فوتو: اشىق دەرەككوز
– اقجول, سەنىڭ ەسىمىڭدى كۇللى ەل تانىپ, باتىلدىعىڭدى قۇرمەتتەپ جاتىر. ءاپ-ساتتە بۇلاي ايگىلى بولامىن دەپ ويلاماعان دا شىعارسىڭ.
– ارينە, سول كۇنى ءوزى مەكتەپتە سىرقاتتانىپ, مازام بولمادى. سىنىپ جەتەكشىمنەن سۇرانىپ, ۇيگە قايتتىم. كۇندەلىكتى ءۇيىمىز بەن مەكتەپ اراسىنا قاتىنايتىن قوعامدىق كولىككە وتىردىم. ويىمىزدا ەشتەڭە جوق, سوڭعى ايالداماعا جاقىنداعاندا ابىر-سابىر باستالدى. اۆتوبۋس شايقاپ الا جونەلدى دە, جولدان قيىس كەتىپ, تۇرعىن ۇيگە قاراي بەت الدى. ازان-قازان داۋىستان ەسىمىز شىعىپ كەتتى, قوعامدىق كولىكتىڭ ارتقى جاعىندا تۇرعام, دەرەۋ الدىنا قاراي ۇمتىلدىم. بارسام, جۇرگىزۋشى اعاي وڭ اياعىمەن جىلدامدىقتى كۇشەيتكىش قۇرالدى قاتتى باسىپ الىپتى, ءوزى ورىندىعىنان قيسايىپ قۇلاپ بارا جاتىر. ەسىنەن تانىپ قالعان ەكەن. بىردەن اياعىن تارتتىم دا, تەجەگىشتى باسىپ اۆتوبۋستى توقتاتتىم. ەگەر تەجەمەگەندە جەر ۇيگە سوعىلۋى مۇمكىن ەدى, تىم جاقىن قالعان بولاتىن. گاز قۇبىرىن قيراتىپ, سۋ اعاتىن ارىقتان دا ءوتىپ كەتكەن ەكەن.
– اۆتوبۋستاعى جولاۋشىلار تەك وقۋشىلار عانا بولدى ما, ەرەسەك ادامدار دا وتىردى ما؟
– اۋىلدان قاتىنايتىن تۇرعىندار, اراسىندا وقۋشى دا, ەرەسەك كىسىلەر دە بولدى. وزگەلەر قورقا-سوقتاپ تۇرعاندا, مەن عانا باتىلدىق تانىتتىم دەي المايمىن. كەز-كەلگەن ادام تاۋەكەل جاسايتىن ءسات ەدى. ەرەسەك ادامدار ورىندارىنان تۇرامىن دەگەنشە مەن ءبىرىنشى جەتىپ, جۇرگىزۋشىگە كومەككە كەلدىم دەپ ويلايمىن.
ءوزىم باتىرلىق ىستەدىم, ەرلىك كورسەتتىم دەمەيمىن. ونداي وي ساناما كىرىپ تە شىققان ەمەس. بىراق الەۋمەتتىك جەلىگە اقپارات تاراعان سوڭ جان-جاقتان حابارلاسىپ قۇتتىقتاۋشىلار كۇرت ارتتى. اۋدان اكىمدىگى نوۋتبۋك بەردى. الماتى وبلىسىنىڭ اكىمى مارات سۇلتانعازيەۆ ىلە اۋدانىنىڭ تۇرعىندارىمەن كەزدەسۋى كەزىندە ارنايى شاقىرىپ, قۇرمەتتەدى, سوڭعى ۇلگىدەگى IPhone 15 مودەلىن سىيعا تارتۋ ەتتى. مۇنداي قۇرمەتكە كەنەلەمىن دەپ ويلاعام دا جوق.
– فاميلياڭ – گەروي, اتاڭنىڭ ەسىمىنە جازىلىپسىڭ.
– ءيا, مەن اكەم مەن انامنىڭ تۇڭعىش ۇلىمىن. وزىمنەن كەيىن التى باۋىرىم بار. انام كوپ بالالى باتىر انا, التىن القا يەگەرى. اتامنىڭ ەسىمىن گەروي دەپ اكەسى قويىپتى. گەروي اتامنىڭ اكەسى ابەن ءومىروۆ 1913 جىلى ومىرگە كەلگەن ەكەن. بيىل تۋعانىنا 110 جىل تولدى. ابەن بابام 1942 جىلى ەكىنشى دۇنيەجۇزىلىك سوعىسقا اتتانىپ, 1945 جىلى ەلگە-امان ەسەن ورالعان. ۇلىنىڭ ەسىمىن ىرىمداپ گەروي دەپ ابەن بابامىز قويعان ەكەن. ءوزى دە سوعىستا ەرلىگىمەن دارالانىپ 1, 2-دارەجەلى داڭق وردەنىمەن ماراپاتتالعان. ءوزىمنىڭ اتام گەروي اكەسىنىڭ ەرلىگى تۋرالى, ونەگەلى ءومىرى تۋرالى بىزگە ايتىپ بەرىپ وتىرادى. بويىمدا ابەن بابامنىڭ دا قانى بولعاندىقتان وسىنداي قادامعا بارا الدىم دەپ ويلايمىن. ناعاشى جۇرتىم الماتى وبلىسىنىڭ پانفيلوۆ اۋدانىنان. ناعاشى اعام ەلنۇر داۋلەت ۇلى گرەك-ريم كۇرەسىنەن ازيا چەمپيوناتىنىڭ كۇمىس جۇلدەگەرى, حالىقارالىق تۋرنيرلەردىڭ جەڭىمپازى.
– بەيبىت كۇندە باتىرلىق جاساۋ, تاۋەكەلگە بارۋدىڭ قانشالىقتى ماڭىزدى ەكەنىن سەزىنگەن بولارسىڭ؟
– ارينە, وزدەرىڭىزدىڭ ارىپتەستەرىڭىز كەلىپ تەلەارنادان جاريا ەتتى. اۋدان, وبلىس باسشىلارى قابىلداپ, قۇرمەتىن اياعان جوق. مەكتەبىمدەگى ديرەكتور دا, ۇستازدارىمىز دا قۇتتىقتاپ, العىسىن ايتىپ جاتىر. زامانداستارىم دا باتىردى كۇتكەندەي قادىرلەپ وتىر. ء«بىز دە سەندەي باتىرلىق تانىتا الساق, شىركىن» دەپ تامسانادى. تانىمال بولعان كۇشتى ەكەن, ءبارى كورگەن جەردە «سەن اۆتوبۋستى توقتاتقان اقجول ەمەسسىڭ بە؟» دەپ سۇراپ جاتادى. كىشكەنتاي كەزىمنەن اكەمنىڭ جانىنا ىلەسىپ كولىك جوندەگەندە كومەكشىسى بولىپ جۇرەمىن. تەحنيكاعا جاقىندىعىمنىڭ دا كوپ پايداسى ءتيدى. سىن ساتىندە ءاربىر ادام وسىنداي قادامعا بارادى دەپ ويلايمىن. ەندىگارى مۇنداي وقىس وقيعا قايتالانباسا ەكەن دەپ تىلەيمىن.
