىل كرەستىڭ وبلىستىق فيليالى مەن ساۋدا جانە تاماقتانۋ قىزمەتىنىڭ قىزمەتكەرلەرى ۇلكەن ءرول اتقارادى. جەرگىلىكتى جەردە كوممۋنيكاتسيالاردى ۇيىمداستىرۋ ءۇشىن وبلىس اكىمدىگىنىڭ, «قازاقتەلەكوم» اق قىزمەتكەرلەرىنىڭ كومەگىمەن 3 تەلەفون ءنومىرى ۇيىمداستىرىلىپ, بايلانىس پۋنكتى اشىلدى. تاجىريبەلىك ءىس-شارالار وبلىستىڭ اۋىلدىق اۋداندارىندا دا وتكىزىلدى, بۇل رەتتە اۆتوجولدارداعى شارتتى تج جانە كوممۋنالدىق جانە ەنەرگەتيكالىق جەلىلەردەگى اپاتتاردى جويۋعا, زارداپ شەككەندەرگە كومەك كورسەتۋگە باسا نازار اۋدارىلدى. قۇرىلىسى تولىق اياقتالماعان 9 قاباتتى ءۇيدىڭ اۋماعىندا ءورت كەزىندە تۇرعىنداردى قۇتقارۋ ستسەناريى دە جۇزەگە اسىرىلدى.
وقۋ-جاتتىعۋلاردا بىرنەشە وقيعا قامتىلىپ, ولاردىڭ بارىنە قۇتقارۋشىلار بىرنەشە كۇن دايىندالدى. تجد ءباسپاسوز قىزمەتىنىڭ وكىلى ەۆگەني جۋراۆلەۆتىڭ مالىمدەۋىنشە, مۇنداي جاتتىعۋلار ەلىمىزدىڭ وزگە دە ايماقتارىندا وتكىزىلگەن. بۇگىنگى تاڭدا قۇتقارۋشىلاردىڭ جالپى سانى 34 مىڭداي ادام كۇشىنەن جانە 12 مىڭ ءتۇرلى تەحنيكادان تۇرادى.
سولتۇستىك قازاقستان وبلىسى
